Petropavlda súıiktisin sábıimen birge jáne óziniń inisin óltirgen qylmysker Aleksandr Kanıshev ómir boıyna sottalyp ketti, dep habarlaıdy Ulys.

Adam shoshyrlyq qandy oqıǵa 2023 jyldyń qyrkúıek aıynda bolǵan. Sot úkimimen sottalǵan er adam bastapqyda órtten aman qalǵan jalǵyz adam bolyp eseptelgen. Alaıda, medısınalyq saraptama shyqqannan keıin ol kúdiktilerdiń qataryna ótti.

Alapat órtten keıin qylmyskerdiń súıiktisi bolǵan, biraq zańdy nekede turmaǵan 20 jastaǵy Alına Kotáshtyń, onyń bir jasar qyzy Aleksandranyń jáne inisi Savelıanyń denesin eksgýmasıaǵa jiberýge májbúr boldy.

Medısınalyq saraptama nátıjesinde búldirshinder órtke deıin-aq kóz jumǵany dáleldendi. Al jas kelinshek ýly gazǵa ýlanyp kóz jumǵan. Tergeý barysynda prokýror qylmystyq istiń osy nusqasyna turyp aldy. Sot alǵashqyda kúdikti retinde bolǵan Kanıshevti aqtap alǵan. Bul qandy oqıǵadan keıin bir jyldan soń boldy.

Degenmen memlekettik aıyptaýshy sot sheshimine shaǵym túsirdi. Aıyptaýshy tarap súıengen negizgi dálelderdiń biri balalardyń qanynda kómirqyshqyl gazynyń bolmaýy boldy. Buǵan qosa, saraptama kishkentaı qyz balanyń kózi tirisinde bas-mı jaraqatyn alǵanyn anyqtady. Sondyqtan prokýror zardap shekkenderdiń órtke deıin kóz jumǵany tolyqtaı dáleldengen dep sanady.

Uzaqqa barmaı is qaıtadan sot aldynda qaraldy. Bul joly sot ony ómir boıyna bas bostandyǵynan aıyrý týraly úkim shyǵardy. Aleksandr Kanıshevtiń sot úkimine shaǵymdanýyna 15 kún ýaqyt bar.

Shymkent qalalyq sotynda ákimdik ǵımaratynyń aldynda qala ákiminiń orynbasary Rýslan Berdenovke 5 ret oq atyp, jaralady degen aıyp taǵylǵan Ernar Jıembaı sońǵy sóz berildi. Bul týraly kursiv.media jazdy.

Aıyptalýshy Jıembaı qala ákiminiń orynbasary Rýslan Berdenovke oq atqanyna shyn ókinetinin, kinásin ishinara kelisetinin jetkizdi.

Jıembaıdyń sońǵy sózi

«Bul oqıǵa ózdiginen bolmady. Sebepsizden sebepsiz baryp, tıispegen adamǵa qarýymdy alyp qorqytý maqsatynda oq atqan joqpyn. Sot tergeýinde bergen jaýabymdy tolyq qýattaımyn. Jábirlenýshi Rýslan Berdenovten keshirim suraımyn», – dedi ol.

Jıembaıdyń aıtýynsha, jaryssózde Berdenovke kóp suraq qoıýǵa múmkindigi bolmaǵan. Sol sebepti tek keshirim suraýmen shektelgen.

«Qalaı bolsa da men ol kisiniń densaýlyǵyna zıan keltirdim. Jaryssózde onlaın baılanys kezinde ota jasaýǵa keteıin dep turǵan adamǵa artyq sóz aıtpaı, tek keshirim suraýmen boldym. Berdenovtiń «erkek bolsań áıelińdi aralastyrmaýyń kerek edi» dep artyq áńgime aıtyp úlgerdi. Berdenov sottan maǵan eń asa aýyr jazany, Qylmystyq kodekstiń 99-babynyń 2-bóligi 6-tarmaǵymen jaza taǵaıyndaýdy surady. Oǵan qosa bul atylǵan oq tek maǵan emes, memlekettik saıası laýazym ıelerine qarsy atylǵan oq dep isti saıasılandyrý áreketin jasaýda. Ol durys emes», – dedi Jıembaı.

Jıembaıdyń pikirinshe, Berdenov óz ókilettiligin asyra paıdalanyp, áıeline qatysty, jeke basyna, namysyna tıetin sózder aıtyp, balaǵattap, saıası laýazym ıesine laıyqty emes qylyqtarynyń nátıjesinde osy qylmys oryn alǵan.

«Men sottalaıyn dep otyrmyn. Meniń moraldyq shyǵynymdy kim óteıdi. Otbasymdy kim asyraıdy? Men de zardap shegýshi qataryndamyn. Taıaqtyń eki ushy bar ekenin umytpaý kerek. Ernar Jıembaı Rýslan Berdenovti ne úshin atty dep eshkim suraq qoımaıdy. Men áýeli osy istiń saıasılanýyn qalamaımyn. Bul memlekettik qyzmetkerdiń qyzmetine qarsy jasalǵan áreket emes. Ekeýmizdiń aramyzdaǵy jeke másele», – dedi Jıembaı.

Ol sottan «Adam óltirý» babymen jaza taǵaıyndamaýdy surady. Sottan qylmystyq is boıynsha is-áreketin Qylmystyq kodekstiń 106-baby 1-bóligimen qaıta saralap, osy bappen kináli dep tanyp, kináni ishinara moıyndaýyna baılanysty eń tómengi bas bostandyǵynan aıyrmaıtyn jaza taǵaıyndaýdy surady.

«Bul iske shynaıy ókinemin. Syrtta ata-anam qaldy. Ákem aýyrady. Otbasymdy asyraýshylardyń biri edim. Áıelimmen birge eki ulym qaldy. Ótkende úlken ulymnyń týǵan kúni boldy. Balama qandaı syılyq bereıik dese, «Ákemdi qaıtaryńdar» dep jylap jatyr eken. Men osy nárselerdiń bárine ókinip, túsindim. Ýaqytty keri aınaldyrsam, mundaı áreketke barmaıtyn edim. Zań aıasynda ádil jaza taǵaıyndaýyńyzdy suraımyn», – dedi aıyptalýshy.

Sýdıa Ábınur Qarabaev keńesý bolmesine ketti. Ol úkim 20 tamyzda shyǵatynyn habarlady.

Jıembaı adam óltirý pıǵyly bolmaǵan, taǵylǵan aıyptyń bári oıdan shyǵarylǵanyn málimdegen.

«Sottyń ádildigine senemin. Eger 11 jylǵa sottaý kerek bolsa Qylmystyq kodekstiń 106-babymen («Densaýlyqqa qasaqana aýyr zıan keltirý» baby – red.) sottańyzdar. Bala-shaǵam ósip jatyr. Ákem bireýdi óltirýge oqtalǵan eken degenin qalamaımyn. Meıli, basqa bappen 15 jylǵa qamap tastańyzdar. Qarsy emespin. Óıtkeni tikeleı adam óltirýge pıǵylym bolǵan joq», – degen edi jaryssózde Jıembaı.

Jıembaı qamaýda otyrǵanyna 4 aı bolǵan. Sot talqylaýynyń sońǵy otyrysynda onlaın rejımde jaýap bergen jábirlenýshi Rýslan Berdenov Ernar Jıembaıǵa keshirim bermeıtinin málimdegen.

Jaryssózde prokýror sottan aıyptalýshyny 11 jyl 3 aıǵa bas bostandyǵynan aıyrýdy suraǵan. Prokýrordyń aıybymen eki tarap ta kelispegen. 

Astana halyqaralyq áýejaıynda Kamran – Astana reısimen kelgen 30 jastaǵy elorda turǵyny mas kúıinde ushaqta janjal shyǵarǵany úshin qamaýǵa alyndy, dep habarlaıdy Ulys.

Málimetke súıensek, er adam reıs kezinde aıǵaılap, beıádep sózder aıtqan jáne ekıpajdyń zańdy talaptaryna baǵynbaǵan. Oqıǵaǵa baılanysty kóliktegi polısıa qyzmetkerleri ony ushaqtan túsirip, ákimshilik hattama toltyrdy.

Sot qaýlysymen tártip buzýshy 5 táýlikke qamaýǵa alyndy. Sonymen qatar ol qoǵamdyq orynda mas kúıde júrý, spırttik ishimdik ishý jáne áýe kemesindegi tártipti buzǵany úshin ákimshilik jaýapkershilikke tartyldy.

Kóliktegi polısıa departamenti azamattarǵa qoǵamdyq oryndarda, ásirese áýe reısterinde tártip saqtaýdyń mańyzdylyǵyn eskertedi.