Qasym-Jomart Toqaev Ulttyq qurama sportshylarymen kezdesýde Parıjde bastalatyn dúbirli dodany búkil álem asyǵa kútetinin ári oǵan tórtkúl dúnıe túgel kóz tigip otyrǵanyn aıtty. Sonymen qatar úzdikterdiń úzdigi baq synaıtyn baıraqty básekege eń myqty sportshylarymyz bara jatqanyn atap ótip, el namysyn qorǵaý abyroıly mindet ekenine toqtaldy.
– Biz sizderge zor úmit artamyz. Búkil halqymyz – sizderge jankúıer. Jalpy, qazaq sport mektebiniń mártebesi qashanda bıik. Sportshylarymyz árdaıym elge júldemen oralyp júr. Osy dańqty joldy abyroımen jalǵaısyzdar dep senemin. Shyn máninde, sizderdiń jeńisterińiz tutas Qazaqstannyń jeńisi bolmaq. Kók týymyz jelbirese, ultymyzdyń rýhy asqaqtaıdy, – dedi Memleket basshysy.
Prezıdent sportshylarymyzǵa barlyq qajetti jaǵdaı jasalyp jatqanyna toqtaldy.
– Eldi mekenderde arnaıy alańdar salynyp jatyr. Ótken jyldyń ózinde 70-ke jýyq sport ortalyǵy ashyldy. Bıyl taǵy 200-ge jýyq nysan salynady. Barshańyzǵa málim, Ulttyq olımpıada komıtetinde ózgerister boldy. Olımpıada oıyndaryna daıyndyq shtaby quryldy. Tájirıbeli mamandardy shaqyrdyq. Belgili sportshy Gennadıı Golovkın keldi. Ár salada osyndaı óz isiniń naǵyz sheberi bolýǵa tıis. Sonda ǵana nátıje bolady. Biz – sportshylarǵa aıryqsha qurmet kórsetetin elmiz, – dedi Memleket basshysy.
Qazaqstan Prezıdenti sport tarıhynda óshpes iz qaldyrǵan sańlaqtarymyzdyń eńbegi árqashan joǵary baǵalanatynyn jetkizdi.
– Balýan Sholaq, Qajymuqan Muńaıtpasov, Jaqsylyq Úshkempirov, Aleksandr Vınokýrov, Bekzat Sattarhanov, Olga Rypakova atyndaǵy sport nysandary – sonyń aıqyn kórinisi. Sizder de bıik belesti baǵyndyra alasyzdar. Men buǵan kámil senemin. Búgingi jastarymyz sizderge qarap boı túzeıdi. Bul – úlken abyroı, – dedi Qasym-Jomart Toqaev.
Memleket basshysy beıbitshilik jáne yntymaqtastyq saıasatyna elimizdiń qashanda beıildi ekenine nazar aýdardy.
– Ótken aptada Astanada SHYU samıti tabysty uıymdastyryldy. Bul mańyzy zor sharanyń basty maqsaty memleketter men halyqtar arasyndaǵy dıalogty, dostyq pen senimdi nyǵaıtý boldy. Mundaı basymdyqtar kúlli sport álemine de tán. Óıtkeni kez kelgen sport saıysy, eń aldymen, yntymaqtastyqty, alǵa umtylysty jáne adamdardyń birligin kórsetedi. Olımpıada oıyndarynyń qundylyqtary qarapaıym sport jetistikterinen asyp túsedi. Ol – jekelegen sportshylardyń da, tutas memleketterdiń de teńdiginiń, ózara qurmeti men adal básekelestiginiń jarqyn beınesi, – dedi Prezıdent.
Qasym-Jomart Toqaev el namysyn abyroımen qorǵaýda sportshylarǵa jaýapty mısıa júktelgenin aıtyp, olarǵa sáttilik tiledi.
– Bárińiz Olımpıada joldamasyn ıelený úshin kóp kúsh jumsadyńyzdar. Ózderińizdiń asqan sheberlikterińizdi kórsetip, jaqsy nátıjelerge qol jetkizetinderińizge senimdimin. Sizderge barsha Qazaqstan halqy qoldaý kórsetedi. Árıne, chempıon bolý ońaı emes. Qazaqta «Namysqa shapsań – alysqa shabasyń» degen sóz bar. Sondyqtan jeńimpaz bolasyzdar dep senemin, – dedi Memleket basshysy.
Prezıdent Qazaqstan Respýblıkasynyń Memlekettik týyn Ulttyq quramanyń kapıtany Aslanbek Shymbergenovke tabystady.
Qazaqstan qurama komandasynyń negizgi bóligi kezdesýge Almaty oblysyndaǵy «Aqbulaq» olımpıadalyq ortalyǵynan telekópir arqyly qatysty. Onda sportshylar Parıj Olımpıadasy aldyndaǵy sońǵy jattyǵý jıyndaryn ótkizip jatyr.
İs-sharada bokstan álem chempıony Aslanbek Shymbergenov, jeńil atletıkadan Azıa oıyndarynyń jeńimpazy Olga Safronova, dzúdodan Olımpıada oıyndarynyń júldegeri Eldos Smetov sóz sóıledi.
Aıta keteıik, buǵan deıin qazaq sportshylary Olımpıadada qandaı sport túrlerinen synǵa túsetinin jazǵan edik.
Sondaı-aq, Olımpıada oıyndaryna eń kóp joldamany elimizdegi qaı óńirdiń sportshylary jeńip alǵany belgili boldy.
