Qazaqstan Prezıdenti Qasym-Jomart Toqaev 14-15 sáýir kúnderi alǵashqy memlekettik saparmen baýyrlas Ózbekstan Respýblıkasyna barady.
Prezıdenttiń baspasóz hatshysy Berik Ýálıdiń feısbýk paraqshasynda jaıalaǵan habarlandyrýyna qaraǵanda, kelissóz barysynda Memleket basshysy Qasym-Jomart Toqaev Ózbekstan Prezıdenti Shavkat Mırzıóevpen saýda-ekonomıkalyq, áleýmettik-gýmanıtarlyq jáne kólik-tranzıttik salalardaǵy yntymaqtastyqty odan ári nyǵaıtýǵa baǵyttalǵan ekijaqty yqpaldastyqtyń ózekti máselelerin, sondaı-aq, óńirlik jáne halyqaralyq kún tártibindegi basty taqyryptardy talqylaıdy. Sonymen qatar, birqatar mańyzdy qujattarǵa qol qoıylý josparlanypty. Budan soń Q.Toqaev pen Sh.Mırzıóev Ózbekstandaǵy Qazaqstan jylynyń saltanatty ashylý rásimine qatysady.
Rasynda da, sońǵy jyldary Qazaqstan men Ózbekstan arasyndaǵy baılanys kúsheıip keledi. Bul jerde Elbasy Nursultan Nazarbaev pen baýyrlas eldiń qazirgi basshysy Shavkat Mırzıeevtiń úlesi zor. Ol Islam Kárimov tusyndaǵy biraz olqylyqtardy ońaltý úshin úlken qajyr jumsaýda. Byltyr Qazaqstanda Ózbekstan jyly joǵary deńgeıde ótkizildi. Endi mine, bıyl Ózbekstanda Qazaqstan jyly bastalady. Mádenı-rýhanı saladaǵy mundaı baılanystar da birligimizdi bekemdeı túseri anyq. Sonymen qatar, Ortalyq Azıadaǵy irgeli eki el aımaqtaǵy ıntegrasıaǵa da jańa serpin berdi. Atap aıtqanda, byltyr alǵash ret Astanada Ortalyq Azıa elderi basshylarynyń konsýltatıvtik jumys kezdesýi ótken bolatyn. Ortaq mereke Naýryz qarsańynda uıymdastyrylǵan mańyzdy jıynǵa sol kezdegi Qazaqstan basshysy Nursultan Nazarbaev, Qyrǵyz Respýblıkasynyń Prezıdenti Sooronbaı Jeenbekov, Tájikstan Respýblıkasynyń Prezıdenti Emomalı Rahmon, Ózbekstan Respýblıkasynyń Prezıdenti Shavkat Mırzıóev pen Túrikmenstan Medjlısiniń tóraıymy Akdja Nurberdyeva qatysqan bolatyn. Túrkimenstan basshysy Gýrbangýly Berdimuhammedov jıynǵa kele almasa da, ornyna májilis spıkerin jiberdi. Ala atalǵan kezdesý osy aıda Ózbekstannyń astanasynda taǵy da ótýi tıis. Jalpy Qasym-Jomart Toqaevtyń bul sapary baýyrlastyq baılanysty tipti bekemdeı túserine senim mol.