Prezıdent Qasym-Jomart Toqaev Reseı Federasıasy Úkimetiniń tóraǵasy Mıhaıl Mıshýstınmen kezdesti, dep habarlaıdy Aqorda.

Memleket basshysy «Aqorda» rezıdensıasynda Eýrazıalyq úkimetaralyq keńeske jáne Digital Almaty 2025 sıfrlyq forýmyna qatysý úshin Qazaqstanǵa kelgen Reseıdiń Premer-mınıstri Mıhaıl Mıshýstınmen kezdesý ótkizdi.

Kezdesýde eki eldiń strategıalyq seriktestigin damytý perspektıvasy talqylanyp, saýda-ekonomıkalyq, ınvestısıalyq yntymaqtastyqty, sonyń ishinde Eýrazıalyq ekonomıkalyq odaq aıasyndaǵy qarym-qatynasty jandandyrýǵa basa nazar aýdaryldy.

Qasym-Jomart Toqaev eki el arasyndaǵy dostyq pen tatý kórshilikti nyǵaıtýǵa Mıhaıl Mıshýstınniń qosqan úlesin joǵary baǵalady. Sonymen qatar Reseı Federasıasynyń Prezıdenti Vladımır Pýtınniń byltyr 27 qarashada Astanaǵa jasaǵan memlekettik sapary kezinde qol jetkizilgen ýaǵdalastyqtardy júzege asyrýdyń ózekti ekenin atap ótti.

– Elderimizdiń arasyndaǵy baılanys bekı tústi. Bul memleketaralyq yntymaqtastyqtyń barlyq salasyn qamtıdy. Sizdiń Astanaǵa jasaǵan saparyńyzdy joǵary deńgeıde qol jetkizilgen ýaǵdalastyqtardy iske asyrýdyń mańyzdy kezeńi retinde qarastyramyz. Vladımır Pýtınniń Qazaqstanǵa jasaǵan sapary barysynda Ýfada óńiraralyq forým tabysty ótti. Bıyl biz kezekti forýmdy Qazaqstan aýmaǵynda, ıaǵnı Oral qalasynda uıymdastyrýdy josparlap otyrmyz. Yntymaqtastyqtyń osy formaty nátıjeli bolady dep oılaımyn, – dedi Prezıdent.

Mıhaıl Mıshýstın memleketter basshylary alǵa qoıǵan mindetterdi naqty iske asyrýǵa daıyn ekenin málimdedi.

– Oraıly sátti paıdalana otyryp, Reseı Prezıdenti Vladımır Pýtınniń ystyq yqylasyn jetkizgim keledi. Vladımır Vladımırovıch byltyr qarasha aıynda Qazaqstanǵa tarıhı memlekettik sapar jasady deýge bolady. Qasym-Jomart Kemeluly, Siz de jeltoqsan aıynda Reseıdiń Sankt-Peterbýrg qalasyna keldińiz. Biz úshin óńiraralyq forýmnyń bereri mol. Reseıdiń aımaqtary Qazaqstannyń kóptegen oblysymen tikeleı baılanys ornatqan. Ózińiz atap ótkendeı, bul formattyń mańyzy zor, onyń tıimdiligin arttyrýǵa barynsha qoldaý kórsetemiz. Qazaqstan – Reseı Federasıasynyń kórshisi ári odaqtasy. Bizdiń qarym-qatynasymyz dostyq pen ózara qurmetke negizdelgen, – dedi Reseı Úkimetiniń tóraǵasy.

Mıhaıl Mıshýstın Qasym-Jomart Toqaevqa eki eldiń úkimettik delegasıalary arasynda júrgizilgen kelissózderdiń nátıjesi týraly aqparat berip, kún tártibiniń barlyq spektri boıynsha qol jetkizilgen ýaǵdalastyqtardyń ózara tıimdi yqpaldastyqty odan ári nyǵaıtýǵa qyzmet etetinine toqtaldy.

Kezdesýde energetıka, ónerkásip, kólik ınfraqurylymy, aýyl sharýashylyǵy jáne basqa da salalardaǵy birlesken jobalardy júzege asyrýǵa basa nazar aýdaryldy. Sonymen qatar ǵylymı-tehnıkalyq jáne mádenı-gýmanıtarlyq yntymaqtastyqtyń ózekti máseleleri talqylandy.

Memleket basshysy Reseı Prezıdentiniń Máskeýdegi Jeńistiń 80 jyldyǵyna arnalǵan merekelik is-sharaǵa shaqyrýyn qabyl alǵanyn aıtty.