QR Prezıdenti Qasym-Jomart Toqaevtyń tóraǵalyǵymen Ortalyq Azıa memleketteri basshylarynyń VI Konsýltatıvtik kezdesýi ótti, dep habarlaıdy Ulys Aqordaǵa silteme jasap.

«Birlesken kúsh-jigerdiń arqasynda jyldar boıy qordalanǵan máseleler sheshilip jatyr. Aımaqtyń turaqtylyǵy men qaýipsizdigin qamtamasyz etý úshin keshendi sharalar qabyldanýda. Shekara, sýmen qamtamasyz etý, mıgrasıa máseleleri josparly túrde rettelip, ózara saýdadaǵy kóptegen kedergiler joıyldy. Shekaradaǵy ótkizý pýnktteri jańǵyrtylyp jatyr. Kólik qatynasynyń múmkindikteri keńeıip, jańa baǵyttar ashylýda. Saýda-ekonomıkalyq jáne ınvestısıalyq yqpaldastyq qarqyndy damyp keledi», – dedi Memleket basshysy.

Prezıdenttiń aıtýynsha, mádenı-gýmanıtarlyq baılanys mazmundyq turǵydan tolyqtyrylýda. Memleket basshysy mádenıet kúnderi, qolóner sheberleriniń kórmesi, ulttyq taǵam festıválderi, jastar forýmdary men basqa da is-sharalar turaqty túrde ótkizilip kele jatqanyna nazar aýdardy.

«Ótken jyldar ishinde Konsýltatıvtik kezdesýler aımaqtyń halyqaralyq sýbektiligi men birligin tanytatyn, sondaı-aq qazirgi syn-qaterlerge tótep berýge daıyndyǵyn kórsetetin tıimdi alańǵa aınalǵanyn senimdi túrde aıta alamyn. Ortalyq Azıa qashanda biregeı órkenıetter toǵysqan aımaq bolǵan. Onyń jalpy álemdik progreste atqaratyn róli zor. Búginde ortaq tarıhymyz ben halyqtarymyzdyń dúnıetanymynyń uqsastyǵyna arqa súıep, Ortalyq Azıanyń jańa kelbetin qalyptastyramyz. Ony keleshekke umtylatyn ári mol múmkindikter mekeni retinde tanytamyz. Bul samıt osy joldaǵy mańyzdy beleske aınalatynyna senimdimin», – dedi Prezıdent.

Qasym-Jomart Toqaev memleketter basshylary aımaqtyq yntymaqtastyqty, sonyń ishinde Konsýltatıvtik kezdesýler formatyn damytý úshin barynsha kúsh-jiger jumsap otyrǵanyn jetkizdi.

Qazaqstannyń tóraǵalyǵy aıasynda qaýipsizdik pen ekonomıkalyq seriktestikti nyǵaıtýǵa, qoǵamdaǵy áıelderdiń rólin kúsheıtýge, saraptamalyq turǵydan yqpaldastyqty keńeıtýge baǵyttalǵan kóptegen birlesken is-shara uıymdastyryldy.

«Osy jıynda 2027 jylǵa deıingi Aımaqtyq yntymaqtasty damytýdyń jol kartasy bekitiledi. Bul ózara yqpaldastyq tetikterin jetildirý turǵysynan aıtýly oqıǵa bolmaq. Atalǵan qujat úkimetterdiń úılesimdi jumysyn jetildiredi jáne osy alańda usynylǵan bastamalardyń oryndalý barysyna baqylaýdy kúsheıtedi. Buǵan qosa «Ortalyq Azıa – 2040» óńirlik kooperasıasyn damytýǵa baǵyttalǵan taǵy bir mańyzdy qujatqa qol qoıylady. Osy jáne ózge de sharalar halyqtarymyzdyń ıgiligi jolyndaǵy jan-jaqty aımaqtyq yqpaldastyqqa bárimizdiń beıildi ekenimizdi kórsetedi», – dedi Qazaqstan Prezıdenti.

Qasym-Jomart Toqaev qazirgideı kúrdeli geosaıası jáne ekonomıkalyq jaǵdaıda aımaqtaǵy yntymaqtastyqtyń joǵary damý qarqynyn saqtaý óte mańyzdy dep sanaıdy. Osy oraıda Memleket basshysy Ortalyq Azıanyń órkendeýine yqpal etetin birqatar ózekti mindetke toqtaldy.

«Búgingi tańda halyqaralyq qatynastar júıesiniń irgeli negizderi ózgeriske ushyraǵanyn baıqap otyrmyz. Bul – qaýipti qubylys. Mundaı jaǵdaıda aımaqtaǵy beıbitshilik pen turaqtylyqty saqtaý eń basty mindet ekeni esten shyqpaýǵa tıis. Qazirgi syn-qaterlerdi tek saıası dıalog pen memleketterimiz arasynda ózara senim sharalaryn nyǵaıtý arqyly eńserýge bolatyny anyq. Osy rette sońǵy jyldary bir-birimizge jasaǵan saparlarymyz nátıjeli boldy. Bul elderimizdiń dostyqqa, tatý kórshilik qarym-qatynasqa jáne odaqtastyqqa negizdelgen óńirlik yntymaqtastyǵynyń deńgeıi joǵary ekenin bildiredi. Alaıda óńirlik kooperasıa aıasynda syrtqy seriktestermen jan-jaqty baılanysty josparly túrde kúsheıtý mańyzdy. Álemniń jetekshi elderiniń «Ortalyq Azıa plús» formatyna qyzyǵýshylyq tanytýy – osynyń aıǵaǵy», – dedi Memleket basshysy.

Jıyn sońynda Memleket basshysy Ózbekstan Prezıdenti Shavkat Mırzıóevke Konsýltatıvtik kezdesýdiń kelesi tóraǵalyq mindetin tabysty atqarýyna tilektestik bildirdi

Memleket basshysy Qasym-Jomart Toqaev Samarqandta Ózbekstan prezıdenti Shavkat Mırzıóevpen kezdesti. Bul týraly Aqordanyń baspasóz qyzmeti habarlaıdy.

Kezdesý barysynda Qasym-Jomart Toqaev «Ortalyq Azıa – Eýropa Odaǵy» samıtine erekshe mán beretinin jetkizip, atalǵan jıyn aımaq elderiniń Eýropa Odaǵymen dıalogyn ilgeriletýge yqpal etetinine senim bildirdi.

Prezıdentter Almatydaǵy beıresmı kezdesýdiń nátıjeli ótkenine nazar aýdardy. Sondaı-aq onyń qazaq-ózbek qatynastaryn taǵy bir pysyqtap, birlesken jumys baǵyttaryn aıqyndaýǵa múmkindik bergenine toqtaldy.

Memleketter basshylary Qazaqstan men Ózbekstan yntymaqtastyǵy qarqyndy damyp kele jatqanyn atap ótip, ekijaqty baılanystardyń barlyq baǵyty boıynsha ózara tıimdi seriktestik aıasyn keńeıtý nıetin rastady.

Memleket basshysy Túrikmenstan Prezıdentimen kezdesti, dep habarlaıdy Aqorda.