Úkimettiń jalpy otyrysynda QR Prezıdenti Astanadaǵy kólik keptelesine nazar aýdardy, dep habarlaıdy Ulys.
Aıta keteıik, búgin qala ákimi Jeńis Qasymbek prezıdenttiń aldynda esep bergen. Ony tyńdaǵannan keıin Toqaev ákimniń jumysyna qatysty pikir bildirdi.
«Qala ákiminiń tájirıbesi bar, jaqsy jumys istep jatyr. Keptelis máselesin sheshý kerek. Bul baǵytta tez arada shara qabyldap, máseleni sheshý kerek», - dedi Toqaev.
Memleket basshysy Qasym-Jomart Toqaev Úkimettiń jalpy otyrysynda áleýmettik kómekti naqty ıesine jetkizý jaıly aıtty, dep habarlaıdy Azattyq Rýhy.
«Taǵy bir másele – memleket tarapynan beriletin áleýmettik kómektiń naqty ıesine jetýi. Kómek shyn muqtaj adamdarǵa berilýge tıis ekeni qanshama ret aıtyldy. Qazaqstan – shyn máninde áleýmettik memleket. Biraq bul – azamattarymyzdyń, ásirese, óskeleń urpaqtyń eńbek etýge yntasyn azaıtyp, olardy masyldyqqa úıretý degen sóz emes», - dedi Toqaev úkimettiń keńeıtilgen otyrysynda.
Prezıdenttiń aıtýynsha, Qazaqstanǵa kórshi elderden júz myńdaǵan eńbek mıgranty jumys izdep kelip jatyr.
«Olardyń bul áreketin qurmetke laıyq deýge bolady. Sebebi olar otbasyna nápaqa tabý úshin jumys istegisi keledi. Úkimet áleýmettik kómek máselesine kelgende tym saqtyq tanytýda. Desek te, naqty usynystar men ony sheshý joldaryn qaraý qajet. Taǵy bir mańyzdy mindet – turǵyn úı qoryn basqarý júıesin jappaı reformalaý. Qala qurylysyn josparlaýdan bastap, nysandardy paıdalanýǵa berýge deıingi barlyq úderisti sıfrlyq formatqa tolyq kóshirý qajet. Biryńǵaı aqparat júıesin jyl sońyna deıin ázirleý kerek», - dedi Toqaev.
Prezıdent byltyr turǵyn úı qurylysy boıynsha rekordtyq kórsetkishke (19 mln. sharshy metr) qol jetkizilgenin aıtty.
«Bul – óte jaqsy. Biraq turǵyn úıdiń sanyna emes, sapasyna jáne onyń qoljetimdi bolýyna basa nazar aýdarǵan jón», - dedi ol.
Premer-mınıstr Oljas Bektenov turǵyn úı qurylysyn odan ári damytý jáne baspana qoljetimdiligin arttyrý máseleleri boıynsha keńes ótkizdi. Bul týraly Úkimettiń baspasóz qyzmeti habarlady.
Memleket basshysynyń Ana tili gazetine bergen suhbatynda aıtqan tapsyrmalaryn oryndaý boıynsha jumys barysy qaraldy. Keńeske Ónerkásip jáne qurylys, Ulttyq ekonomıka, Qarjy mınıstrlikteriniń, «Otbasy bank» AQ, «Samuryq-Qazyna» UÁQ» AQ, «Báıterek» UBH» AQ basshylyǵy qatysty.
«Otbasy bankin» damý ınstıtýtyna aınaldyrý jáne salany odan ári damytý úshin jeke qarajatty tartý jónindegi jumysty jandandyrý tásilderi, sondaı-aq jeńildikti baǵdarlamalardy qarjylandyrý, onyń ishinde ónerkásip kásiporyndary qyzmetkerlerin qoldaý jáne jańa ónimderdi shyǵarý boıynsha usynystar talqylandy. Búginde «Qarajanbasmunaı», «Shubarkól kómir», «Eýroazıattyq energetıkalyq korporasıa», «SSKÓB», «Qazhrom» TUK», «Qazaqstan alúmınıi», «Qazaqstan elektrolız zaýyty» sıaqty iri kásiporyndar jáne basqa da uıymdarmen jumysshy kásip mamandary otbasylarynyń turmysyn jaqsartý jumystary bastaldy.
Premer-mınıstr Jumysshy mamandyqtary jyly aıasynda tehnıkalyq mamandarǵa arnalǵan ıpotekalyq jáne jalǵa beriletin jeńildikti turǵyn úı baǵdarlamasyn keńeıtý qajettigin atap ótti. Banktiń transformasıasy onyń «bir tereze» qaǵıdaty boıynsha muqtaj azamattardy baspanamen qamtamasyz etý jumysyn kúsheıtýge jáne jalpy alǵanda elimizdiń ekonomıkasyn damytýǵa baǵyttalǵan.
Ónerkásip jáne qurylys mınıstrliginiń derekteri boıynsha, 2024 jyldyń qorytyndysynda Qazaqstanda rekordtyq 18,9 mln sharshy metr turǵyn úı paıdalanýǵa berildi, bul ótken jylmen salystyrǵanda 6,4%-ǵa artyq. Salanyń naqty kólem ındeksi bir jylda 113,1%-dy qurady. 2029 jylǵa qaraı 111 mln sharshy metrge jetkizý jónindegi Prezıdent qoıǵan mindetterdi oryndaý boıynsha jumys júrgizilýde.
Memlekettik qoldaý sharalary sheńberinde azamattarǵa jalǵa beriletin, nesıelik baspanamen qamtamasyz etýi, «2-10-20», «5-10-20» jáne basqa da baǵdarlamalar iske asyrylýda. 2024 jyly «Otbasy banki» 1,29 trln teńge somasynda 71 452 nesıe berdi, onyń 39,8%-y bastapqy turǵyn úı satyp alýǵa arnalǵan. «Otaý» jáne «Naýryz» baǵdarlamalary boıynsha jalpy 251,9 mlrd teńgege 10 003 qaryz berildi.
Búgin úkimettiń keńeıtilgen otyrysynda qorytyndy sóz sóılep jatqan prezıdent Qasym-Jomart Toqaev úkimetti artyq shyǵyndardan bas tartýǵa shaqyrdy, dep habarlaıdy Ulys
Toqaev sóz basynda eldegi reformalardyń naqty baǵyty men ony júzege asyrý joldary týraly osyǵan deıin de aıtqanyn eske saldy.
«Úkimet el ekonomıkasyn turalap qalýdan saqtap, ornyqty damýdy qamtamasyz etý úshin kúrdeli sheshimder qabyldaýy kerek jáne eń bastysy sol sheshimderdi iske asyrýǵa tıis. Bul – joǵary bilikti ári jaýapkershilik alýǵa daıyn memlekettik qyzmetshilerdiń qolynan keletin jumys. Álemdik tájirıbege qarasaq, memlekettik apparattyń tıimdiligi osyndaı kúrdeli kezeńderde aıqyn kórinedi. Úkimet qanshalyqty qıyn bolsa da, jappaı únemdeýge kóship, búdjet qarjysyn tek qana asa ózekti máselelerdi sheshýge jumsaýy kerek. Kórpege qaraı kósiletin ýaqyt keldi. Orynsyz shyǵyndy toqtatyp, aıaǵymyzdy tartyp basý qajet», - dedi Toqaev sóz basynda.
