Reseılik telejýrnalıst Tına Kandelakı áleýmettik jelidegi paraqshasynda Qazaqstanda birneshe temirjol stansasynyń ataýy ózgerýin orys tiliniń aıasyn taryltý dep pikir bildirgen bolatyn. Bul jelide qazaqstandyqtardyń ashý-yzasyn týǵyzdy.
Buǵan Syrtqy ister mınıstrliginiń resmı ókili Aıbek Smadıarov pikir bildirdi.
«Kórshi eldegi azamattar, óz dostarymyzdyń bizdiń el týraly beıhabar ekeni adamdy kishkene ókpeletedi. Óıtkeni olardyń biz týraly aqparaty durys emes. Bizdiń elge kelip qalaı ómir súrip jatqanymyzdy óz kózimen kórsin. Oıdan shyǵaryp jaza bergenshe, áleýmettik jelide qyrylysqansha odan da ózimizdiń jumysymyzdy odan ári qaraı jalǵastyraıyq», — dedi SİM resmı ókili.
Sonymen qatar Aıbek Smadıarov Tına Kandelakıdiń Qazaqstanǵa kire almaıtynyn aıtty.
Keıin reseılik jýrnalıs óziniń Telegram paraqshasynda Syrtqy ister mınıstrliginiń resmı ókili Aıbek Smadıarovty reseıge shaqyrdy, oǵan qarata jazba qaldyrdy
«Qurmetti Aıbek Serikbaıuly! Sizdiń men týraly aıtqanyńyz týraly oqydym. Men bizdiń qarym-qatynasymyzdy jalǵastyrǵym keledi, sizdi Reseıge shaqyramyn. Bizdiń halqymyzdy kóp nárseni biriktiretinine senimdimin. Endi bul týraly tolyǵyraq aıtyp ótsem:
Árıne, áńgimeni meniń otanym Máskeýde Abaı Qunanbaev eskertkishi turǵan Chıstoprýdnyı býlvardan bastaý kerek dep oılaımyn. Sizderge, barlyq qazaqtarǵa ol jaı Abaı degen atpen tanymal. Al bizge — orys tili men mádenıetin bilý álemniń qazynasynyń kilti ekenin aıtqan adam retinde tanymal.
Endi Máskeý oblysyndaǵy, ǵylymı elıta qalasy Zelenogradqa kósheıik. Onyń tujyrymdamasyn taǵy bir ataqty qazaq — sáýletshi Totan Kúzembaev ázirledi. Reseıde ol sáýlet óneriniń alǵashqylary bolyp sanalady. Onyń jumysy «Nıkola-Lenıvse» fılminde tur. Sáýletshiniń jobalaǵan úıleri ártúrli elderde bar. Bul orys mádenıetine engen talanttyń dáleli emes pe? Bıylǵy jazda Shýsev atyndaǵy sáýlet murajaıynda kórme osy kisige arnaldy. Sonymen qatar Máskeýde eń tanymal ártisterdiń qatarynda qazaqtar: Azamat Musaǵalıev pen Nurlan Sabýrov bar ekenin aıta ketý qajet,- dedi Tına Kandelakı.
