Telejúrgizýshi Dana Nurjigit turmystyq zorlyq-zombylyqqa ushyraǵan
Telejúrgizýshi Dana Nurjigit áleýmettik jelidegi paraqshasynda turmystyq zorlyq-zombylyqqa tap bolǵanyn aıtty, dep habarlaıdy Ulys.
«Áıelderge qarsy zorlyq-zombylyq taqyryby meniń jeke basymdy da aınalyp ótpedi. Jábirlenýshiniń ornynda bolyp, sot zalynda turamyn degendi kim bilgen? Qıyndyq kimde joq? Men de moıymaı, «bastysy densaýlyǵym men kásibimnen aıyrmasyn» deýshi edim. Alaıda moraldyq-psıhologıalyq qysym aldymen densaýlyǵyma kesirin tıgizdi, sodan soń TV efırde jumys isteı almaıtyn jaǵdaıǵa jetkizdi. Basshyǵa ózim baryp, jumystan ketemin dep sheshtim sol kezde. Óıtkeni túske deıin tergeýshiniń aldynda, tústen keıin kameraǵa, tikeleı efırde jumys isteýge jaramaı qaldym», - dep jazdy telejúrgizýshi.
Telejúrgizýshi ekinshi nekesi sátsiz aıaqtalǵanyn aıtty.
«Ekinshi nekem baıansyz bolyp, toǵyspaıtyn jerden M.Á. esimdi azamatpen mámilege kelip, adamsha eki jaqqa ketýdiń ornyna, is nasyrǵa shaýyp, jabyq esik jaǵdaıyndaǵy sot prosesine deıin jetti. Eki jarym jyl buryn zańdy túrde ajyrasqan edik. Sodan soń 10 aıǵa jýyq meniń talabym boıynsha onyń ústinen qozǵalǵan qylmystyq istiń tergeý prosesinen óttim. Sońǵy núktesi 28 mamyrda qoıyldy. Úkim 13 maýsym kúni kúshine endi. İstiń mán-jaıyn ashpaýǵa proseske qatysqandar qolhat berdik. Sondyqtan artyq suraq qoımańyzdar», - dedi ol.
Telejúrgizýshi bul oqıǵa ózine sabaq bolǵanyn aıtady. Osy jaǵdaıda balasynyń ákesi Vladımır (Vladımır Rerıh – avt.) de oǵan qorǵan bolýǵa tyrysqanyn atap ótti.
«Men ózimniń taza, adal, rýhanı ortada ósip-ónip, ómir súrip jatqanymdy kórdim. «Qolda bar altynnyń qadirin bil» degen shyǵar maǵan. Jer ortasyna kelgende Qudaı Taǵala «aıdyń arǵy betindegi túnektiń» qandaı bolatynyn kórsetti maǵan. Kórdim de shoshydym. Kúrestim. Adal atym úshin, ádilet úshin, balam úshin... Áıelderge qarsy zorlyq-zombylyq taqyryby – adam quqyǵy taqyryby. Men ózimniń adam retindegi quqyǵymdy qorǵadym. Bul jolda qanshama kedergilerden ótý kerek ekenin kórdim. Kózim jetti. Advokattaryma erekshe alǵys aıtamyn. Birlik pen biliktilik arqasynda bir komanda bolyp jumys istedik. Endigi jerde meniń jazatyn, aıtatyn, buqara saýatyn ashatyn mamandarmen bolatyn suhbattarymnyń taqyryby osy máselelerge de arnalady. Qapasta júrgen áıelderge aıtarym: qyspaqta ustaǵysy kelgen erkek tek ashyqtyqtan qorqady. Batyl bolyńyzdar! Meni de «Uıat bolady, óz artyńdy óziń ashasyń ba?»dep ustaǵysy keldi. Bul –qylmyskerdiń ádisi. Senbeńizder! Zań! Tek qana zańǵa júginińiz! Iá uzaq jol, ıá bul kúres! Biraq... Barlyǵy aıaqtalǵan soń Álimniń aıtqany janymdy jubatty. «Balam, men osy oqıǵada bir kinám bolsa, seniń aldyńda kinálimin» dedim. On úsh jastaǵy balamnyń aıtqany: «Mama, ózińizdi kinálaı bermeńiz, siz baqytty bolamyz dep oıladyńyz ǵoı», - dedi Dana.