Táýelsizdik kúnine oraı Jetisýda densaýlyq saqtaý, mádenıet jáne sport salalarynda jalpy sany 5 jańa nysan ashyldy, - dep habarlaıdy Jetisý oblysy ákiminiń baspasóz qyzmeti.
Atap aıtqanda, Qaratal aýdanynyń Ortatóbe jáne Qanabek aýyldarynda feldsherlik-akýsherlik pýnkt, Tastóbe aýylynda mádenıet úıi, Qarajıde aýylynda sport kesheni ashyldy. Mundaı nysandar atalǵan eldi mekenderde buǵan deıin bolmaǵan. Sondyqtan jańa ǵımarattardyń ashylýy turǵyndardyń ómir súrý sapasyn jaqsartýǵa baǵyttalǵan ıgi qadamdardyń biri deýge bolady. Bul qýanyshty jańalyqqa oraı aýyl turǵyndary pikir bildirdi.
- Aýylymyzda feldsherlik-akýsherlik pýnkttiń ashylǵanyna óte qýanyshtymyn. Buryn tolyqqandy em alý úshin kórshi aýylǵa barýǵa májbúr bolatynbyz. Óıtkeni bizde eski ǵımaratta otyrǵan medısınalyq pýnkt qana boldy. Endi qajetti sapaly medısınalyq kómekti óz aýylymyzdan ala alamyz. Bul - biz úshin úlken jeńildik, jaqsy jańalyq, - dedi Qanabek aýylynyń turǵyny Dılnar Búırekbaı.
Al sport kesheniniń jastar úshin jańa múmkindikterge jol ashatynyn qarajıdelikter qýana jetkizdi.
- Búgin jańa sport kesheni ashylyp otyr. Buryn aýylymyzda mundaı nysan bolmaǵan. Endi balalarymyz ben nemerelerimiz osy sport kesheninde sport túrlerinen jattyǵyp, densaýlyqtaryn shyńdaýǵa múmkindik aldy. Osyndaı ıgi isti júzege asyrǵan barsha azamattarǵa alǵys aıtamyn, - deıdi Qarajıde aýylynyń turǵyny Aqpar Ábırov.
Qýanyshty jańalyq Kóksý aýdanyna da jetip, munda Boztoǵan aýylynda 150 oryndyq mádenıet úıi ashyldy. Nysannyń qurylysy ótken jyldyń kókteminde bastalǵan bolatyn. Buǵan deıin 1100-den astam turǵyny bar bul eldi mekende mundaı mádenı oshaq bolmaǵan, al balalarǵa arnalǵan barlyq úıirme sabaqtary jergilikti mektep ǵımaratynda ótkizilip kelgen.
Oblystyq mádenıet, arhıvter jáne qujattama basqarmasynyń basshysy Qýanysh Súleımenovtiń aıtýynsha, jańa mádenıet úıi aýyl jastary úshin mańyzdy damý ortalyǵyna aınalady:
– Mundaı nysandar – jaı ǵana ǵımarat emes, talanttardy damytýǵa, dástúrdi saqtaýǵa, rýhanı qundylyqtardy nyǵaıtýǵa arnalǵan keńistik. Boztoǵan aýylyndaǵy mádenıet úıi jastar úshin rýhanı damý ortalyǵyna aınalatynyna senimdimin. Munda úıirmeler, shyǵarmashylyq stýdıalar jumys istep, konsertter, kezdesýler men merekelik sharalar ótetin bolady. Aýyl úshin bul – mádenı ómirdiń jańa paraǵy, – dedi ol.
Jergilikti turǵyn Darıǵa Jamanbalanova da qýanyshyn bólisti:
– Biz bul kúndi uzaq kúttik. Qurylysqa kúsh-jigeri men qarajatyn salǵan barsha azamattarǵa alǵysymyz sheksiz. Endi balalarymyz úıdiń qasynda mýzykamen, bımen aınalysyp, ónerin shyńdaıtyn bolady. Bul – jastarymyzdyń bolashaǵyna jasalǵan mańyzdy ınvestısıa, – dedi ol shynaıy rızashylyǵyn bildirip.
