Túrkıanyń elordasy Ankara qalasynda Qazaqstan Respýblıkasynyń
Táýelsizdik kúni toılandy. Baýyrlas memlekettegi Elshiligimizdiń
feısbýktegi resmı paraqshasy taratqan málimetterge qaraǵanda, shara
joǵary deńgeıde ótken.
Qazaqstannyń Túrkıadaǵy Elshiliginiń uıymdastyrýymen ótken resmı
qabyldaýǵa Túrkıa Respýblıkasy atynan bas qonaq retinde Túrkıa Uly
Ulttyq májilisi tóraǵasy profesor Mustafa Shentop pen baýyrlas eldiń
bir top zıalysy men atqaminerleri qatysqan. Atap aıtqanda, Túrkıa
Prezıdentiniń Bas keńesshisi Ialchyn Topchý, Kólik Vıse-mınıstrleri Ó.
Fatıh Saıan jáne S.Dýrsýn, Otbasy, eńbek jáne áleýmettik qyzmetter Vıse-
mınıstri Aıshe Ergezen, Energetıka jáne tabıǵı resýrstar Vıse-mınıstri
Alparslan Baıraktar, Saýda Vıse-mınıstri Sezaı Ýcharmak, Ankara
gýbernatory Vasıp Shahın, Eskıshehır gýbernatory Ózdemır Chakadjak,
Ankara meri Mansýr Iavash, burynǵy Májilis tóraǵasy Djemıl Chıchek,
Qazaqstan-Túrkıa parlamentaralyq dostyq tobynyń tóraǵasy, Mehmet Alı
Djevherı, Túrkıa májilisi depýtattary, birqatar ýnıversıtet rektorlary,
aýdan ákimderi, partıalardyń basshylary, burynǵy mınıstrler, Elshiler,
Halyqaralyq uıym basshylary, Túrki keńesi Bas hatshysy Baǵdat Ámreev,
Qazaqstannyń qurmetti konsýldary, ınvestorlar, dıplomatıalyq mısıa,
zıaly qaýym, isker top, dıaspora men BAQ ókilderi, qazaqstandyq
tálimgerler jáne qonaqtar qatysty.
Resmı qabyldaý aldynda qonaqtar Qazaqstannan arnaıy jetkizilgen
«Kazbeef» markaly ettiń dámin tatty. Ony túriktiń áıgili azpazshysy,
«ScarlEt Steakhouse» ıesi Súleımen Dılek ózi daıyndap, qonaqtarǵa usyndy.
Alqaly qabyldaýdyń betashar sózin sóılegen Qazaqstannyń Túrkıadaǵy
Elshisi Abzal Saparbekuly eń basty mereke — Táýelsizdik kúnimen jınalǵan
qaýymdy quttyqtady. Egemendigimizdiń 28 jylynda Qazaqstannyń jetken
jetistikterine toqtalǵan ol baýyrlas Túrkıanyń árdaıym kórsetken
qoldaýyn atap ótti. Elimizdegi saıası reformalardy tilge tıek etken Elshisi
Elbasy Nursultan Nazarbaevqa Túrkıa Prezıdenti Rejep Taıyp
Erdoǵannyń bastamasymen Túrki Keńesiniń qurmetti tóraǵasy ataǵy
berilgenin eske saldy. Prezıdentimiz Qasym-Jomart Toqaevtyń qoǵamnyń
demokratıalyq quqyqtary men qaýipsizdigin saqtaý, halyqpen tıimdi
baılanys ornatý, saıası reformalar, ulttyq kodty qalyptastyrý
jumystaryn jalǵastyrý, kóp vektorly jáne teńgerimdi syrtqy saıasat jáne
jastardy bılikke tartý sekildi saıası basymdyqtaryna nazar aýdarǵan Abzal
Saparbekuly jýyrda Qazaqstan Premer-mınıstri Asqar Mamınniń de
Túrkıaǵa jasaǵan sapary týraly áńgimeledi. Táýelsizdigimizdiń jáne
baýyrlas qazaq-túrik yntymaqtastyǵynyń mańyzyna toqtalǵan Elshi, sózin
babalarymyzdyń «Birlik bolmaı – tirlik bolmas» degen maqalymen
támamdady.
Aıtýly keshtiń ashylý saltanatynda sóz sóılegen TUUM tóraǵasy Mustafa
Shentop «Túrkıa Qazaqstannyń Táýelsizdigin moıyndaǵan alǵashqy memleket
bolǵanyn árdaıym maqtan tutady. Elderimiz arasyndaǵy qarym-qatynastar
biz úshin óte mańyzdy. Alǵa qoıylǵan 10 mlrd. dollarlyq saýda aınalymy
mejesine jetý úshin qyrýar jumys atqarylýda. Qazaqstannyń qýanyshy
bizdiń de qýanyshymyz»,- dedi. Elbasy N.Nazarbaevtyń kóregen saıasatyn
tilge tıek etken M.Shentop «Nazarbaevtyń qaıratkerligi tek Qazaqstan úshin
ǵana emes, barsha Túrki álemi jáne aımaqtaǵy elderdiń damýyna baǵyt
kórsetetin jumystary da qyzyǵýshylyq týdyratynyna» toqtalǵan ol
Qazaqstan memleketi Táýelsizdiginiń 28-shi jyldyǵymen quttyqtady.
Sondaı-aq alqaly keshte TUUM tóraǵasy M.Shentop Elshi A.Saparbekulyna
Elbasy Nursultan Nazarbaev atyna Túrki álemi jazýshylar jáne
ónerpazdardyń «Türksav» qory atynan 1919 jyly 19-mamyrda Atatúrik
bastaǵan ult-azattyq soǵystyń 100 jyldyǵy qurmetine taǵaıyndalǵan «19
mamyr Túrki áleminiń jańǵyrýy» marapatyn tabys etti.
Túrki áleminiń ádebıet jáne óner salalaryndaǵy yntymaqtastyǵyn
arttyrýǵa baǵyttalǵan jumystar júrgizetin «Türksav» qorynyń budan
buryn Elbasyna «Túrki álemine qyzmet syılyǵyn» bergenin aıta ketken
jón.
Resmı qabyldaý Nur-Sultan qalasynyń ákimdigi memlekettik akademıalyq
fılarmonıasynyń Qazaq orkestri, «Qorqyt ata» kóne aspaptar saz tobynyń
konsertimen jáne qazaqtyń ulttyq taǵamymen kómkerilgen mol dastarhanǵa
ulasty.
Sýretter Qazaqstannyń Túrkıadaǵy elshiliginiń feısbýktegi resmı
paraqshasynan alyndy.
