Qazaqstandyq ánshi - Júrgenov atyndaǵy Qazaq ulttyq óner akademıasynyń estrada-óner fakúltetiniń 4 kýrs stýdenti Ádilhan Makın Vıtebsk qalasynda «Slaván bazary-2019» xalyqaralyq festıvaliniń jeńimpazy atandy. Bul týraly aqjoltaı habardy Qazaqstan Respýblıkasy mádenıet jáne sport mınıstri Aqtoty Raıymqulova óziniń feısbýk paraqshasynda habarlady.
«Bas Júlde - bul úlken jeńis. Tórt jyl buryn osy jarys sahnasynda Dımash Qudaıbergenniń juldyzy janǵan edi. Ol kezde de Mınıstrliktiń qoldaýymen attanyp, bas júldemen oralǵan bolatyn»,-dep jazdy mınıstr qýana.
«Ary qaraı baǵy qalaı janǵanyna ózderińiz de kýásizder, dostar. Vıtebskte bizdiń mınıstrliktiń qoldaýymen kelgen shyǵarmashylyq delegasıaǵa búgingi kúnniń belsendi jumysy úshin alǵysymdy bildiremin. Barlyǵyńyzdy osyndaı aıtýly jeńispen quttyqtaımyn, áriptester!
Ádilxan Makın óz kezeginde tyńdarmandarǵa tamasha qazaq oıshyly Abaıdyń 175 jyldyǵyna oraı biregeı fleshmobty jalǵastyrdy. Memleket basshysy Qasym-Jomart Toqaev bastaǵan uly aqynnyń óleńderin oqyǵan flesh-mob Vıtebskte Ádilxan Makın jalǵastyrdy: Abaıdyń «Kózimniń qarasy» atty ánin oryndap, tyńdarmandardyń dý qol shapalaǵyna bólendi!
Belarýsıa, Reseı, Germanıa, Shveısarıa, Bolgarıa, Malta, Izraıl, Qytaı, Latvıa, Ýkraına, Polsha, Lıtva, Grýzıa, Armenıa jáne Moldova... Bizdiń jigit eń úzdigi atandy! Bul úlken jetistikpen barshańyzdy quttyqtaımyn! Bul jeńis - Ádilhan Makınniń óner jolynda alǵashqy qadamy - onyń aldaǵy tabystary men jeńisterine aparatyn qadam ekenine senimdimin. Biz qolymyzdan kelgenniń barlyǵyna kómektesemiz»,— dep jazdy Mádenıet jáne sport mınıstri Aqtoty Raıymqulova óz paraqshasyna.
