Elimizdegi sý tasqynynan kelgen materıaldyq shyǵynnyń ótemaqy kólemi 565,7 mln teńgeni qurady. Bul týraly Úkimettiń baspasóz qyzmeti habarlady.
«Sý tasqynynan zardap shekken azamattarǵa keltirilgen zalaldy óteý prosesi jalǵasyp jatyr. Úkimet bul jumysty Memleket basshysy Qasym-Jomart Toqaevtyń tapsyrmasy boıynsha júrgizedi. Atyraý, Batys Qazaqstan, Qostanaı, Soltústik Qazaqstan jáne respýblıkanyń basqa da birqatar oblysynyń turǵyndary arnaıy qurylǵan óńirlik komısıalarǵa tıisti ótinishter beredi. Búgingi tańda 16 343 ótinish qabyldanǵan», — delingen Úkimettiń habarlamasynda.
19 sáýirdegi jaǵdaı boıynsha, zardap shekken óńirlerde 2787 otbasy shamamen 2,4 mlrd teńge somasyna 100 AEK mólsherinde (369 200 tg - red.) birjolǵy tólem aldy. Zardap shekken óńirlerde 3053 turǵyn úı tekserilip, 1807 nysan boıynsha baǵalaý júrgizildi. Qazirdiń ózinde 206 otbasy 254 mln teńgeden astam somaǵa jóndeý jumystaryn júrgizýge tólem alyp úlgerdi.