QR Premer-Mınıstri Oljas Bektenovtiń tóraǵalyǵymen ótken Úkimet otyrysynda elimizdegi sý tasqynynyń saldaryn joıý máselesi kún tártibinen tys qaraldy. Bul týraly Úkimettiń baspasóz qyzmeti habarlady.
Úkimet basshysyna vıse-premer Qanat Bozymbaev zalaldy óteý algorıtmine sáıkes óńirlerde atqarylyp jatqan is-sharalar týraly baıandady.
Bıylǵy 28 mamyrdaǵy málimetke súıensek, respýblıka boıynsha 30 myńnan astam otbasy 100 AEK mólsherinde birjolǵy tólem aldy. Atalǵan baǵyttaǵy jumys baqylaýǵa alynyp, qajetti sharalar qabyldanyp jatyr.
15 myńnan astam úı men saıajaı qurylystary tekserildi, 11 134-i boıynsha baǵalaý júrgizildi.
Bul rette jekelegen óńirlerde saraptamanyń tómen kórsetkishi baıqaldy. Mysaly, Batys Qazaqstan oblysynda sý basqan 4 myń úıdiń 2 176-i (54%) tekserilip, 770 úıge baǵalaý júrgizildi. Aqtóbe oblysynda 3 679 úı tekserilip (73%), 1673 úı baǵalandy.
Atyraý, Aqmola, Qostanaı jáne Soltústik Qazaqstan oblystarynyń ákimdikteri tasqynnan zaqymdanǵan úılerdi tekserý jáne baǵalaý jumystaryn aıaqtady.
Jalpy elimiz boıynsha 9 myńnan astam úı qalpyna keltirilýge bolatyn qurylys qataryna jatady. 4 315-i apatty jaǵdaıda dep tanyldy.
Óńirler 1 847 úı men páterdiń qurylysy bastaldy, qaıtalama naryqtan 3 417 turǵyn úı satyp alý josparlanyp otyr.
Qurylys maýsymynyń qysqalyǵyn eskere otyryp, oqý jylynyń basyna deıin zardap shekken azamattarǵa úıler men páterler berý josparlanýda.
«Ákimdikterge Ónerkásip mınıstrligimen birge turǵyndardyń baspanalary men múlikterine keltirilgen zalaldy baǵalaý jumystaryn osy aptanyń sońyna deıin aıaqtaýdy tapsyramyn. Azamattarymyzdyń qıyn jaǵdaıyna túsinistikpen jáne jan-jaqty muqıat qarańyzdar. Jumystardy keshiktirmeı, barynsha tezdetý kerek. Qanat Aldabergenuly, qatań baqylaýda ustańyz», — dedi Úkimet basshysy Oljas Bektenov.
