Premer-Mınıstr Oljas Bektenov sý tasqynynan keıin turǵyn úıler men ınfraqurylymdy qalpyna keltirý máseleleri boıynsha keńes ótkizdi. Ónerkásip jáne qurylys mınıstri Qanat Sharlapaev, energetıka mınıstri Almasadam Sátqalıev, kólik vıse-mınıstri Satjan Ablalıev aǵymdaǵy jaǵdaı men atqarylyp jatqan jumystar týraly baıandady. Sondaı-aq Batys Qazaqstan, Aqtóbe, Atyraý, Aqmola, Soltústik Qazaqstan jáne Qostanaı oblystarynyń ákimderi tyńdaldy. Bul týraly Úkimettiń baspasóz qyzmeti habarlady.
Elimizde sý tasqyny saldarynan qalpyna keltirýge kelmeıtin barlyq úıler boıynsha qurylys jáne satyp alý jumystary júrgizilip jatyr. Sý tasqyny saldarynan barlyǵy 19 342 jyljymaıtyn múlik (jalǵyz baspana bolyp sanalatyn úıler men saıajaılar) zaqymdandy, onyń 8 578-i qalpyna keltirýge jaramsyz dep tanyldy. Búgingi tańda 2 578 úı qurylysy men 6 myń jyljymaıtyn múlik satyp alý jumystary júrgizilýde.
Premer-Mınıstr SQO-da 200, Pavlodar oblysynda 5 jańa úı qurylysynyń jedel júrgizilgenin atap ótti. Sondaı-aq jýyrda Qostanaı oblysynda 22 úı tapsyrylady. Jalpy, turǵyn úıdi qalpyna keltirýdi jedeldetý úshin barlyq sharalar qabyldanǵany basa aıtyldy. Ákimdikter qajetti qarjymen tolyq qamtamasyz etildi, barlyq kemshilikter joıyldy, salynyp jatqan úılerdiń úlgilik jobalary bekitildi. Sonymen qatar jekelegen óńirlerde jumys kestesinen 15-25 kúnge artta qalýshylyq bar. Atap aıtqanda, Batys Qazaqstan, Aqtóbe, Aqmola jáne Atyraý oblystarynda qurylys qarqyny tómen.
Úkimet basshysy ákimderge árbir nysanǵa adamdar men tehnıka jumyldyrýdy tapsyryp, Prezıdent júktegen mindetterdi oryndaý úshin shamamen 2,5 aı qalǵanyn eske saldy. Bul rette Premer-Mınıstr qurylys normalaryn buzýǵa jol bermeý kerektigin talap etti.
«Qalpyna keltirý jumystarynyń qarqynyn jedeldetý qajet. Qurylys materıaldaryn jetkizýge, eńbek resýrstary men arnaıy tehnıkany alańdarda jumyldyrýǵa baılanysty barlyq máseleni jyldam sheshý qajet. Kesteden keshigýge ákelip soǵatyn barlyq problemalar týraly dereý ortalyqqa habarlaý kerek. Qajet bolsa, biz resýrstardy qaıta bólip, tehnıka men adamdardy kóbeıtemiz. Barlyq qurylys normalary men qaýipsizdik talaptarynyń saqtalýyn qamtamasyz etý mańyzdy. Bul máseleler azamattardy alańdatpaýy kerek. Óńirlerdiń ákimderi úılerdiń sapasyna jeke jaýap beredi», — dep atap ótken Oljas Bektenov, Ónerkásip jáne qurylys mınıstrligine qurylys jumystarynyń sapasyn qatań baqylaýdy tapsyrdy.
Premer-Mınıstrdiń tapsyrmasy boıynsha ónerkásip jáne qurylys mınıstri Qanat Sharlapaev, energetıka jáne kólik vıse-mınıstrleri jumys ýaqytynyń negizgi bóligin barlyq jumys aıaqtalǵanǵa deıin óńirlerde, tikeleı qurylys alańdarynda ótkizetin bolady.
Jergilikti joldardy jóndeýge jáne rekonstrýksıalaýǵa Úkimet rezervinen 22,7 mlrd teńge bólinip, zardap shekken óńirlerdegi mektepterdi qalpyna keltirýge 7,5 mlrd teńge baǵyttaldy. Barlyq mektep oqý jyly bastalǵanǵa deıin qalpyna keltiriledi.
Anyqtama: Zardap shekken aımaqtardaǵy úıler 100% tekserilip, baǵalandy. Baǵalaý qorytyndysy boıynsha 9 243 úı jóndeýge jatady. Jalpy somasy 44,1 mlrd teńgege 7505 otbasy turǵyn úıdi jóndeýge jáne qalpyna keltirýge ótemaqy aldy. 8 578 nysan qalpyna keltirýge jaramaıdy. Búgingi tańda 3 921 otbasy qıraǵan baspanasynyń ornyna jańa úı men páter aldy, 2 578 jańa úıdiń qurylysy júrgizilýde. 33 820 otbasy 12,5 mlrd teńgeden astam somaǵa 100 AEK mólsherinde birjolǵy tólem aldy. Zardap shekken turǵyndardyń joǵaltqan asa qajetti zattaryn satyp alý úshin 20 606 otbasyna 9,4 mlrd teńge 150 AEK-ke deıingi mólsherde qosymsha ótemaqy tólendi. Sýǵa ketken maldyń óteýi úshin berilgen memlekettik kómek kólemi 2,8 mlrd teńgeden asty. Zardap shekken bızneske keltirilgen zalaldy óteý boıynsha óńirlik komısıalar SHOB sýbektileriniń jalpy somasy 1,5 mlrd teńge bolatyn 178 ótinimin qarap, maquldady.
