Soltústik Qazaqstan oblysy, Petropavl qalasynda sý tasqynynan zardap shekkenderge salynyp jatqan baspanalar qurylysyna «Aýyl» jastary kómektesedi. Ol úshin óńirde stýdenttik qurylys jasaqtary quryldy. Bul - «Aýyl» HDPP bastamasymen qolǵa alynyp otyr, dep habarlaıdy Ulys.
Búgin Petropavl qalasy A. Vınokýrov atyndaǵy sport saraıynda «Aýyl» partıasy Jastar qanaty qurylys jasaqtarynyń saltanatty sherýi ótti.
Saltanatty sherýge «Aýyl» HDPP Tóraǵasy, QR Parlamenti Májilisiniń depýtaty Serik Egizbaev, Soltústik Qazaqstan oblysynyń ákimi Ǵaýez Nurmuhambetov, jergilikti atqarýshy bılik ókilderi, oblystyq máslıhat depýtattary, eńbek ardagerleri t.b qatysty.
El aýmaǵynda bolǵan sý tasqyny zardaptaryn joıý úshin Jastar stýdenttik qurylys jasaqtaryn qaıta jandandyryp, zardap shekkenderge naqty kómek kórsetý jaıynda «Aýyl» partıasy Tóraǵasy, QR Parlamenti Májilisi depýtaty Serik Egizbaev Úndeý jasaǵan bolatyn. Atalǵan úndeýge birinshi bolyp «Aýyl» partıasynyń Jastar qanaty ún qosty. Soltústik Qazaqstan oblysynda stýdent jastar otrádyn jasaqtaldy.
Saltanatty sherýde sóz alǵan Serik Egizbaev «Prezıdentimiz Qasym-Jomart Kemeluly Toqaev bıylǵy Ulttyq Quryltaıdyń úshinshi otyrysynda: «Adal adam – Adal eńbek – Adal tárbıe» – bir-birine ajyramas uǵymdar. Osy úsh baǵytty ozyq ári tabysty elge aınalýdyń basty kilti deýge bolady. Balalar men jastardy tárbıelep, olardyń boıyna osy ozyq qundylaqtardy sińirýge aıyryqsha kóńil bólinýi tıis – dep atap ótken bolatyn. Búgin, «Aýyl» Partıasynyń Jastar qanaty bastama kóterip, elimiz egemendik alǵan ýaqyttan beri tuńǵysh ret «Aýyl» jastarynyń qurylys jasaqtaryn» qurdy. Joba jas býyn úshin jańa ómirge joldama, jańa mamandyqqa bastaý bolady dep oılaımyn. Búgin biz «Aýyl» partıasy jastar qurylys otrádtarynyń jumysyna resmı start beremiz. Bizdiń balalar 3 aı ishinde, kóktemgi sý tasqynynan zardap shekkenderdi kúzgi sýyqqa uryndyrmaı qonystandyrý úshin «Solnechnyı – 2» kentinde qurylys jáne jóndeý jumystaryn júrgizedi. Ýaqyt óte az, al jumys – óte kóp. Sondyqtan balalarymyzǵa sáttilik tileımiz!», - dedi.
«Aýyl jastary» qurylys jasaǵynyń quramynda 40 jas bar. Taǵy 40 stýdent rezervte tur. Qazirgi ýaqytta Petropavl qalasynyń Solnechnyı-2 kentinde tasqynnan zardap shekkenderge arnalyp 500-den astam baspana salynyp jatyr. Jastar qurylys jasaǵy sol jerde sý shaıǵan úılerdi qalpyna keltirý jáne qurylys jumystaryna jumyldyrylady.
«Bul úlken qoǵamdyq áleýmettik mańyzy bar joba. Bir jaǵynan, jastar jasaǵy zardap shekken otandastarǵa sý tasqyny zardaptaryn joıýǵa kómektesse, ekinshi jaǵynan, stýdent jastardyń jazǵy demalys kezinde eńbekke aralasyp, tabys tabýyna múmkindik beredi. Basqa óńirlerde de jumysty jalǵastyramyz. Máselen Qaraǵandy jastary basqa oblystarǵa baryp, kómek kórsetýge daıyn ekendikterin jetkizdi», - deıdi Serik Egizbaev.
