SQO-da tasqynǵa qarsy jumystarǵa 3 myńnan astam jumyldyryldy

Sý tasqyny

08 sáýir 2024

SQO-da tasqynǵa qarsy jumystarǵa 3 myńnan astam jumyldyryldy

Qazaqstan Premer-Mınıstri Oljas Bektenov Petropavlda Esil ózeni arnasynan asyp ketken jaǵdaıda qalany jáne jaqyn mańdaǵy eldi mekenderdi sý tasqynynan qorǵaýǵa arnalǵan bógetterdi nyǵaıtý jumystaryn tekserdi. Bul týraly Úkimettiń baspasóz qyzmeti habarlady.

Úkimet basshysy Teplıchnoe jáne Kojevennaıa aýyldaryndaǵy qorǵanysh úıindileriniń jaǵdaıyn qarap, 2017 jylǵy sý tasqynynan keıin júrgizilgen jumystardyń esebin tyńdady.

Qazirgi ýaqytta Sergeev sý qoımasyndaǵy sý deńgeıiniń joǵarylaýyn eskere otyryp, qoldanystaǵy bógetterdi nyǵaıtý jáne olardyń uzyndyǵy men bıiktigin arttyrý boıynsha jumystar júrgizilýde. Jalpy, qarǵyn sýdy ótkizý úshin avtojoldarda jol tósemin arshý jumystary 6 ret júrgizildi. Balamaly baǵyt qarastyrylyp, belgiler qoıylyp, kezekshilik uıymdastyrylǵan. Sý tasqyny kezeńi bastalǵaly beri eldi mekenderdiń kósheleri men aýla aýmaqtarynan 440 myń m3 sý soryldy. 165 shaqyrymnan astam aryq tazartyldy, 2.7 shaqyrym kanaldar keńeıtilip, tereńdetildi.

Oljas Bektenov sý tasqynynan zardap shekkenderdi qoldaý sharalary men júrgizilip jatqan jumystar týraly turǵyndar suraqtaryna jaýap berdi, eriktiler men sarapshylarǵa kórsetken kómekteri men qoldaýlary úshin alǵysyn bildirdi.

Úkimet basshysy tartylǵan qosymsha kúshter men tehnıkany eskere otyryp, bógetterdi nyǵaıtý jumystarynyń qarqynyn jedeldetý, onyń ishinde bıiktigin arttyrý qajettigin atap ótti.

«Jumysqa jeke quram men Ulttyq ulan jumyldyryldy. Polk te kúsheıtiledi. Qorǵanys mınıstrligi qosyldy, sondyqtan kúsh jetkilikti bolýy kerek. Qazir kúsh biriktirýimiz qajet. Aldaǵy 2-3 kúnde aýyr zardaptardyń aldyn alý úshin kóp jumys isteý kerek. Eń aldymen adamdar zardap shekpeýi mańyzdy», — dep atap ótti Oljas Bektenov.

Qazirgi tańda sý tasqynyna qarsy is-sharalarǵa ákimdiktiń, PD, Ulttyq ulan bólimshesiniń jáne jeke uıymdardyń 1432 qyzmetkeri, 1200 erikti qatysýda. Premer-Mınıstrdiń tapsyrmasy boıynsha búgin Qorǵanys mınıstrliginiń 300 áskerı qyzmetshisi keldi. Osylaısha barlyǵy 3000-ǵa jýyq adam jumyldyryldy.

Soltústik Qazaqstan oblysyndaǵy sý tasqyny jaǵdaıy erekshe baqylaýda. Premer-Mınıstrdiń birinshi orynbasary Roman Sklár da osynda. Jedel shtabtar táýlik boıy jumys isteıdi.

RELATED NEWS

Sý tasqyny

05 aqpan 2025

Qazaqstannyń 20-dan astam eldi mekeninde sý tasqany bolýy múmkin

Májilistiń jalpy otyrysynyń kýlýaryndaTótenshe jaǵdaılar mınıstri Shyńǵys Árinov sý tasqyny qaýpi bar aımaqta 23 eldi meken bar ekenin aıtty, dep habarlaıdy Ulys.

«Bul statısıkany mamandar beredi. Keıbir depýtattar osy óńirdiń barlyǵyn sý basady dep shoshyp jatyr eken. Olaı bolmaıdy. Belgili bir jumys júrgizemiz. Keıbir óńirden ol qaýipter joıyldy. Al óńirler boıynsha sý tasqyny qaýpi tónip turǵan TOP-5 aımaqty aıtatyn bolsaq, BQO, Qaraǵandy, Aqmola, Shyǵys Qazaqstan jáne Soltústik Qazaqstan oblystary bolyp otyr», - dedi Shyńǵys Árinov

Sý tasqyny

11 naýryz 2025

Sý tasqynyna daıyndyq: el aýmaǵynyń 71%-ynda qar jatyr

Úkimet otyrysynda ekologıa jáne tabıǵı resýrstar mınıstri Erlan Nysanbaev el aýmaǵynyń 71%-ynda qar jatqanyn habarlady.

Ol 11 naýryzdaǵy jaǵdaı boıynsha qar astynda jatqan aýmaq 71%-dy quraıtynyn, degenmen bul ótken aptaǵa qaraǵanda 15%-ǵa az ekenin atap ótti. Elimizdiń ońtústiginde: Qyzylorda, Túrkistan jáne Jambyl oblystarynda, batysynda: Batys Qazaqstan, Atyraý jáne Mańǵystaý oblystarynda qar erip jatyr.
«Naýryz aıynda temperatýra kóterilip, jaýyn-shashyn kóp bolsa erigen qar sýynan taý ózenderinde tasqyn júrýi múmkin. Ortalyq, soltústik jáne shyǵys aımaqtarda qar qalyń, naýryz aıynda jaýyn-shashyn mólsheri aılyq normadan eki jáne odan da kóp túsedi dep kútilip otyr. Mysaly, Astanada birinshi onkúndiktiń ózinde aılyq jaýyn-shashyn mólsheri tústi»,
— dep atap ótti Erlan Nysanbaev.

Sý tasqyny

08 tamyz 2024

Sý tasqynymen kúres: 5 myńnan asa otbasy qonys toıyn toılady

Sý tasqynynan zardap shekken 5 239 otbasyǵa arnaıy salynǵan jáne satyp alynǵan úıler men páterler berildi, dep habarlady Úkimettiń baspasóz qyzmeti.

Úkimet sý tasqynynan zardap shekken otbasylarǵa turǵyn úı salý jáne satyp alý, sondaı-aq olarǵa jan-jaqty kómek kórsetý boıynsha óńirlerde júrgizilip jatqan jumystardy turaqty baqylaýda ustap otyr.

Qıraǵan baspanasynyń ornyna 4769 otbasy jańa úıler men páterlerge ıe boldy. Sonymen qatar zardap shekken óńirlerde 2568 jańa úıdiń qurylysy qarqyndy túrde júrgizilip jatyr, onyń ishinde 470 nysan boıynsha jumystar tolyǵymen aıaqtalyp, turǵyndarǵa kiltter tabystaldy.

Soltústik Qazaqstan oblysynda qurylysy aıaqtalǵan 285 úı, Qostanaı oblysynda 57, Batys Qazaqstan oblysynda 80, Aqtóbe oblysynda 43 jáne Pavlodar oblysynda 5 úı paıdalanýǵa berildi.

Barlyq oblysta sý basqan turǵyn úılerdi tekserý jáne baǵalaý jumystary 100% aıaqtaldy. Jalpy somasy 49,3 mlrd teńgege 8 853 otbasy turǵyn úıdi jóndeýge jáne qalpyna keltirýge tıisti tólem aldy.

34 216 otbasyǵa 12,6 mlrd teńgege 100 AEK mólsherinde birjolǵy ótemaqy tólendi. Sondaı-aq joǵalǵan birinshi qajettiliktegi zattaryn satyp alý úshin 150 AEK-ke deıin qosymsha tólemder berilýde. Búgingi tańda 9,9 mlrd teńgege 21 869 otbasy osyndaı kómek aldy.

Zardap shekken bızneske keltirilgen zalaldy óteý jumystary jalǵasýda. Óńirlik komısıalar jalpy somasy 7,9 mlrd teńgege SHOB sýbektileriniń 455 ótinimin qarap, maquldady.

Sýǵa ketken mal úshin berilgen memlekettik kómek kólemi 2,8 mlrd teńgeden asty.

Jańalyqtar

24 maýsym 2025