Qazaqstannyń Ǵylym jáne joǵary bilim mınıstrligi jasandy ıntellekt boıynsha bilim baǵdarlamalary men kýrstar ázirlemek. Bul týraly Sıfrlyq Úkimettiń kóshpeli otyrysynda aıtyldy.
Atalǵan otyrysta Premer-Mınıstr Oljas Bektenov elimizde jasandy ıntellektini damytý baǵyttary týraly aıtty
«Sıfrlyq damý mınıstrligi óńir ákimderimen birge kelesi jyly memlekettik organdardyń qyzmetkerlerin jasandy ıntellekt quraldaryna oqytý jóninde sharalar qabyldaýdy tapsyramyn. Ǵylym jáne joǵary bilim mınıstrligi jasandy ıntellekt boıynsha bilim berý baǵdarlamalary men kýrstaryn daıyndasyn», - dedi Úkimet basshysy jıynda.
Bektenovtiń aıtýynsha, qazir azamattardyń kópshiligi jasandy ıntellekt týraly bile bermeıdi.
«Sıfrlyq qyzmetterdiń deni qarapaıym halyq úshin kúrdeli. Olardy barynsha ońaılatý kerek. Sıfrlyq damý mınıstrligine salalyq mınıstrliktermen birge qoldanystaǵy sıfrlyq sheshimderdi odan ári jetildirýdi tapsyramyn. Olardy qalaı paıdalaný kerek ekenin halyqqa keńinen túsindirý qajet», - dedi Bektenov.