SHQO-da ekologıa departamentiniń basshysy 4 jylǵa sottaldy

Sybaılas jemqorlyq

Foto: ashyq kózden 06 qańtar 2025

SHQO-da ekologıa departamentiniń basshysy 4 jylǵa sottaldy

Shyǵys Qazaqstan oblysy ekologıa departamentiniń basshysy sottaldy. Bul týraly Antıkor habarlady.

"Shyǵys Qazaqstan oblysynda Óskemen qalasynyń soty oblystyq ekologıa departamentiniń basshysy D. Álıevke, jergilikti turǵyn M. Jýrkabaevqa jáne kásipker K. Dlújevskııge qatysty úkim shyǵardy. Álıev para alǵany úshin, Jýrkabaev deldaldyǵy, al Dlýjevskıı komersıalyq uıymǵa altyn óndirýge ekologıalyq ruqsat alý úshin 4,5 mln teńge kóleminde para bergeni úshin kináli dep tanyldy", - delingen habarlamada.

Sot úkimimen sheneýnik 4 jylǵa, qala turǵyny – 1 jyl 6 aıǵa, kásipker – 3 jyl 6 aıǵa bas bostandyǵynan aıyryldy, sondaı-aq paıdaly qazbalardy barlaý jáne óndirý salasyndaǵy komersıalyq uıymdarda 5 jyl merzimge basshy laýazymdardy atqarýǵa tyıym salyndy. Sondaı-aq, olar ómir boıy memlekettik qyzmette jáne kvazımemlekettik sektorda qyzmet atqarý quqyǵynan aıyryldy.

Sot aktisi zańdy kúshine engen joq.

RELATED NEWS

Sybaılas jemqorlyq

25 jeltoqsan 2024

«Kaspıı» fýtbol klýbyna qatysty aqsha bopsalaǵandar destrýktıvti din ókilderi - agenttik

OKQ ótken baspasóz máslıhatynda Sybaılas jemqorlyqqa qarsy is-qımyl agentiginiń resmı ókili Danıar Bıgaıdarov «Kaspıı» fýtbol klýbynda jasalǵan jemqorlyq jaıly aıtty, dep habarlaıdy Azattyq Rýhy.

«Mańǵystaý oblysy boıynsha Sybaılas jemqorlyqqa qarsy qyzmet «Kaspıı» fýtbol klýby» SHJQ MKK burynǵy dırektory men destrýktıvti dinı orta ókilderine qatysty sotqa deıingi tergeý júrgizýde. Olar zorlyq-zombylyq qoldana otyryp, asa iri mólsherde aqsha bopsalady degen kúdikke ilinip otyr», - dedi Bıgaıdarov.

Onyń aıtýynsha, Mańǵystaý oblysy prokýratýrasynyń úılestirýimen úsh kúdikti QPK-niń 128-baby negizinde ustalyp, ýaqytsha ustaý ızolátoryna qamaldy.

«Qazirgi ýaqytta burynǵy dırektordyń oqý-jattyǵý jıyndaryn uıymdastyrý úshin fýtbol klýbyna bólingen búdjet qarajatyn jymqyrý faktisine qatysty ma, joq pa tekserip jatyrmyz. Tergeý jalǵasyp jatyr», - dedi resmı ókil.

Sybaılas jemqorlyq

13 jeltoqsan 2024

Qaıyrymdylyqqa bólingen aqshany jymqyrdy degen qoǵam belsendisiniń 1 sómkesi 25 mln teńge turady - agenttik

Kóktemgi sý tasqynynan zardap shekkenderge kómek retinde jınalǵan qaıyrymdylyq aqshany urlady degen kúdikpen qamaýǵa alynǵan Perızat Qaırat brend sómkeler men zergerlik buıymdarǵa qumar bolǵan. Qarjy monıtorıńi agenttigi taratqan aqparat boıynsha, Perızat Qaırattyń bir sómkesiniń ózi 25 mln teńge turady, dep habarlaıdy Ulys.

Qaıyrymdylyq qorynyń basshysy sý tasqynynan zardap shekkenderge jáne Palestına halqyna gýmanıtarlyq kómek kórsetý maqsatynda jınalǵan 1,7 mlrd teńgeni jymqyrdy degen kúdikke ilingen.

Búgin Qarjy monıtorıńi agenttigi Perızat Qaırattan tárkilengen múlikterdi kórsetti.

«Perızat Qaırattyń turǵylyqty jerin tintý barysynda qaıyrymdylyqqa jınalǵan qarajatqa satyp alynǵan qymbat tehnıka, Cartier, Graff, Rolex, Bulgari, Gucci, Louis Vuitton, Versace, Chopard, Hermes, Dolce & Gabbana, Prada jáne taǵy basqa tanymal álemdik brendterdiń kıim, aıaq kıim, zergerlik buıymdary, sómkeleri tárkilendi», - delingen habarlamada.

Kúdiktiden tárkilengen qymbat zergerlik buıymdardyń jalpy quny 70 mln teńgeden asady. Máselen, Graff brendiniń syrǵa-alqalary 10 mln teńgeden bastalsa, Rolex saǵatyn 7 mln teńgege satyp alǵan. Al Bulgari saǵaty 6 mln 750 myń teńge turady eken.

Budan bólek, Perızat Qaırattyń brend sómkelerge degen mahabbaty da erekshe bolǵan syńaıly. Quqyq qorǵaý organdary kúdiktiniń úıinen jalpy quny 110 mln teńgeden asatyn ondaǵan sómke tapqan.

Brend sómkelerdiń eń arzany 1 mln teńge tursa, eń qymbaty da 25 mln 600 teńge bolyp shyqty. 2 mln, 4 mln, 14 mln teńgege satyp alǵan sómkeleri de bar.

QMA Perızat Qaırattyń jıyrma shaqty brend sómkesiniń sýreti men baǵalaryn jarıalady. Perızat Qaırat barlyq sómkesine P.K dep aty-jóniniń bas áripterin jazdyrǵan.

Sybaılas jemqorlyq

18 jeltoqsan 2024

QazAvtoJol-dyń burynǵy basshysy 200 mln teńge jymqyrǵan

«QazAvtoJol» kompanıasynyń burynǵy tóraǵasy búdjet qarajatyn jymqyrǵany úshin 8 jylǵa sottaldy, dep habarlaıdy Ulys Bas kólik prokýratýrasyna silteme jasap.

«QazAvtoJol» UK» AQ-nyń burynǵy tóraǵasy men bas merdigerge qatysty «Jaqsy-Esil-Býzýlýk» avtojolyn kúrdeli jóndeýge, sonyń ishinde Esil ózeni arqyly ótetin kópirdi salýǵa bólingen 200 mln teńge kóleminde memleket qarajatyn jymqyrǵan.

«Kelisimsharttyń buzýshylyqtarmen jasalǵandyǵy jáne berilgen avanstyń ysyrap etilgendigi dáleldendi. Joba boıynsha jumys bastalmaǵan. Sottalǵandar 8 jylǵa bas bostandyǵynan aıyryldy. Sonymen qatar, sot memleketke keltirilgen zalaldy óndirip aldy. Sot úkimi zańdy kúshine engen joq», - delingen Bas kólik prokýratýrasy habarlamasynda.

Jańalyqtar

04 aqpan 2025