Foto: QHA
Qazaqstan halqy Assambleıa músheleri sýdan zardap shekken oblystarǵa «Júrekten júrekke» aksıasy aıasynda 227 tonna gýmanıtarlyq kómek jiberdi, 277 mıllıon teńge jınap, qarjylaı kómek kórsetýde. Bul týraly Senat depýtaty Gennadıı Shıpovskıh óziniń jelidegi paraqshasynda jazdy, dep habarlaıdy Ulys.
«Sońǵy kezde túrli beıne jáne jazba materıaldardy kórip ań-tań bolyp júrmin! Mysaly Qazaqstan halqy Assambleıasy sý tasqyny kezinde qaıda? Assambleıa ne istep jatyr? Assambleıa kerek emes, Assambleıa qandaı kómek beripti? Degen pikirler kóbeıipti! Ol durys emes aǵaıyn! Qazaqtyń jaqsy sózi bar “ Jaqsynyń jaqsylyǵyn aıt-nury tasysyn” degen! Elimizde qaıǵyly jaǵdaı oryn alǵan sátten bastap Qazaqstan halqy Assambleıasy sý tasqynynan zardap shekken azamattarǵa kómek berý úshin, arnaıy Respýblıkalyq shtab quryp, odan ári qaraı óńirlerde shtabtardy quryp gýmanıtarlyq kómek berý boıynsha jumysty úılestire bastady. Qazir bizdiń Assambleıa janyndaǵy “Assambleıa jastary” uıymynyń eriktileri barlyq sý basqan oblystarda kómekterin kórsetip jatyr! Egerde jalpylama aıtatyn bolsaq búgingi kúnge deıin Assambleıa músheleri sýdan zardap shekken oblystarǵa “Júrekten júrekke” aksıasy aıasynda 227 tonna gýmanıtarlyq kómek jiberdi, 277 mıllıon teńge jınap, qarjylaı kómek kórsetýde», - dedi senator.
Sonymen qatar ol óńirlerde 10 myńǵa jýyq eriktiler zardap shekken azamattarǵa,qutqarýshylarǵa, áskerı qyzmetkerlerge,qurylysshylarǵa óz kómekterin berip jatqany týraly aıtty.
«Qadirli aǵaıyn Assambleıa únsiz otyr, Assambleıa eshteme jasap jatqan joq dep aıtý durys emes degen oıdamyn. Aıtpaqshy áleýmettik jelide jalǵan aqparat óte kóp, mysaly Assambleıaǵa qyryp aqsha bólinedi, Assambleıa búdjetke qarap otyr dep. Dostar bul taza mıf! Barlyq kórsetilip jatqan, joǵaryda atalyp ótken Assambleıa tarapynan berilgen kómek jaıynda aıtatyn bolsaq, bul Assambleıa janyndaǵy túrli kásipkerler, mesenattar jáne etnomádenı birlestikterdiń kómegi! Aman bolaıyq dostar! Kúshimiz birlikte!», - dep tolyqtyrdy Gennadıı Shıpovskıh óz sózin.