Qyrǵyzstan UQSHU-ǵa tóraǵalyqty qabyldady

Saıasat

Foto: Aqorda 28 qarasha 2024

Qyrǵyzstan UQSHU-ǵa tóraǵalyqty qabyldady

QR Prezıdenti Qasym-Jomart Toqaev UQSHU Ujymdyq qaýipsizdik keńesiniń keńeıtilgen quramdaǵy otyrysyna qatysty, dep habarlaıdy Aqorda.

Astanada Qazaqstan Prezıdenti Qasym-Jomart Toqaevtyń tóraǵalyǵymen Ujymdyq qaýipsizdik sharty týraly uıymynyń Ujymdyq qaýipsizdik keńesiniń kezekti sesıasy ótti.

Samıtke Belarýs Prezıdenti Aleksandr Lýkashenko, Qyrǵyzstan Prezıdenti Sadyr Japarov, Reseı Prezıdenti Vladımır Pýtın jáne Tájikstan Prezıdenti Emomalı Rahmon keldi. Sonymen qatar sesıa jumysyna Táýelsiz Memleketter Dostastyǵynyń Bas hatshysy Sergeı Lebedev pen Shanhaı yntymaqtastyq uıymynyń Bas hatshysy Chjan Mın qatysty.

Memleket basshysy sesıa jumysyn ashyp, jıyn qatysýshylaryna rızashylyǵyn bildirdi.

– Búginde UQSHU ujymdyq qaýipsizdikti qamtamasyz etýdi kózdeıtin tıimdi ári qajetti halyqaralyq qurylymǵa aınaldy. Uıymnyń damý jyldarynda múshe memleketter kóptegen másele boıynsha ózara yqpaldastyq jasap, mol tájirıbe jınady. Aýqymdy normatıvtik-quqyqtyq baza qalyptasty. Qazirgi syn-qaterler men qaýipterge qarsy kúres tetikteri jolǵa qoıyldy. Ujymdyq qaýipsizdik kúshteri men quraldary jasaqtalyp, qalypty qyzmet etip jatyr. Bedeldi halyqaralyq jáne óńirlik uıymdarmen konstrýktıvti yntymaqtastyq ornatyldy, – dedi Qazaqstan Prezıdenti.

Qasym-Jomart Toqaev shaǵyn quramda ótken otyrysta memleketter basshylary halyqaralyq jáne óńirlik qaýipsizdiktiń ózekti máseleleri jóninde pikir almasqanyn aıtty. Sondaı-aq Qazaqstannyń tóraǵalyǵy aıasynda UQSHU-nyń bıylǵy qyzmeti qorytyndylanǵanyn jetkizdi.

– Kezdesý qorytyndysy ujymdyq qaýipsizdikke tónetin qaýip-qaterge qarsy jumyla áreket etýge daıyn ekenimizdi taǵy da rastady. Pikirtalas barysynda halyqaralyq kún tártibindegi máseleler boıynsha ustanymdarymyzdy jetkizdik. Bizdiń qazirgi jaǵdaıǵa ortaq baǵamyz jáne UQSHU-nyń odan ári damýyna kózqarasymyz Qazaqstannyń bastamasymen ázirlengen Ujymdyq qaýipsizdik keńesiniń deklarasıasynda kórinis tapty. Uly Jeńistiń 80 jyldyǵyn merekeleýge erekshe mán berildi. Ardagerlerdiń maıdandaǵy jáne tyldaǵy erligi esimizde máńgi saqtalady. Olardy árdaıym maqtan tutamyz, qurmetteımiz. Aıtýly mereke qarsańynda UQSHU Ujymdyq qaýipsizdik keńesiniń málimdemesin qabyldaý, sondaı-aq Uly Jeńistiń 80 jyldyǵyna oraı merekelik is-sharalar josparyn bekitý mańyzdy dep sanaımyz, – dedi Memleket basshysy.

Qasym-Jomart Toqaevtyń aıtýynsha, Qazaqstannyń UQSHU-ǵa tóraǵalyǵy aıasynda Uıym jarǵysyna saı yntymaqtastyq baǵyttary boıynsha 60-qa jýyq is-shara uıymdastyrylǵan. Halyqaralyq arenada kelisilgen ustanymdardy ilgeriletý boıynsha seriktestermen birlese jumys júrgizildi.

– Bıyl qabyldanǵan saıası qujattar legine UQSHU-ǵa múshe memleketterdiń jalpy baǵalaýy negiz boldy. Olardyń ishinde halyqaralyq aqparattyq qaýipsizdik, ǵarysh salasyndaǵy yntymaqtastyq máseleleri men Taıaý Shyǵystaǵy ahýalǵa baılanysty, sondaı-aq Belorýssıany basqynshylardan azat etýdiń 80 jyldyǵyna oraı qabyldanǵan málimdemeler bar. Jyl boıy ujymdyq qaýipsizdik júıesiniń kúshteri men quraldarynyń áskerı daıyndyǵyna muqıat nazar aýdaryldy. Búgin biz UQSHU kúshteri men quraldary mártebesine jáne áskerı kontıngentti tasymaldaýǵa qatysty halyqaralyq kelisimderdiń eki hattamasyna qol qoıamyz. UQSHU-ǵa múshe elderdiń bitimgerlik kúshteriniń daıyndyq deńgeıi men jaýyngerlik mashyǵyn jetildirý jumystary júrgizilip jatyr. Qyrkúıek-qazan aılarynda elimizde «Myzǵymas baýyrlastyq-2024» UQSHU Bitimgershilik kúshteriniń komandalyq-shtabtyq oqý-jattyǵýlary men «Jartas-2024» UQSHU arnaıy oqý jıyny ótti. Asa qaýipti nysandardaǵy kúrdeli apattyq-qutqarý jumystaryn júrgizýdiń birlesken is-qımyly pysyqtaldy, – dedi Qazaqstan Prezıdenti.

Prezıdent jyl boıy ózekti syn-qaterlerge qarsy is-qımyl máselesine erekshe den qoıylǵanyn aıtty.

– Qazaqstan men UQSHU-ǵa múshe basqa da elder aýmaǵynda bir ýaqytta «Naemnık», «Kanal», «Nelegal» jáne «PROKSI» sekildi arnaıy operasıalardyń túrli kezeńderi ótti. Bul is-sharalar halyqaralyq terorızmge, esirtki saýdasyna, zańsyz kóshi-qonǵa jáne aqparattyq ortadaǵy syn-qaterlerge qatysty qaýiptiń aldyn alýdy kózdeıdi. Bıyl bizdiń bastamamyzben alǵash ret zańsyz qarý-jaraq, oq-dári aınalymyna jáne uıymdasqan transulttyq qylmysqa qarsy is-qımyl jóninde konsýltasıalar ótti. UQSHU aıasynda arnaýly jumys tobyn qurý máselesi pysyqtalyp jatyr. Qazaqstan tóraǵalyǵynyń úılestirýimen Tájik-aýǵan shekarasyn nyǵaıtý jónindegi UQSHU-nyń maqsatty memleketaralyq baǵdarlamasyn daıyndaý jumystary aıaqtaldy. Qujatty ázirleý 2013 jyly bastalǵan bolatyn. Búgin biz Uıymnyń ońtústik shebindegi qaýipsizdikti nyǵaıtýǵa baǵyttalǵan osy mańyzdy sheshimge qol qoıamyz, – dedi Memleket basshysy.

Qasym-Jomart Toqaevtyń aıtýynsha, UQSHU tóraǵasy retinde Qazaqstan aıqyndaǵan basymdyqtar júıeli ári qarqyndy túrde júzege asyrylyp keledi. Seriktesterdiń qoldaýyna súıene otyryp, UQSHU aıasynda atalǵan bastamalardy odan ári ilgeriletý isi belsendi jalǵasady.

Memleket basshysy Uıymnyń Bas hatshysyna, UQSHU-nyń Turaqty keńesi men jumys organdaryna atqarylǵan aýqymdy jumys úshin rızashylyǵyn jetkizdi.

UQSHU Ujymdyq qaýipsizdik keńesiniń keńeıtilgen quramdaǵy sesıasy barysynda Qyrǵyzstan Prezıdenti Sadyr Japarov pen UQSHU Bas hatshysy Imanǵalı Tasmaǵambetov sóz sóıledi.

Qasym-Jomart Toqaev Sadyr Japarovty 2025 jyldyń 1 qańtarynan bastap UQSHU-ǵa tóraǵalyqtyń Qyrǵyz Respýblıkasyna ótýi týraly sheshimniń qabyldanýymen quttyqtap, qyrǵyz tarapynyń jaýapty mindetti tabysty atqarýyna tilektestik bildirdi.

Jıyn qorytyndysy boıynsha memleketter basshylary Ujymdyq qaýipsizdik keńesiniń deklarasıasyn qabyldap, birqatar qujatqa qol qoıdy. Tájik-aýǵan shekarasyn nyǵaıtý jónindegi UQSHU-nyń maqsatty memleketaralyq baǵdarlamasy bekitildi.

Sonymen qatar prezıdentter Uly Jeńistiń 80 jyldyǵyna baılanysty málimdeme qabyldap, kelesi jyly osy aıtýly dataǵa oraı uıymdastyrylatyn merekelik is-sharalardyń josparyn bekitti.

Astanada qabyldanǵan qujattar Uıym men ujymdyq qaýipsizdik júıesin barlyq múshe memleketterdiń múddesine saı keshendi túrde damytýǵa baǵyttalǵan.

RELATED NEWS

Saıasat

12 sáýir 2025

Qazaqstannyń úsh qalasyna erekshe mártebe berilmek

TMD Syrtqy ister mınıstrleri keńesiniń otyrysynda Astana, Almaty, Qaraǵandy «1941-1945 jj. Eńbek dańqy qalasy» qurmetti ataǵyn berý týraly sheshim kelisildi, dep habarlaıdy Bul týraly SİM habarlady.

Kezdesýde Qazaqstan premer-mınıstriniń orynbasary – syrtqy ister mınıstri Murat Nurtileý TMD uıymyn odan ári damytýǵa baǵyttalǵan birqatar usynysty ortaǵa saldy. Osy turǵyda Qazaqstan bastamalaryn júzege asyrýda Dostastyq boıynsha seriktesterdiń qoldaýy erekshe atalyp ótti.

«Elimizdiń usynysy boıynsha búgingi tańda Volontórler forýmy, Dostastyq jármeńkesi, TMD Akademıalyq astanasy jáne basqa da kóptegen joba birlesken kúsh-jigerdiń arqasynda iske asyrylyp jatyr nemese jaqyn bolashaqta ótkizýge josparlanǵan», – dep málimdedi syrtqy ister mınıstri.

Jeńistiń 80 jyldyǵy qarsańynda TMD elderiniń birqatar qalasyna, sonyń ishinde Astana, Almaty, Qaraǵandy jáne basqa da qalalarǵa «1941-1945 jj. Eńbek dańqy qalasy» qurmetti ataǵyn berý týraly sheshim kelisildi.

Syrtqy ister mınıstrleri keńesiniń kelesi otyrysy 2025 jylǵy qazan aıynda TMD Memleket basshylary samıti qarsańynda Dýshanbe qalasynda ótedi.

Saıasat

28 sáýir 2025

Aqordada Qonaev jáne Alataý qalalaryn damytý máseleleri aıtyldy

Memleket basshysy Almaty oblysynyń ákimi Marat Sultanǵazıevti qabyldady. Qasym-Jomart Toqaevqa Almaty oblysynyń 2025 jyldyń birinshi toqsanyndaǵy áleýmettik-ekonomıkalyq damýy týraly esep berildi. Bul týraly Aqorda habarlaıdy.

Marat Sultanǵazıev ekonomıkanyń negizgi sektorlarynda ósim baıqalatynyn baıandady. Atap aıtqanda, ónerkásiptik óndiris kólemi 507,9 mıllıard teńgeni, aýyl sharýashylyǵy ónimi 97,4 mıllıard teńgeni quraǵan. Shaǵyn jáne orta bıznes sýbektileriniń sany 146,2 myńǵa jetip, 7,7 paıyzǵa artqan.

Prezıdentke jyl basynan beri 12 jańa ónerkásip jobasynyń iske qosylǵany týraly málimet berildi. Onyń ishinde «GALANZ bottlers» óndiris alańynyń keńeıýi, «Bartoǵaı GES-28» jáne Sharyn ózenindegi shaǵyn GES kaskadynyń qurylystary sıaqty aýqymdy jobalar bar. Jalpy, óńirde quny 2,4 trıllıon teńgeni quraıtyn 122 joba júzege asyrylyp jatyr. Nátıjesinde 36 776 jumys orny ashylady.

Memleket basshysyna Qonaev jáne Alataý qalalaryn damytý barysy jóninde aıtyldy. Jańa bas josparǵa sáıkes, oblys ortalyǵynda «Smart Qonaev» qalany basqarýdyń biryńǵaı júıesi engizilýde. Alataý qalasynyń bas josparyna túzetýler jasaý jáne kólik-ınjenerlik ınfraqurylymdy jobalaý jumystary bastaldy.

Oblys ákiminiń aıtýynsha, «Jaıly mektep» ulttyq jobasy aıasynda 17 bilim ordasynyń qurylysy qolǵa alynǵan. Budan bólek, óńirdegi úsh aýysymdy oqý máselesin sheshý úshin memleket-jekemenshik áriptestik negizinde 19 mektep salý josparlanǵan. 2025-2027 jyldary 91 oqý oshaǵynda kúrdeli jóndeý jumystary júrgiziledi.

Memleket basshysy Qonaev jáne Alataý qalalaryn, jalpy Almaty aglomerasıasyn damytýǵa qatysty barlyq belgilengen maqsattardy sapaly ári ýaqtyly oryndaýdyń mańyzyn atap ótti. Prezıdent ındýstrıaldy aımaqtar men Alatau AEA-nyń áleýetin nyǵaıtýǵa, sondaı-aq komýnaldyq jáne eldi mekenderdegi joldardyń qurylysyna basa mán berýdi tapsyrdy.

Saıasat

30 qyrkúıek 2024

Toqaev: Prezıdent – halyq jaldaǵan memlekettik qyzmetker

QR Prezıdenti Qasym-Jomart Toqaev «Eýrazıa keńistigindegi ornyqty damý jáne qaýipsizdik» konferensıasyna qatysty, dep habarlaıdy Aqorda.

Prezıdent óz sózinde buryn-sońdy bolmaǵan geosaıası turaqsyzdyq jaǵdaıynda dıplomatıa sheshýshi rólge ıe bolǵanyn atap ótti.

– Geosaıasat pen geoekonomıkadaǵy túbegeıli ózgerister, jahandyq deńgeıdegi klımattyq jáne demografıalyq syn-qaterler, pandemıanyń jańa qaýpi, qarýlaný básekesiniń órshı túsýi, tehnologıalyq progres, sonyń ishinde jasandy ıntellektini engizý jaǵdaıynda strategıalyq turaqtylyq pen ornyqty damý máseleleri barshamyz úshin ózekti bola tústi. Budan shyǵatyn qorytyndy anyq: halyqaralyq qoǵamdastyq syndarly dıalogqa tyń serpin berýi úshin kún tártibine oń ózgeris jasaýy qajet. Sondyqtan birtutas eýrazıalyq qaýipsizdik ıdeıasy kóppolárly, ádiletti jáne ornyqty álemdik tártipti qalyptastyrýǵa tujyrymdamalyq negiz bola alady, – dedi Qasym-Jomart Toqaev.

Memleket basshysy konferensıa qatysýshylaryna qoǵamdyq ómirdiń barlyq salasynda júzege asyrylyp jatqan Qazaqstandaǵy aýqymdy ózgerister jóninde málimet berdi.

Qasym-Jomart Toqaevtyń pikirinshe, saıası reformalardyń eń basty jańalyǵy – Konstıtýsıada Prezıdent mandatyn 7 jyldyq bir merzimmen shekteý týraly erejeniń bekitilýi.

– Mundaı norma postkeńestik elderdiń, tipti odan tysqary memleketterdiń eshqaısysynda joq. Meniń oıymsha, Prezıdentti bir ret jeti jylǵa saılaý – onyń saılaýaldy baǵdarlamasy men reformalaryn júzege asyrýǵa jetkilikti ýaqyt. Oǵan qosa Prezıdent – halyq jaldaǵan memlekettik qyzmetker. Elimizde Zań men Tártip ústemdik qurýǵa tıis ekenine senimdimin. Tek sonda ǵana reformalardy júzege asyrýǵa, sondaı-aq Qazaqstan ekonomıkasyna ınvestısıa tartýǵa qajetti jaǵdaı jasaı alamyz. Zań men Tártip – Ádiletti Qazaqstannyń negizi. Ádildikke qashan da, qaı jerde de muqtajdyq bar. Bizdiń elde de solaı. Qolǵa alǵan reformalardy iske asyrý qanshalyqty qıyn bolsa da, dittegen maqsatymyzǵa jetpeı qoımaımyz. Ony eshkim toqtatpaq turmaq, baǵytynan jańyldyra almaıdy, – dedi Memleket basshysy.

Qasym-Jomart Toqaev Qazaqstan men Reseı halyqtary arasyndaǵy dostyq baılanystardy nyǵaıtýda bilim salasynyń mańyzy zor ekenin atap ótti. Prezıdenttiń aıtýynsha, qazir Reseıde 60 myńnan astam qazaqstandyq stýdent oqıdy.

– Búginde elimizde Reseıdiń tanymal joǵary oqý oryndarynyń fılıaldary tabysty jumys istep keledi. Qazaqstanda Máskeý memlekettik halyqaralyq qatynastar ınstıtýtynyń fılıalyn ashý josparlanyp otyr, – dedi Qasym-Jomart Toqaev.

Plenarlyq otyrysta Reseı Prezıdentiniń kómekshisi Vladımır Medınskıı konferensıa qatysýshylaryna Vladımır Pýtınniń sálemin jetkizdi.

Máskeý memlekettik halyqaralyq qatynastar ınstıtýtynyń rektory Anatolıı Torkýnov oqý ornynyń 80 jyldyǵyna oraı osynaý is-sharany uıymdastyrǵany úshin Qazaqstan tarapyna alǵys aıtty.

– Biz konferensıa taqyrybyn kezdeısoq tańdaǵan joqpyz. Munyń aıasynda ekonomıka jáne qaýipsizdik salasyndaǵy kópjaqty yntymaqtastyqtyń dástúrli máseleleri klımattyq kún tártibindegi jańa syn-qaterlermen, sondaı-aq Eýrazıa keńistiginde energetıka jáne kólik ınfraqurylymyn damytýdyń jaı-japsarymen birge qaraldy, – dedi Anatolıı Torkýnov.

Jıynǵa Qazaqstan men Reseıdiń kórnekti ǵalymdary, dıplomatıalyq qyzmet ardagerleri, memlekettik organdar men mekemelerdiń basshylary, saıasattanýshylar jáne jastar uıymdarynyń ókilderi qatysty.

Jańalyqtar

25 qarasha 2025