Qasym-Jomart Toqaev pen Sadyr Japarov shaǵyn quramda kelissóz júrgizdi, dep habarlaıdy Aqorda.
Memleket basshysy Qyrǵyzstan Prezıdenti saparynyń eki tarap úshin de mán-mańyzy aıryqsha ekenin atap ótti.

Búgin biz Odaqtastyq qatynastardy nyǵaıtý jáne keńeıtý týraly tarıhı kelisimge qol qoıamyz. Osy mańyzdy qujat qazaq-qyrǵyz baılanystarynyń damýyna tyń serpin beretinine senimdimin. El aýzynda «Qyrǵyz ben qazaqtaı bir-birine jaqyn halyq joq» degen sóz bar. Bul – durys aıtylǵan tujyrym, – dedi Qasym-Jomart Toqaev.

Memleket basshysy Qazaqstannyń buryn-sońdy bolmaǵan sý tasqynymen kúresip jatqanyn atap ótip, osyndaı qıyn-qystaý kezde gýmanıtarlyq kómek kórsetkeni úshin Qyrǵyzstan Prezıdentine jáne barsha qyrǵyz halqyna alǵys aıtty.
Qasym-Jomart Toqaev qazaq-qyrǵyz qatynastarynyń qarqyndy damyp kele jatqanyna nazar aýdardy. Prezıdenttiń pikirinshe, buǵan belsendi saıası dıalog, úkimetaralyq jáne parlamentaralyq tyǵyz baılanystar erekshe serpin berip otyr.

Ekijaqty saýda-ekonomıkalyq yntymaqtastyq jyldan-jylǵa nyǵaıyp keledi. Byltyr ózara taýar aınalymy 1,5 mıllıard dollarǵa jetti, ıaǵnı 26 paıyzǵa ósti. Aldaǵy maqsatymyz alys-beris kólemin 2 mıllıard dollarǵa jetkizý. Sonymen qatar osy baǵytta bolashaǵy zor birqatar joba qolǵa alyndy. Jalpy, saýda-ekonomıkalyq saladaǵy ýaǵdalastyqtar oryndalyp jatyr, – dedi Memleket basshysy.

Sadyr Japarov qyrǵyz delegasıasyna qonaqjaılyq tanytqany úshin Qazaqstan tarapyna rızashylyǵyn bildirdi.

– Qazaqstan bizdiń eń jaqyn kórshimiz. Syrtqy saıasatymyzda erekshe artyqshylyqtarǵa ıe bolǵan baýyrlas memleket ári negizgi saýda seriktesterimizdiń biri. Eki el arasynda eshqandaı saıası, aımaqtyq qaıshylyq joq. Memleket basshysy laýazymyna kelgeli beri qyrǵyz-qazaq qarym-qatynasy bolsyn, halyqaralyq qurylymdarda bolsyn, maǵan qoldaý kórsetip kelesiz. Biz baýyrlas qazaq halqyna sý tasqyny saldarynan týyndaǵan qıyn kezde qoldan kelgen kómekti berýge daıynbyz. Eki eldi ǵasyrlar boıy jalǵasyp kele jatqan dostyq, baýyrlastyq, tatý kórshilik baılanystar, sondaı-aq ortaq mádenı, rýhanı jáne dinı qundylyqtar biriktiredi. Ózara yntymaqtastyǵymyz ben strategıalyq seriktestigimizdiń odan ári nyǵaıa beretinine senimdimin, – dedi Sadyr Japarov.

Kelissóz barysynda taraptar saıası, kólik-tranzıttik, energetıkalyq salalardaǵy ózara yqpaldastyqty nyǵaıtý máselelerin talqylady. Sondaı-aq óńirlik jáne halyqaralyq kún tártibin qarastyrdy.