Qazaqstannyń Túrkıadaǵy Elshisi Abzal Saparbekuly jyldyń eń úzdik dıplomaty atandy. Aqjoltaı aqparat elshiliktiń feısbýk áleýmettik jelisindegi (https://www.facebook.com/kzembassy) resmı paraqshasynda jarıalandy.
«Jibek joly» Strategıalyq zertteýler ortalyǵy jáne «Jibek joly» baspa tobynyń uıymdastyrýymen ótken sharada «Halyqaralyq 15-shi Jibek joly bıylǵy jyldyń Altyn adamdary» belgili boldy. Osy rette, Qazaqstannyń Elshisi Abzal Saparbekulyna «Jyldyń eń úzdik dıplomaty» syılyǵy berildi.
Uly Jibek jolynyń órkenıetter arasyndaǵy saýda-sattyq, baýyrlastyq yntymaqtastyǵyn ornatý jolyndaǵy mısıasyn úlgi alǵan «Jibek joly» Strategıalyq zertteýler ortalyǵynyń basty maqsattarynyń biri Túrkıa men basqa elder arasynda dostyq jáne yntymaqtastyq kópirin qurý.
Túrkıanyń zıaly qaýym ókilderi, dıplomatıalyq mısıa basshylary, kásipkerler men BAQ ókilderi qatysqan saltanatty sharada sóz sóılegen Elshi A.Saparbekuly elimizdiń syrtqy saıasatyna toqtala otyryp, mártebeli syılyqqa ıe bolýyn, jeke óziniń emes, Qazaqstan dıplomatıasynyń jemisi dep baǵalaıtynyn jetkizdi. Qazaqstannyń kópvektorly, beıbit, belsendi jáne teńgerimdi syrtqy saıasaty arqyly aımaq pen álemniń turaqtylyǵy men beıbitshiligine eleýli úles qosyp otyrǵanyna nazar aýdarǵan Elshi A.Saparbekuly Elbasy Nursultan Nazarbaevtyń Astana prosesi, Túrki keńesiniń qurylýy, elimizdiń BUU qaýipsizdik keńesi sheńberindegi jumysy sekildi halyqaralyq arenadaǵy jemisti bastamalary týraly sóz etti. Tájirıbeli memleket qaıratkeri jáne kórnekti dıplomat Qasym-Jomart Toqaevtyń Prezıdent atanýy syrtqy saıasatymyzdaǵy sabaqtastyqtyń kepili ekendigin jetkizgen Qazaqstan Elshisi qazaq-túrik yntymaqtastyǵyna da toqtaldy.
«Halyqaralyq 15-shi Jibek joly bıylǵy jyldyń Altyn adamdary» nomınasıasynda basty marapat Ózbekstan Prezıdenti Shavkat Mırzıóevke berildi. Sondaı-aq, Moldova Gagaýz avtonomıalyq aımaǵynyń prezıdenti Irına Vlah, TUUM depýtaty, Ázerbaıjan-Túrkıa Parlamentter arasy dostyq toby tóraǵasy Shamıl Aırym, Túrksoı Bas hatshysy Dúısen Qaseıinov, «Öztek Tekstil» basqarma tóraǵasy Ahmet Óztek, búkilálemdik Ahyska túrikteri qaýymdastyǵy Prezıdenti Zıaeddın Ismıhanoǵlý, «Yükselir Group» basqarma tóraǵasy Iavýz Iýksel, «Edelstaal Şirketler Grubu» basshysy Týrgýt Torýnoǵýllary, Halyqaralyq bilim ortalyǵy basshysy prof. Elchın Isgenderzade jáne «Marmara Grubu» qorynyń basshysy Akkan Sýver túrki áleminiń yntymaqtastyǵyna qosqan úlesteri úshin túrli salalardyń úzdikteri atandy.
