Týrızm jáne sport mınıstrligi kásibı sportty qarjylandyrý jáne sport rezervin daıarlaý jónindegi zań jobasyn ázirledi. Bul týraly atalǵan mınıstrliktiń baspasóz qyzmeti habarlady.
Týrızm jáne sport mınıstrligi «Qazaqstan Respýblıkasynyń keıbir zańnamalyq aktilerine dene shynyqtyrý jáne sport, sondaı-aq normalardyń artyq (shamadan tys) zańnamalyq reglamenttelýin bolǵyzbaý máseleleri boıynsha ózgerister men tolyqtyrýlar engizý týraly» zań jobasyn ázirledi.
Qujatta sport rezervin daıarlaý máselelerine aıtarlyqtaı ózgerister engiziledi. Zań jobasyna sáıkes, sport rezervi tek joǵary jetistikter sportynyń túrleri boıynsha daıarlanatyn bolady. Sportshylardy daıarlaý ýákiletti organ bekitetin sporttyq daıarlyqtyń ulttyq standarttaryna sáıkes qatań túrde júrgiziledi. Bul shara Qazaqstannyń ulttyq quramasynyń áleýetin arttyrý jáne sport salasyndaǵy júıeli damý úshin negiz bolmaq.
Sonymen qatar, kásibı sportty memlekettik búdjet qarajaty esebinen qarjylandyrýǵa qatysty jańa erejeler usynylady. Zań jobasy boıynsha, kásibı klýbtardy ustaýǵa memleket tarapynan qarjylandyrý lımıtteri belgilenetin bolady. Bul shara búdjettik shyǵystardyń tıimdiligin arttyryp, sportty damytýǵa bólingen qarajattyń durys paıdalanylýyn qamtamasyz etedi.
Zań jobasynda taǵy da bir mańyzdy ózgeris bar: Qazaqstan Respýblıkasynyń azamattary bolyp sanalmaıtyn sportshylardy memlekettik búdjet jáne kvazımemlekettik sektor sýbektileriniń qarajaty esebinen qarjylandyrýǵa tyıym salý. Bul shara el azamattarynyń sportta da, qarjylyq qoldaýda da basymdyqqa ıe bolýyn qamtamasyz etedi.
«Bul ózgerister sporttyq saladaǵy basqarýdy ońtaılandyryp, qarjylyq resýrstardy tıimdi paıdalanýǵa múmkindik beredi. Biz joǵary jetistikter sportyna erekshe kóńil bólip, kásibı sporttyń qarjylandyrý júıesin turaqty ári ádil etýdi maqsat etip otyrmyz», – dep atap ótti Týrızm jáne sport mınıstri Erbol Myrzabosynov.
Zań jobasynyń qabyldanýy elimizdegi sporttyq júıeni jetildirýge, memlekettik qarajattyń tıimdi paıdalanylýyna jáne sporttyń kásibı deńgeıde damýyna serpin beredi.
