Memleket basshysy «Atletıko Madrıd» fýtbol klýbynyń prezıdenti Enrıke Sereso Torresti qabyldady. Prezıdentke elimizde «Atletıko Madrıd» fýtbol akademıasyn ashý jobasy tanystyryldy, dep habarlaıdy Aqorda.
Qasym-Jomart Toqaev ıspanıalyq klýbtyń fýtbol álemindegi bedeli zor ekenin atap ótip, Qazaqstanda sporttyń osy túrin damytýǵa jáne tájirıbe almasýǵa qyzyǵýshylyq tanytqany úshin Enrıke Sereso Torreske alǵys bildirdi.
Memleket basshysynyń aıtýynsha, Qazaqstanda fýtboldy damytýǵa aıryqsha nazar aýdarylady.
Qazir elimizdegi sport mektepterinde, fýtbol seksıalarynda 40 myńǵa jýyq bala jattyǵady.
Sondaı-aq ınfraqurylym jaqsartylyp, jańa stadıondar salynýda.
Qasym-Jomart Toqaev fýtboldy damytýǵa baǵyttalǵan bul bastamaǵa memleket jan-jaqty qoldaý kórsetýge daıyn ekenin aıtty.
Enrıke Sereso Torres «Atletıko Madrıd» fýtbol akademıasy álemniń kóptegen elinde ashylǵanyn jetkizdi.
Akademıada daryndy fýtbolshylardy tárbıeleýmen qatar, olardy álemdik fýtbol lıgalaryna shyǵarý úshin úzdik tájirıbelerdi engizýge, jattyqtyrýshylar men tálimgerlerdiń biliktiligin arttyrýǵa mán beriledi.
«Atletıko Madrıd» fýtbol akademıasy Almaty oblysy Talǵar qalasyndaǵy «Akbulak» olımpıada ortalyǵynyń bazasynda qurylmaq.
Kezdesý sońynda Enrıke Sereso Torres Qasym-Jomart Toqaevqa «Atletıko Madrıd» oıynshylarynyń qoltańbasy qoıylǵan jeıde syılady.
