QAZAQSTAN-ÓZBEKSTAN ARASYNDAǴY SAÝDA KÓLEMİ 4,1 MLRD DOLLARǴA JETTİ

Ózbekstan

25 aqpan 2020

QAZAQSTAN-ÓZBEKSTAN ARASYNDAǴY SAÝDA KÓLEMİ 4,1 MLRD DOLLARǴA JETTİ

Búgin Tashkent qalasynda QR Premer-Mınıstri Asqar Mamın Ózbekstan Prezıdenti Shavkat Mırzıeevpen kezdesti. Bul týraly QR Úkimetiniń baspasóz qyzmeti habarlaıdy.

«QR Tuńǵysh Prezıdenti – Elbasy Nursultan Nazarbaev Sizben birge Qazaqstan men Ózbekstan arasyndaǵy ekijaqty qarym-qatynasty strategıalyq yntymaqtastyqtyń jańa deńgeıine shyǵarýdyń negizin qalady. Memleket basshysy Qasym-Jomart Toqaev sabaqtastyqty syrtqy saıasattyń negizgi qaǵıdaty retinde quptaı otyryp, Ózbekstan Respýblıkasymen ózara tıimdi ári uzaq merzimdi yntymaqtastyqty damytýǵa erekshe kóńil bóledi», — dedi A. Mamın.

QR Premer-Mınıstri ekijaqty yntymaqtastyqtyń joǵary qarqynyn atap ótti.

Ózbekstan — Qazaqstannyń aımaqtaǵy asa mańyzdy saýda seriktesi. 2019 jyldyń qorytyndysy boıynsha ekijaqty saýda kólemi $4,1 mlrd jetti. 2020 jyldyń sońyna deıin taýar aınalymyn $5 mlrd deıin jetkizý josparlanyp otyr. Búgingi tańda Qazaqstan men Ózbekstanda 3 myńnan astam birlesken kásiporyn jumys isteıdi.

Kelissóz barysynda saýda-ekonomıkalyq, ınvestısıalyq, sý-energetıkalyq, tranzıttik-kóliktik, qurylys, aýyl sharýashylyǵy, toqyma, avtomobıl jasaý, mádenı-gýmanıtarlyq, týrısik, ekologıalyq jáne basqa da salalardaǵy yntymaqtastyqty odan ári damytýdyń aýqymdy máseleleri talqylandy.

Taraptar Qazaqstan men Ózbekstannyń strategıalyq seriktestikti keńeıtýge jáne nyǵaıtýǵa degen úzdiksiz umtylysy eki eldiń Aımaqaralyq yntymaqtastyq forýmyn ótkizý tájirıbesinen kórinis bergenin atap ótti.

QR men ÓR aımaqaralyq yntymaqtastyǵynyń I forýmy 2018 jylǵy 16 qarashada Shymkent qalasynda ótti.

Bıylǵy 26 aqpanda Qazaqstan Respýblıkasy men Ózbekstan Respýblıkasynyń aımaqaralyq yntymaqtastyǵynyń II forýmy Horezm oblysynyń Úrgenish qalasynda «Agroónerkásiptik kooperasıa, ónerkásip jáne týrızm salasyndaǵy aımaqtyq bıznestiń yntymaqtastyǵy» taqyrybynda ótedi.

İs-sharaǵa 300-den astam adam — QR Premer-Mınıstri A. Mamın men ÓR Premer-Mınıstri A. Arıpov, memlekettik organdardyń, óńirlerdiń basshylary, sondaı-aq eki eldiń iskerlik ortalarynyń ókilderi qatysady. Forým qorytyndysy boıynsha aımaqaralyq jáne komersıalyq sıpattaǵy 40-tan astam kelisimge qol qoıý josparlanýda.

RELATED NEWS

Ózbekstan

19 qarasha 2019

ORTALYQ AZIA ELDERİNİŃ PREZIDENTTERİ ÓZBEKSTANDA BAS QOSADY

Ortalyq Azıa memleketteri basshylarynyń ekinshi Konsýltatıvtik kezdesýi 29-qarasha kúni Tashkentte ótedi. Bul týraly Ózbekstannyń syrtqy ister mınıstri Abdýlazız Kamılov aıtty.

Elimizdiń Syrtqy ister mınıstrligi baspasóz qyzmetiniń habarlaýynsha, Tashkentte Ortalyq Azıa elderiniń Syrtqy ister mınıstrleriniń kezdesýi ótti. Oǵan Qazaqstan, Qyrǵyzstan, Tájikstan, Túrikmenstan jáne Ózbekstan Syrtqy ister mınıstrleri qatysqan. Olar Tashkentte ótetin Ortalyq Azıa memleketteri basshylarynyń ekinshi Konsýltatıvtik kezdesýine daıyndyq barysyn talqylady. Mınıstrler Ortalyq Azıa memleketteriniń basshylary konsýltatıvtik kezdesýiniń kún tártibin, birlesken málimdemesi men reglamentiniń jobalaryn naqty qarady. Sondaı-aq óńirlik ózara is-qımyldy odan ári nyǵaıtýdyń jaı-kúıi men perspektıvalary talqylandy.

Ortalyq Azıa baǵytyndaǵy mańyzdy ortaq jetistigi retinde Qazaqstannyń Tuńǵysh Prezıdenti – Elbasy Nursultan Nazarbaevtyń bastamasymen 2018 jylǵy 15 naýryzda Nur-Sultan qalasynda ótken OA memleketteri basshylarynyń Jumys (konsýltatıvtik) kezdesýi boldy. Bul – kóp jyldar ishindegi mundaı formattaǵy alǵashqy kezdesý bolyp, onyń barysynda óńir elderiniń kóshbasshylary besjaqty yntymaqtastyqtyń negizgi basymdyqtaryn anyqtap, bolashaqqa josparlar belgiledi.

QR Syrtqy ister mınıstri Muhtar Tileýberdi óz sózinde Ortalyq Azıa elderimen jan-jaqty kooperasıalyq baılanystardy damytý jáne óńirdiń mańyzdylyǵyn nyǵaıtý Qazaqstannyń syrtqy saıasatynyń negizgi basymdyqtarynyń biri bolyp tabylatynyn atap ótti.

Kezdesý qatysýshylary ózbek tarapyna is-sharany sapaly uıymdastyrǵany jáne Ózbekstannyń aımaqtyq ıntegrasıany odan ári damytýǵa baǵyttalǵan kúsh-jigeri úshin alǵys bildirdi.

Sýretter mfa.gov.kz saıtynan alyndy.

Ózbekstan

09 qańtar 2019

Ózbekstan prezıdentiniń Ortalyq Azıa boıynsha arnaıy ókili bolady

Mundaı másele Ózbekstannyń «belsendi ınvestısıa jáne áleýmettik damý jyly» memelekettik baǵdarlamasynda kórinis tapqan.

kun.kz saıtynyń málimetinshe, bunyń syrtynda baǵdarlamaǵa sáıkes, 20-shildege deıin Ortalyq Azıa elderimen baılanysty kúsheıtetin quqyqtyq-normatıvtik qujat ázirlenbek. Sonymen qatar, Ózbek eli bıyl alǵash ret Aýǵanstan boıynsha ekonomıkalyq yntymaqtastyq (RECCA, Regional Economic Cooperation Conference on Afghanistan) boıynsha óńirlik konferensı ótkizedi. Atalǵan jıyn (RECCA VII) sońǵy ret 2017 jyldyń qarasha aıynda Túrikmenstannyń astanasy Ashǵabadta ótken bolatyn.

Sýret: akorda.kz saıtynan alyndy.

Ózbekstan

30 tamyz 2019

AQTAÝDA ÓZBEKSTANNYŃ BAS KONSÝLDYǴY ASHYLDY

Búgin Aqtaý qalasynda baýyrlas Ózbekstannyń Bas konsýldyǵy ashyldy. Saltanatty sharaǵa Mańǵystaý oblysynyń ákimi Serikbaı Turymov pen Ózbekstannyń Qazaqstandaǵy elshisi Saıdıkram Nıazhodjaev qatysyp, quttyqtaý sóz sóıledi. Bul Mańǵystaý jerinde ashylyp otyrǵan besinshi konsýldyq. Buǵan deıin Túrkıa, Iran, Ázirbaıjan jáne Túrikmenstan elderiniń konsýldyǵy ashylǵan edi.