Májiliste Qazaqstan men Túrkıanyń áskerı yntymaqtastyǵyn jańa deńgeıge shyǵaratyn kelisim ratıfıkasıalandy. Bul qujatqa saı, baýyrlas elderdiń atalǵan saladaǵy baılanysy tipti kúsheıedi. NATO uıymy múshesi ári áskerı tehnıkasy atalǵan uıymnyń standarttaryna saı keletin, sonymen qatar, bitimgerlik salasynda jáne terrorshylarmen jyldar boıǵy kúreste tájirıbesi mol baýyrlas eldiń tásil-tájirıbesi bizdiń áskerlerge de paıdaly bolary sózsiz.
Buǵan deıin týys eki el arasyndaǵy áskerı salada eki kelisim jasalǵan bolatyn. 1993 jylǵy qujat «áskerı bilim berý salasyndaǵy yntymaqtastyq týraly» bolsa, 1994 jyly qabyldanǵan kelisim «áskerı ǵylym, tehnıka jáne bilim berý salasyndaǵy yntymaqtastyq» dep atalǵan edi. Al Qazaqstan men Túrkıanyń qorǵanys vedomstvalarynyń kóptegen mańyzdy salasyn reglamantteıtin 21 pýnktten turatyn bul jolǵy qujattyń jóni bólek. Zań joba «Qazaqstan Respýblıkasynyń Úkimeti men Túrkıa Respýblıkasynyń úkimeti arasyndaǵy áskerı yntymaqtastyq týraly kelisimdi ratıfıkasıalaý týraly» dep atalady. Bul jerde «áskerı yntymaqtastyq» degen sózge basa mán berseniz kóp dúnıeni túsinesiz. Túrkıa Respýblıkasy Qazaqstannyń qarýly kúshterin qalyptastyrýǵa alǵashqylardyń bir bolyp kómek qolyn sozyp 1998 jyly 5 mıllıon AQSH dollary kóleminde áskerı járdem bergenin umytpaǵan abzal. Parlament Májilisiniń jalpy otyrysynda mańyzdy kelisimdi Qazaqstan Respýblıkasynyń Qorǵanys mınıstriniń orynbasary Tımýr Dándibaev tanystyrdy. Onyń sózinshe, kelisimge 2018 jyldyń 13 qyrkúıeginde Ankara qalasynda qol qoıylǵan. «Túrkıa Respýblıkasy Qazaqstan Respýblıkasynyń mańyzdy da negizgi strategıalyq seriktesteriniń biri bolyp tabylady. Jáne bizdiń memlekettiń syrtqy saıasatynda erekshe oryn alady. Osy ýaqytqa deıin eki memleket arasyndaǵy áskerı saladaǵy yntymaqtastyq 1993 jylǵy 8 tamyzdaǵy áskerı bilim salasyndaǵy, sondaı-aq 1994 jylǵy 23 aqpandaǵy áskerı ǵylym, tehnıka jáne bilim salasyndaǵy yntymaqtastyq týraly kelisimder negizinde júzege asyrylyp keledi. Joǵaryda atalǵan halyqaralyq sharttardyń keıbir erejeleri eki memlekettiń qoldanystaǵy zańnamasyna sáıkes kelmeýi jáne olarda is-sharalardy ótkizý boıynsha qarjylyq shyǵystarmen qamtamasyz etý tártibiniń bolmaýyna baılanysty áskerı yntymaqtastyq salasynda jańa kelisim jasasý týraly sheshim qabyldaǵan bolatyn. Qarastyrylyp otyrǵan kelisimniń maqsaty — taraptar arasyndaǵy teń quqyqtyq pen ózara tıimdilik qaǵıdattary negizinde áskerı yntymaqtastyqty damytý bolyp tabylady. Kelisim áskerı daıarlyq pen oqytýdy qosa alǵanda, budan buryn qamtylmaǵan birlesken oqý-jattyǵýlardy ótkizý, kartografıa, gıdrografıa, topogeodezıalyq qamtamasyz etý, áýe keńistigi arqyly áskerı múliktiń tranzıti, medısınalyq kómek kórsetý, zań quzyrettiligi, sonymen qatar, basqa da máselelerdi kózdeıdi. Osy kelisimdi iske asyrý boıynsha is-sharalar taraptarmen birlesip ázirlengen jyldyq yntymaqtastyq josparyna sáıkes júzege asyrylatyn bolady. Kelisimdi iske asyrý Qazaqstannyń áskerı saladaǵy múmkindikterin keńeıtýdi qamtamasyz etedi jáne eki memlekettiń arasyndaǵy áskerı yntymaqtastyqtyń damýyna oń áser etetin bolady. Zańdy qabyldaý respýblıkalyq búdjetten qosymsha qarajat bólýdi talap etpeıdi. Sondaı-aq keri áleýmettik-ekonomıkalyq jáne quqyqtyq saldarǵa ákep soqtyrmaıdy»,-dedi baıandamasynda Tımýr Turaruly. Depýtat Asylbek Smaǵulov bolsa birden, «men bul zań jobany qoldaımyn jáne áriptesterimdi qoldaýǵa shaqyramyn», - dedi, sosyn Qorǵanys mınıstriniń orynbasaryna saýalyn qoıdy. «Qurmetti Tımýr Turaruly, kelisimniń 3-babynda áskerı daıarlyq jáne bilim berý, oqytý — eki el arasyndaǵy Qorǵanys vedomstvalary arasyndaǵy yntymaqtastyq salalarynyń biri retinde kórsetilgen. Iaǵnı Túrkıa qarýly kúshteriniń jaýyngerlerlik qabylet deńgeıi joǵary ári áskerı daıyndyq oqý oryndarynyń jelisi jaqsy damyǵan. Bul jerde biz olardan tájirıbe alatyn jerimiz bar. Demek, bul norma osy zań jobasynyń eń mańyzdy tusy dep bilemin. Degenmen, táýelsizdik jyldary elimizde áskerı kadrlardy daıyndaýda tolyqqandy oqý bazasy qalyptasqanyn da aıta ketken abzal. Osy oraıda mynany suraıyn degem: osy kelisim ratıfıkasıalanǵannan keıin elimizde daıyndalmaıtyn áskerı mamandyqtar boıynsha jiberetinderdiń sanyn ulǵaıtý josparlaryńyzda bar ma?» Arnaıy taldaý nátıjesi boıynsha Túrkıadan bilim alǵan áskerı qyzmetshilerdiń bilimderi de joǵary, praktıkalyq biliktilikteriniń de kúshti ekeni anyqtalǵanyna toqtalǵan Tımýr Dándibaev baýyrlas eldiń áskerı oqý oryndarynda áskerı teńiz kúshterine sáıkes, medısınalyq mamandyqtar syndy tapshy mamandyqtar boıynsha jastardy oqytýdy josparlap otyrǵandaryn aıtty. Óz kezeginde Májilistiń halyqaralyq ister, qorǵanys jáne qaýipsizdik komıtetiniń múshesi, depýtat Baqtyqoja İzmuhambetov qosymsha baıandama jasady. «QR Túńǵysh prezıdenti, Elbasy N.Nazarabev óz sózderinde bizdiń Túrkıa respýblıkasymen ortaq áleýmettik-mádenı faktorlarǵa negizdelgen izgi qarym-qatynastarymyz týraly birneshe ret aıtty. Oǵan bizdiń halyqtarymyzdyń tarıhı, dinı jáne mádenı jaqyndyǵy negiz boldy. Sonymen qatar, Elbasy Túrkıanyń jas memleketimizdiń egemendigin birinshi bolyp moıyndaǵanyna erekshe mán berdi. Qazaqstan men Túrkıa eki jaqty yntymaqtastyqtyń asa myńyzdy baǵyttary boıynsha ózara tıimdi qatynastar men yntymaqtastyq ornatqan jáne ony ary qaraı damytyp otyr. Munda teń quqyqtyq jáne ózara tıimdi qaǵıdattar negizinde qorǵanys jáne qaýipsizdik salasynda yntymaqtastyq mańyzdy ról atqarady. Túrkıanyń qarýly kúshteri Qazaqstannyń qarýly kúshteriniń bastapqy qalyptasýy men damýy kezeńinde alǵashqylardyń biri bolyp jan-jaqty qoldaý kórsetti. Búgingi kúni eki eldiń qorǵanys vedomstvalary arasyndaǵy áskerı yntymaqtastyq salasyndaǵy uzaq merzimdi ózara is-qımal jolǵa qoıylǵan. Qaralyp otyrǵan kelisim taraptar arasyndaǵy teń quqyqtyq jáne ózara tıimdi qaǵıdattar negizinde áskerı yntymaqtastyq ornatý jáne odan ary damytý máselelerin qamtıdy. Kelisimde qorǵanys ónerkásibi salasy, áskerı barlaý, biliktilikti jetildirýde ózara sapar, bilim almasý, áskerı barlaý, aqparatty qorǵaý men barlaý aqparattaryn almasý boıynsha sondaı-aq eki memlekettiń áýe keńistigi arqyly áskerı múliktiń tranzıti, medısınalyq kómek kórsetý, ıýrısdıksıa jáne ózge de máseleler qarastyrylǵan. Kelisim eki el arasyndaǵy áskerı yntymaqtastyqty keńeıtetin bolady. Májilis komıteti kelisimdi oń baǵalap, ratıfıkasıaǵa usyndy», -dedi Baqtyqoja Salahatdınuly. Zań jobaǵa Májilistiń jalpy otyrysyna qatysqan 130 depýtattyń biri qalaım daýys berip, qaýly qabyldandy. Qujat Senatqa jol tartty.