Qytaı

gov.kz 01 shilde 2024

Qazaqstan men Qytaı arasyndaǵy saýda aınalymy 100 ese ósken

Prezıdent Qasym-Jomart Toqaev Qytaı Halyq Respýblıkasynyń tóraǵasy Sı Szınpınniń Qazaqstandaǵy sapary qarsańynda SINHÝA agenttigine bergen suhbatynda eki eldiń arasyndaǵy saýda aınalymyn 100 mlrd dollarǵa jetkizý ábden oryndaýǵa bolatyn meje ekenin aıtty. Bul týraly Ulys Kazinform-ǵa silteme jasap habarlaıdy.

«Qytaı Halyq Respýblıkasy saýda men ınvestısıa salasynda Qazaqstannyń jetekshi seriktesi retindegi ornyn saqtap otyr. 30 jyldan asatyn qarym-qatynastyń arqasynda qos eldiń arasyndaǵy saýda aınalymy 100 ese ósip, 2023 jyly 41 mlrd dollarǵa jetti. Bul tarıhı rekord bolyp esepteledi. Ótken jyldyń qorytyndysy boıynsha Qytaı Qazaqstandaǵy iri ınvestorlardyń alǵashqy tórttigine endi. 2023 jyly bul el 2 mlrd dollarǵa jýyq tikeleı ınvestısıa salǵan. Bul 2022 jyldyń kórsetkishinen 16,4 paıyz kóp. Jalpy Qazaqstan ekonomıkasyndaǵy Qytaı ınvestısıasynyń jıyntyq kólemi 25 mlrd dollardan asty», - dedi Memleket basshysy.

Búginde Qazaqstanda 4 700-deı qazaq-qytaı birlesken kásiporny jumys isteıdi.

«Budan bólek qarjy sektoryndaǵy birlesken qyzmetimizdiń aıasyn keńeıtpekshimiz. Ol úshin «Astana» halyqaralyq qarjy ortalyǵynyń múmkindikterin paıdalanamyz. Búginde bul ortalyqta 78 elden 2 800-ge jýyq sheteldik kompanıa tirkelgen. Onyń onnan bir bóligi Qytaıdan», - dedi Prezıdent.

Qasym-Jomart Toqaev Qytaı tarabynyń «Bir beldeý, bir jol» megajobasyn tutastaı qoldaıtynyn aıtty.

«Biz aldymyzǵa Qytaımen aradaǵy kópqyrly qarym-qatynasty ary qaraı tereńdetý baǵytynda órshil josparlar qoıyp otyrmyz. Oǵan qajetti alǵysharttar men jaǵdaıdyń bárin jasap jatyrmyz. Ózara yqpaldastyqtyń qazirgi joǵary qarqynyn eskersek, aradaǵy saýda aınalymyn 100 mlrd dollarǵa jetkizý tolyqtaı qol jetkizýge bolatyn meje», - dedi Memleket basshysy.

RELATED NEWS

Qytaı

02 shilde 2024

Qytaı basshysy Qazaqstanǵa memlekettik saparmen keldi

Prezıdent Qasym-Jomart Toqaev Qazaqstanǵa memlekettik saparmen kelgen QHR Tóraǵasy Sı Szınpındi elorda áýejaıynda qarsy aldy, dep habarlaıdy Aqorda.

Mártebeli qonaqty saltanatpen qarsy alý úshin áýejaıda Qurmet qaraýyly rotasy sap túzep turdy. Sondaı-aq Qazaqstan men Qytaı halyqtarynyń shynaıy dostyǵynyń belgisi retinde balalar eki eldiń jalaýyn jelbiretip, qoshemet kórsetti.

QHR Tóraǵasy Sı Szınpın Astanaǵa memlekettik saparmen keldi — Foto: Aqorda

Prezıdent Qasym-Jomart Toqaev Qazaqstanǵa memlekettik saparmen kelgen QHR Tóraǵasy Sı Szınpındi elorda áýejaıynda qarsy aldy — Foto: Aqorda

Balalar Tóraǵa Sı Szınpın bastaǵan QHR delegasıasyna iltıpat bildirip, qytaı tilinde án shyrqady. Sapar aıasynda joǵary deńgeıde ekijaqty kelissózder júrgiziledi jáne birqatar mańyzdy qujatqa qol qoıylady dep josparlanyp otyr.

Buǵan deıin habarlanǵanyndaı, 2-4 shilde kúnderi Prezıdent Qasym-Jomart Toqaevtyń shaqyrýymen Qytaı Halyq Respýblıkasynyń Tóraǵasy Sı Szınpın Qazaqstanǵa memlekettik saparmen keledi. Ol sondaı-aq, Shanhaı yntymaqtastyq uıymyna múshe memleketter basshylary keńesiniń 24-shi otyrysyna qatysady.

Bir-birine basty saýda-ekonomıkalyq serikteske aınalǵan qos memlekettiń basshylarynyń kezdesýinde qandaı mán bar? Kazinform tilshisi taldap kórdi.

Qytaı

07 qyrkúıek 2024

Qytaı sheteldikterge bala asyrap alýǵa tyıym saldy

Qytaıda sheteldikterdiń bala asyrap alý tájirıbesin toqtatý týraly sheshim qabyldady, dep habarlaıdy VVS.

Qytaı SİM ókili Mao Nın Beıjiń budan bylaı sheteldikterge elde bala asyrap alýǵa ruqsat bermeıtinin aıtty, tek qandas týystary bala nemese ógeı balany asyrap alýy múmkin.

Pekın sonymen qatar sheteldik úkimetter men otbasylarǵa Qytaı balalaryn asyrap alǵysy kelgeni úshin alǵys aıtty. Sońǵy 13 jylda sheteldikter kem degende 150 myń qytaı balasyn asyrap aldy. Olardyń kópshiligi Amerıka Qurama Shtattaryna ketken, Amerıkalsq otbasylar Qytaıdan 82 674 bala asyrap aldy.

Qytaı sheteldikterdiń bala asyrap alýyna tyıym saldy

Qytaı

01 qazan 2024

Prezıdent Qytaı basshysy men halqyn quttyqtady

Prezıdent Qytaı Halyq Respýblıkasynyń Tóraǵasyna quttyqtaý jedelhatyn joldady, dep habarlaıdy Aqorda.

Qasym-Jomart Toqaev qazaqstandyqtardyń jáne jeke óziniń atynan Sı Szınpın men qytaı halqyn QHR-dyń qurylǵanyna 75 jyl tolýymen quttyqtady.

Memleket basshysy quttyqtaý jedelhatynda el birligi men tutastyǵynyń biregeı nyshany sanalatyn bul kúnniń orny erekshe ekenine toqtaldy. Sonymen qatar Qytaıdy álemdegi kóshbasshy, ári jahandyq ornyqty damýǵa, halyqaralyq turaqtylyq pen qaýipsizdikti qamtamasyz etýge zor úles qosyp otyrǵan qýatty memleket retinde atap ótti.

Prezıdent Qazaqstan men Qytaı arasyndaǵy san qyrly yntymaqtastyq strategıalyq seriktestik rýhynda qarqyndy damyp kele jatqanyna nazar aýdardy. Eki eldiń myzǵymas dostyq pen tatý kórshilikke negizdelgen baılanysy qos halyqtyń ıgiligi jolynda udaıy nyǵaıa beretinine senim bildirdi.

Qasym-Jomart Toqaev Sı Szınpınniń asa jaýapty qyzmetine tolaıym tabys, al dostas qytaı halqyna baq-bereke tiledi.

Jańalyqtar

12 maýsym 2025