Qazaqstan men Qatardyń Sybaılas jemqorlyqqa qarsy qyzmetteri yntymaqtastyqty keńeıtýde, dep habarlaıdy Ulys.
Sybaılas jemqorlyqqa qarsy qyzmet turaqty negizde halyqaralyq yntymaqtastyqty damytý boıynsha jumys júrgizedi.
Aǵymdaǵy jyldyń aqpan aıynda Qazaqstan Prezıdenti Qasym-Jomart Toqaevtyń Qatarǵa jumys sapary barysynda eki memleket arasyndaǵy yntymaqtastyqty arttyrýǵa baǵyttalǵan birqatar is-sharalar belgilendi. Onyń ishinde – jemqorlyqqa qarsy birlesken kúres jumysy. Osy maqsatta eki tarap «Parasattylyq pen ashyqtyqty ilgeriletý jónindegi ózara túsinistik týraly memorandýmǵa» qol qoıdy. Onyń aıasynda Sybaılas jemqorlyqqa qarsy is-qımyl agenttigi men Qatardyń Ákimshilik baqylaý jáne ashyqtyq basqarmasy jol kartasyna qol qoıý josparlandy.
Aǵymdaǵy jyldyń 24 maýsymynda Qatardyń Sybaılas jemqorlyqqa qarsy vedomstvosynyń (Ákimshilik Baqylaý jáne Ashyqtyq Basqarmasy) basshysy Hamad Bın Naser Rashıd Al-Mısned myrza bastaǵan delegasıasy Qazaqstanǵa saparmen keldi.
İs-sapar aıasynda Sybaılas jemqorlyqqa qarsy is-qımyl agenttiginiń Tóraǵasy Asqat Jumaǵalıdiń Ákimshilik Baqylaý jáne Ashyqtyq Basqarmasynyń Prezıdentimen ekijaqty kezdesýi ótti.
İs-shara barysynda taraptar eki eldiń jemqorlyqqa qarsy qyzmetteriniń jumysy, memlekettik organdardyń basym baǵyttary týraly máseleler keshenin talqylady, sondaı-aq ózara is-qımyl jónindegi Jol kartasyna qol qoıdy.
Qazaqstannyń Sybaılas jemqorlyqqa qarsy qyzmeti jemqorlyqty joıý, aktıvterdi qaıtarý, bıznesti qorǵaý, quqyqtyq kómek kórsetý, búdjet qarajaty men satyp alýdyń maqsatty paıdalanylýyna monıtorıń júrgizý boıynsha júıeli sharalardy tanystyrdy.
Sonymen qatar Agenttik tóraǵasy jemqorlyqqa qarsy bilim berý jáne tárbıe, ásirese balalar men jastar arasynda, sondaı-aq sıfrlandyrý boıynsha júrgizilip jatqan jumystarǵa tolyǵyraq toqtaldy.
Sondaı-aq, Almaty qalasynyń ákimdiginde kezdesý ótti, onda ákim Erbolat Dosaev Otandyq jáne sheteldik ınvestorlar úshin qolaıly ınvestısıalyq ahýaldy qalyptastyrýǵa erekshe kóńil bólinetinin atap ótti. Bul rette bıznes aldynda memlekettik organdar jemqorlyqqa qarsy mádenıet qalyptasqan úlken jaýapkershilikti arqalaıdy. Osy baǵytta Qazaqstan Respýblıkasynyń Sybaılas jemqorlyqqa qarsy is-qımyl agenttigi belsendi ról atqarady.
Atalǵan sharada Ulttyq banktiń, Sıfrlyq damý, ınovasıalar jáne aeroǵarysh ónerkásibi mınıstrliginiń, sondaı-aq Elektrondyq qarjy ortalyǵynyń ókilderi sıfrlyq úkimettiń qyzmeti jáne memlekettik satyp alý júıesin sıfrlandyrýdyń erekshelikteri týraly baıandama jasady.
Antıkor tóraǵasy A. Jumaǵalı Qatar basshylyǵyn aǵymdaǵy jyldyń sońyna josparlanǵan BUU Sybaılas jemqorlyqqa qarsy konvensıasynyń normalaryn jedel engizý maqsatynda Ortalyq Azıa elderi úshin Óńirlik platforma Konferensıasyna qatysýǵa shaqyrdy.
Óz kezeginde Qatardyń Sybaılas jemqorlyqqa qarsy vedomstvosynyń basshysynan 2024 jylǵy qarashada Qatarda ótetin halyqaralyq sybaılas jemqorlyqqa qarsy konferensıaǵa shaqyrtý tústi.
Kezdesý aıasynda Qatardan kelgen delegasıa ókilderi elimizdiń mádenı jáne tarıhı qundylyqtarymen tanysty.
İs-shara qorytyndysy boıynsha taraptar jemqorlyqtyń sebepteri men saldaryn neǵurlym tıimdi taldaý, yntymaqtastyqty nyǵaıtý jáne eki eldiń damýy maqsatynda tájirıbe almasýdy jalǵastyrýǵa kelisti.
Mańǵystaý oblysynyń prokýratýrasy ýákiletti organdarmen birlesip munaı-gaz salasynyń jekelegen kásiporyndarynyń qyzmetinde tekserý júrgizýde, dep habarlaıdy Ulys Mańǵystaý oblysynyń prokýratýrasyna silteme jasap.
«Oıl Transport Korporeıshn» JSHS laýazymdy tulǵalary búdjet qarajaty esebinen 700 mln teńgeden astam somaǵa merdiger kompanıanyń shyǵystaryn negizsiz ótegeni anyqtaldy.
Budan basqa, merdigerlerge naqty kórsetilmegen kólik qyzmetteri úshin 2,2 mlrd teńge aýdarylǵan.
Atalǵan buzýshylyqtar boıynsha 10.07.2024 j. Qylmystyq kodekstiń 189-babynyń 4-bóligi boıynsha (asa iri mólsherde jymqyrý) sotqa deıingi tergeý bastaldy.
Sondaı-aq, 22.07.2024 j. «QazMunaıGaz «UK» AQ enshiles uıymynyń 11 mln teńgesin jymqyrý faktisi boıynsha sotqa deıingi tergep-tekserý bastaldy.
23.07.2024 j. «Oıl Transport Korporeıshn» JSHS-niń burynǵy basshysy az. «T» ustaldy.
Qarajatty jymqyrý faktisimen QK-niń 189-babymen buryn bastalǵan sotqa deıingi tergep-tekserýler boıynsha «Oıl Transport Korporeıshn» JSHS-niń óndiristik-tehnıkalyq bóliminiń bastyǵy, merdigerlik uıymdardyń 2 ókili ustaldy.
Prokýrorlyq tekserý bastalǵannan beri barlyǵy 19 sotqa deıingi tergeý bastaldy, olar Mańǵystaý oblysynyń ekonomıkalyq tergeý departamentiniń óndirisinde.
Búdjet qarajatyn jymqyrý jáne talan-tarajǵa salý faktileri boıynsha olardy tergeý sheńberinde 8 adam, onyń ishinde «Qazmunaıgaz «UK» AQ enshiles kompanıalarynyń 4 basshy laýazymyndaǵy tulǵalar ustaldy.
Tergeý múddesi úshin basqa málimetter jarıa etilmeıdi.
Mańǵystaý oblysynyń prokýratýrasy ekonomıkalyq tergeý departamenti, sybaılas jemqorlyqqa qarsy qyzmetimen birlesip munaı-gaz salasynyń 5 kásipornynda tekserý júrgizýde, dep habarlaıdy Ulys prokýratýraǵa silteme jasap.
«OılTransportKorporeıshn» JSHS-niń («QazMunaıGaz» UK AQ enshiles kásiporny) laýazymdy tulǵalary taýar jetkizýshiden 1,5 mlrd teńgeden astam somaǵa tehnıkalyq erekshelikke sáıkes kelmeıtin avtobýstardy qabyldaǵany anyqtaldy. Bul rette olardyń quny 400 mln teńgege joǵarylatylǵan.
Jumys istelmegen arnaıy tehnıka qyzmetteri úshin 110 mln teńge mólsherinde aqsha qarajatyn aýdarý faktileri belgili boldy.
Al, «West Oil Software» JSHS-de («OılTransportKorporeıshn» JSHS merdigerlik uıymy) jumys istemegen adamdarǵa 400 mln teńgeden astam jalaqy tóleý, kompanıa basshylyǵynyń jaqyn týystaryn qosa alǵanda negizsiz jalaqy esepteý derekteri oryn alǵan.
Atalǵan buzýshylyqtar boıynsha Qylmystyq kodekstiń 189-babynyń 4-bóligi (senip tapsyrylǵan bóten múlikti iri mólsherde berý nemese jymqyrý) boıynsha 5 sotqa deıingi tergep-tekserý bastaldy. Prosestik prokýrorlar taǵaıyndaldy.
Sotqa deıingi tergep-tekserý sheńberinde atalǵan uıymdardyń 4 basshy laýazymdy tulǵalary ustaldy.
Qylmystyq ister oblystyq ekonomıkalyq tergeý departamentiniń óndirisinde.
Basqa málimetter tergeý múddesi úshin jarıa etilmeıdi.
Qazaqstanda keıingi jyldary sporttyń jaı-kúıi jıi talqylanatyn taqyryptar qatarynda. Buǵan Ulttyq olımpıada komıtetin biraz jyl eks-prezıdent Nazarbaevtyń kúıeý balasy Tımýr Qulybaevtyń basqarýy da sebep bolsa kerek. Májilis depýtaty Ermurat Bapı Qulybaevty «oıy — munaı satyp, qaltasyn toltyrý, sportty qaıtsin?!» dep ashyq synap tastady. Keıin komıtette úlken aýys-túıis boldy, desek te quramda Eski Qazaqstannyń ókilderi qylań berip qaldy. Oǵan qosa keıingi kezde jalpy sport salasyndaǵy sybaılas jemqorlyqqa qatysty birneshe daýly oqıǵa boldy. Bul týraly dalainside saıty habarlady.
Sybaılas jemqorlyqqa qarsy qyzmet birneshe aıdan beri sport salasyndaǵy sheneýnikter men olar basqaratyn qurylymdardyń qyzmetine tekseris júrgizip keledi. dw.com osy taqyrypta zertteý júrgizip kórgen. Derekterge súıensek, 2024 jyldyń basynan bastap elde búdjet qarajatyn urlady degen kúdikpen bes adam ustalǵan. Onyń ishinde keıbir sheneýnikter uzaq merzimge sottalyp ketken.
«Memleketten sýbsıdıa alatyn keıbir sport mektepteri men klýbtarynda osyǵan baılanysty shuǵyl jınalystar ótkizilgen. Al mekeme basshylary óz qaramaǵyndaǵylardan sybaılas jemqorlyqqa qarsy qyzmetkerlermen sóılesý barysynda olarǵa qarsy kýálik bermeýin suraıdy», — dep jazylǵan derekte.
Eń daýly oqıǵalardyń ishinde 117 myń eýroǵa jýyq urlady degen kúdikke ilingen Sportty damytý dıreksıasynyń basshysy Oralbaı Jaqsymbetov, 102 myń eýrodan asa qarjy jymqyrǵany úshin 7 jylǵa bas bostandyǵynan aıyrylǵan Astananyń Olımpıadalyq sport túrlerin damytý dıreksıasynyń burynǵy basshysy Baǵdat Danıarov ta bar.
Sonymen qatar, qazir Úrimshi qalasyndaǵy (QHR) bazarlardan Qazaqstan quramasynyń 2023 jylǵy Azıa oıyndarynda óner kórsetýi úshin sapasyz kıim satyp alý isine qatysty tergeý júrip jatyr.
«QARJY MONITORIŃİ AGENTTİGİNİŃ AQPARATY BOIYNSHA SPORTSHYLARǴA ARNALǴAN JABDYQTY SATYP ALÝ KEZİNDE «OILASTYRYLǴAN SQEMANY» PAIDALANÝ NÁTIJESİNDE TÝRIZM JÁNE SPORT MINISTRLİGİ JANYNDAǴY SPORTTY DAMYTÝ DIREKSIASYNYŃ SHENEÝNİKTERİ MEMLEKETKE 778 MYŃ EÝRODAN ASA SHYǴYN KELTİRDİ», — DEP KELTİRİLGEN DEREKTE.
Ótken aıda mádenıet jáne sport mınıstriniń orynbasary, premer-mınıstrdiń keńesshisi laýazymdaryn atqarǵan, onyń ústine eldiń eń ataqty fýtbol klýbtarynyń biri «Astana» dırektorlar keńesiniń tóraǵasy bolǵan Erlan Qojaǵapanov ustaldy. Onyń naqty ne úshin aıyptalǵany áli belgisiz, is qupıa sanalady. Sybaılas jemqorlyqqa qarsy is-qımyl agenttigi málimetinshe, Qojaǵaparov «aýyr sybaılas jemqorlyq jasady» degen kúdikpen ustaldy.
Sybaılas jemqorlyq qylmystary boıynsha sot prosesteri tek joǵary deńgeıdegi sheneýnikterdi qamtyǵan joq: 12 naýryzda Shymkentte 12 myń eýro somasyna issapar qujattaryna qatysty alaıaqtyq jasady dep aıyptalǵan jergilikti sport mektepteriniń jattyqtyrýshylaryna úkim shyqty. Prosestiń qatysýshylary bir jyldan eki jylǵa deıin bas bostandyǵynan aıyryldy.
Basylym málimetinshe, mundaı prosester jaqyn arada kóp bolýy da múmkin, óıtkeni sheneýnikterdiń aıla-amaldary týraly tanymal sportshylar da ashyq aıta bastaǵan.
Solardyń biri UBO World Champion jáne WBC International boıynsha áıelder boksynda jeńil salmaqtaǵy belbeýdiń ıegeri Angelına Lýkas boldy. 17 naýryzda telejúrgizýshi Dınara Satjannyń suhbatynda ol Qazaqstan quramasyndaǵy keıbir jaıttar týraly aıtty.
«NELİKTEN AZIA OIYNDARYNYŃ ALDYNDA, ÁLEM CHEMPIONATTARYNYŃ ALDYNDA BARLYǴY JINALYP, KALÁN ÁKELİP, İSHİP, SHEGEDİ? BİRAQ BUL TÝRALY ESHQASHAN AITQAN EMESPİN», — DEDİ OL.
Sonymen qatar, Angelına Lýkas «etıkalyq sebepter boıynsha» Qazaqstan quramasynan shyǵarylǵannan keıin kásibı boksqa aýysqan bolatyn. Ol qazaqstandyq sportshylardyń tabysy az ekenin de aıtty, sonyń saldarynan olardy basqa elderdiń ókilderi satyp alýǵa tyrysyp jatyr.
Angelına Lýkastyń sózderin AQSH-ta turatyn taǵy bir sportshy Aıda Satybaldınova rastady. Al jaýaptylar Lýkastyń synyna eshqandaı reaksıa jasaǵan joq.
Sport komentatory Aleksandr Láhov tenıs týrnırlerin, hokeı jáne fýtbol machterin únemi jarıalap otyrady, ol mundaı jaıttar birinshi ret emes ekenin aıtty.
Onyń sózinshe, sport salasyndaǵy sheneýnikter tipti Toqaevtyń qoldaýymen balalarǵa tegin shyǵarmashylyq úıirmeler men sport seksıalaryn ashýǵa baǵyttalǵan «ArtSport» baǵdarlamasyna da qol salǵan.
«Jaǵdaıdy tek joǵarydan bastap ózgertýge bolady. Kásibı sportty búdjetten qarjylandyrýdy toqtatý kerek. Biraq men tipti muny fýtbolda da kórmeımin», — dedi ol.
Tanymal sport jýrnalısi Leonıd Iýrev te osyǵan uqsas pikirde.
«QAZAQSTANDAǴY SPORT — JYLDAR BOIY ÚLKEN QARJYNY ESH BAQYLAÝSYZ SORYP KELE JATQAN QARA TESİK. EGER MEMLEKETTİŃ SPORTTY DAMYTÝǴA JUMSAITYN JALPY SHYǴYNYN ALSAQ, OLAR DENSAÝLYQ SAQTAÝ MEN BİLİM BERÝ SHYǴYNDARYNAN SÁL ǴANA AZ», — DEIDİ OL.
Onyń aıtýynsha, sybaılas jemqorlyqqa qarsy qyzmet byltyr jeltoqsanda sporttaǵy sybaılas jemqorlyq mámileleri týraly aqparat jınaý bastalǵanyn jarıalap, sportshylardy osy proseske belsendi qatysýǵa shaqyrdy.
«Meniń oıymsha, bul tolyq oılastyrylmaǵan. Qazaqstanda sport burynǵydaı ári qarjylyq jaǵynan ashyq emes emes kúıde qala beredi. Sport federasıalary esep bermeıdi. Olar qoǵamdyq uıymdar sanalatyndyqtan, olardyń qyzmetin memleketke tekserý qıynǵa soǵady», — dedi Iýrev.
