Qazaqstan men Ózbekstan yntymaqtastyqty odan ári keńeıte beredi. Syrtqy ister mınıstrlginiń resmı saıty Qazaqstan Respýblıkasy syrtqy saıası vedomstvosynyń basshysy Beıbit Atamqulov Ortalyq Azıa jáne AQSH syrtqy ister mınıstrlikteri basshylarynyń «S5+1» otyrysyna qatysý úshin Qazaqstanǵa kelgen Ózbekstan Respýblıkasynyń Syrtqy ister mınıstri Abdýlazız Kamılovpen kelissózder ótkizgenin habarlady.
Syrtqy saıası vedomstvo taratqan aqparat boıynsha, taraptar osy jyldyń 14-15 sáýirinde QR Prezıdenti Qasym-Jomart Toqaevtyń Ózbekstanǵa jasaǵan memlekettik sapary jáne 21 maýsymda Tashkent qalasynda Úkimet basshylary deńgeıinde qazaq-ózbek úkimetaralyq komısıasynyń 18-shi májilisin tabysty ótkizý barysynda qol jetkizilgen ýaǵdalastyqtar sheńberinde Qazaqstan men Ózbekstan arasyndaǵy saıası dıalogtyń damýy men saýda-ekonomıkalyq yntymaqtastyqtyń keńeıýin qanaǵattanarlyqpen atap ótti.
Sonymen birge, A.Kamılov Qazaqstannyń syrtqy ister mınıstrin Ózbekstanǵa resmı saparmen kelip qaıtýǵa shaqyrdy.
Mınıstrler ózara saýdanyń turaqty ósýin qamtamasyz etý úshin qolaıly jaǵdaılar jasaýǵa nazar aýdardy, ol 2018 jyly 25%-ǵa ósip, 2,5 mlrd. AQSH dollaryn qurady, sondaı-aq ónerkásip pen kólik salasyndaǵy birlesken iri jobalardy iske asyrýǵa basa nazar aýdardy. Eki jaqty taýar aınalymyn taıaý jyldary 5 mlrd. dollarǵa deıin kóterý josparlanyp otyr.
Elder arasyndaǵy mádenı-gýmanıtarlyq baılanystardy odan ári nyǵaıtýdyń, onyń ishinde «Qazaqstannyń Ózbekstandaǵy jylyn» tabysty ótkizýdiń mańyzdylyǵy atap ótildi.
Kezdesý barysynda sondaı-aq óńirlik kún tártibindegi keń aýqymdy máseleler talqylandy. Taraptar Ortalyq Azıa memleketteri basshylarynyń ekinshi Konsýltatıvtik kezdesýin tabysty ótkizýge múddeliligin rastady.
Sýretter http://mfa.gov.kz saıtynan alyndy.