Qazaqstan kórshiles elderge gýmanıtarlyq kómek kórsetýde. Bul týraly QR SİM habarlaıdy.
Gýmanıtarlyq kómek – bul álemdik qoǵamdastyq múshelerine ózara qoldaý kórsetýdiń jalpy qabyldanǵan halyqaralyq tájirıbesi. Búgingi tańda COVID-19 ǵalamdyq pandemıasy jaǵdaıynda kóptegen elder osy zaman talabyna qarsy kúreste múmkindikterdi arttyrý maqsatynda bir-birine túrli kómek kórsetýde.
Qazaqstan da bul úderiske belsendi qatysýda. Pandemıaǵa qarsy is-qımyl kezeńinde kórshiles elderge ekonomıkalyq qoldaý kórsetýge umtyla otyryp, Qazaqstan Prezıdenti Q.Toqaev Qyrǵyzstan men Tájikstanǵa jalpy quny 3 mln AQSH dollarynan astam somaǵa árqaısyna 5 myń tonna kóleminde qazaqstandyq un jetkizý túrinde gýmanıtarlyq kómek kórsetý týraly sheshim qabyldady.
Sheshim halyqty azyq-túlikpen úzdiksiz qamtamasyz etý maqsatynda qyrǵyz jáne tájik taraptarynyń resmı ótinishterine baılanysty qabyldandy.
Qazaqstan Prezıdenti Q. Toqaevpen telefon arqyly sóılesý barysynda Tájikstan Prezıdenti E.Rahmon tájik halqyna osy qıyn kezeńde qoldaý bildirip, gýmanıtarlyq kómek kórsetkeni úshin alǵysyn bildirdi.
Ol, sondaı-aq, Tájikstan azamattaryn Otanyna jetkizýge yqpal etkeni jáne Qazaqstan aýmaǵy arqyly júkterdi tasymaldaýǵa kómekteskeni úshin rızashylyǵyn bildirdi. Sonymen qatar, Qazaqstan jáne Qyrǵyzstan Syrtqy ister mınıstrleri M.Tileýberdi men Ch.Aıdarbekov telefon arqyly sóılesý barysynda qyrǵyz tarapy Qazaqstanǵa gýmanıtarlyq kómek kórsetý týraly sheshim qabyldaǵany úshin shyn júrekten alǵys bildirdi.
Jaqyn arada atalǵan júkter Qyrǵyzstan men Tájikstanda jetkiziletin bolady. Qazaqstan, halyqaralyq qoǵamdastyqtyń jaýapty múshesi retinde, jahandyq koronavırýstyq pandemıa jaǵdaıynda shet qalmaıdy jáne seriktes elderge qajetti gýmanıtarlyq kómek kórsetýdi jalǵastyrýda.
Atap aıtqanda, osy jyldyń aqpanda COVID-19 indetiniń órship turǵan kezinde Qazaqstan alǵashqylardyń biri bolyp Qytaıǵa medısınalyq qorǵaý quraldaryn birneshe ret jetkizý arqyly áriptestik qoldaý kórsetti.
Jalpy gýmanıtarlyq kómek kórsetý Qazaqstannyń syrtqy saıasatynyń mańyzdy baǵyttarynyń biri bolyp tabylady. Ótken jyldary Qazaqstan Antıgýa men Barbýda, Aýǵanstan, Bangladesh, Qyrǵyzstan, Moldova, Mońǵolıa, Mánma, Pákistan, Serbıa, Sırıa, Túrkıa, Japonıa jáne t. b. elderge ártúrli kómek jibergen bolatyn.
