Búgin ortalyq komýnıkasıalar qyzmetinde «Qazaqstan» teleradıokorporasıasynyń Digital platformadaǵy jańa jobalary men Dımash Qudaıbergenniń 29 maýsym kúni Nur-Sultanda ótetin «Arnau» konsertine arnalǵan baspasóz konferensıasy ótti.
Shara barysynda «Qazaqstan» RTRK» AQ Basqarma tóraǵasy Erlan Qarın «Kinomax» jańa mobıldik qosymshasynyń iske qosylýy jaıynda jáne «Arnau» konsertiniń daıyndyq barysy jónindegi jańalyqtardy aıtyp berdi. «Qazir sıfrlandyrý dáýiri, sondyqtan kórermenderdiń kóbisi áleýmettik jelilerde, túrli ınternet saıttarda ózderine qyzyqty da qajetti kontentti taýyp, tamashalaı alady. Tańdaý kóp, sondyqtan tanymal trendterge sáıkes keletin kontent jasaýshylar sany kúnnen-kúnge kóbeıip keledi, básekelestik kúsheıe túsýde. Osy oraıda «Qazaqstan» korporasıasy zaman talabyna saı jumys isteýde. «Ótken jyly «Qazaqstan Tv» mobıldik qosymshasyn iske qosqan bolatynbyz, sol arqyly telearnalarymyzdyń jobalaryn onlaın rejımde kórý múmkindigi paıda boldy. Azdaǵan ýaqyttyń ishinde qosymshany jarty mıllıonnan astam qoldanýshy júktep aldy. Sondaı-aq áleýmettik jelilerdegi jeke akkaýnttarymyzda jazylýshylar sany 1 599 762 adamǵa jetti. Al «Qazaqstan Tv» Youtube arnasynyń jazylýshylar sany mıllıonǵa jetip otyr, sondyqtan qazirgi sátte elimizdegi memlekettik telearnalardyń ishinde eń aldyńǵy orynda tur. Maýsym aıynda «Youtub-tyń altyn batyrmasyn» ıelenýimiz ábden múmkin. Odan basqa, korporasıamyzǵa qarasty barlyq akkaýnttar men domender Qazaqstan Tv-ge aýystyryldy. Jastar jyly aıasynda Youtube arnamyzda jastarǵa arnalǵan sıtkom daıyndap jatyrmyz, ol týraly keıinirek bilesizder», - dedi Basqarma tóraǵasy Erlan Tynymbaıuly. Sonymen qatar ol korporasıanyń jańadan iske qosylǵan «Kinomax» mobıldi qosymshasyn tanystyrdy.
«KINOMAX» MOBILDİ QOSYMSHASY BARSHAǴA QOLAILY
«Búgin Sizderdiń nazarlaryńyzǵa usynyp otyrǵan «Kinomax» mobıldi qosymshasy – bul Andriod jáne IOS platformalarynda táýligine 24 saǵat boıy qoljetimdi vıdeoservıs. Osy qosymsha arqyly otandyq telehıkaıalar, kórkem jáne derekti fılmder, anımasıalyq fılmderdi onlaın rejımmen qatar, offlaın rejımde de kórýge bolady. Qosymshada «Kinomax-tegi jańa fılmder» degen aıdarda jańadan engizilgen kınotýyndylar jınalǵan, «Osy aptada tanymal» bóliminde qoldanýshylardyń arasynda tanymal, joǵary baǵalanǵan kontent, al «Dál qazir kórýde» - sol sátte qoldanýshylardyń tamashalap jatqan kontentin kóre alasyzdar. Sonymen qatar, kishkentaı búldirshinder úshin «Balapan» rejımi qarastyrylǵan. Bul toptamada «balapan» telearnasynyń baǵdarlamalary, anımasıalyq fılmder usynylǵan. Bul vıdeoservıs otandyq kontentti damytýmen qatar, aýdıtorıa suranysyna saı sapaly jobalardy usyný maqsatynda iske asyryldy. Osy arqyly biz kórermenderimizdiń talǵamyn eskerip, básekege qabiletti jáne túrli janrlardaǵy kontentti usynýdy kózdeımiz»,-dedi Erlan Qarın.
DIMASHTYŃ KONSERTİNE KÓPTEGEN ELDERDEN KÓRERMEN KELEDİ
Budan soń taqyryp Dımash Qudaıbergenniń konsertine daıyndyq barysy jaıyna oıysty. Týma talanttyń konsertine keletinderdiń qarasy kún sanap artyp, áleminiń ár túkpirinen bılet satyp ala bastapty. «Konsertke bılet satyp alýshylardyń eń kóbi qazaqstandyqtar, odan keıin Reseı, AQSH, Qytaı, Ulybrıtanıa, Fransıa, Germanıa, Japonıa, Túrkıa, Nıderlandy, Rýmynıa, Polsha jáne t.b. Eń alys elderdiń arasynda Brazılıa, Meksıka, Afrıka, Kanada, Avstralıa. Bıletter satylymǵa shyqqan alǵashqy kúni 6926 bılet (30%) satylǵan. Bir aptadan keıin bıletter satylymy 11099-ǵa (48,2%) jetken. Búginde satylym 66%-dy qurady, ıaǵnı, 15156 bılet satyldy. Dımashtyń konsertine kelem deýshilerdiń sany óte kóp, úlken anshlagpen ótedi. Dımashtyń daýysy – bul adamdardyń júregin jaýlap alatyn, erekshe ımpúls, bylaı aıtqanda «Kinetic Voice» (ot grech. Kinetikos – qımylǵa ákeletin áreket). Bul - Dımashtyń konsertiniń basty konsepsıasy. Shoý kınetıkalyq stılde qurylǵan, onyń obrazyna deıin ımıjmeıkerlermen keńinen oılastyrylǵan. Ár nomer – ortaq ıdeıany jetkizetin jeke oqıǵa, mını-spektakl deýge bolady. Qazirgi sátte barlyq tehnıkalyq jaǵdaılar, mýltımedıalyq sheshimder, sahnanyń árlenýi, dybys pen jaryq máselesi sheshildi. Endi dekorasıa men rekvızıt qarastyrylyp jatyr. Konserttin telenusqasyn sapaly túsirý jumystary da oılastyrylýda, aldaǵy 3 aıǵa jospar qurylǵan. Shyǵarmashylyq toppen mýzykalyq materıaldar, qoıylym jumystary men grafıkalyq sheshimder tolyq iske asyrylyp jatyr. Konsertke qatysatyn túrli janrdaǵy bıshiler tobyna arnaıy kastıng júrgizildi. Kastıng qorytyndysy boıynsha halyqaralyq alańdarda óner kórsetken elimizdiń eń myqty bıshileri qatysatyn boldy». Taǵy da bir jańalyq, 1 mamyr kúni Ulttyq arna efırinen Dımashtyń Naýryzda Máskeýdegi Kreml saraıynda ótken konserti kórsetiledi. Sondaı-aq, korporasıa Dımash týraly derekti fılmniń túsirilimin bastap ketti. Bul týyndyda Dımashtyń ómiri, shyǵarmashylyǵy jaıly baıandalady.
