Valúta baǵamy
  • USD -

    523.5
  • EUR -

    613.5
  • RUB -

    6.71
Qazaqstan Jazýshylar odaǵynyń 90 jyldyǵy atalyp ótildi
Foto: Jazýshylar odaǵy 13 jeltoqsan 2024
Qazaqstan Jazýshylar odaǵynyń 90 jyldyǵy atalyp ótildi

13 jeltoqsanda Almaty qalasynda qazaq qalamgerleriniń qara shańyraǵy Qazaqstan Jazýshylar odaǵynyń 90 jyldyǵyna arnalǵan saltanatty shara ótti. Odaqtyń mereıtoıy – jazýshylar úshin ǵana emes, barsha kózi qaraqty qaýym úshin tarıhı máni zor oqıǵa.

Saltanatty jıynǵa Qazaqstan Respýblıkasynyń Memlekettik keńesshisi Erlan Qarın, Mádenıet jáne aqparat mınıstri Aıda Balaeva, TÚRKSOI halyqaralyq uıymynyń bas hatshysy Sultan Raev, Eýrazıa Jazýshylar odaǵynyń prezıdenti Ýfýk Týzman qatysty.

Memlekettik keńesshi Erlan Qarın Qazaqstan Respýblıkasynyń Prezıdenti Qasym-Jomart Toqaevtyń Odaqtyń 90 jyldyǵyna oraı joldaǵan quttyqtaý hatyn oqyp berdi. Memleket basshysynyń hatynda «Jazýshylar odaǵy – rýhanıatymyzdyń altyn dińgegi. Bul uıym qalamgerlerimizdiń kásibı qaýymdastyǵy retinde tól ádebıetimiz ben mádenıetimizdi órkendetýge jáne ony álemge tanytýǵa zor yqpal etedi. Sóz óneriniń qarashańyraǵyn ulttyq biregeıligimizdiń berik tuǵyry deýge bolady. Qazir biz ulttyń jańa sapasyn qalyptastyryp jatyrmyz. Ozyq oıly urpaq tárbıeleý isinde zıaly qaýym aıryqsha ról atqarýy kerek. Osy jaýapkershilikti tereń sezinip, adamgershilik qundylyqtardy keńinen dáriptep júrgen barsha qalamgerlerge shynaıy rızashylyǵymdy bildiremin» delingen.

Saltanatty jıynǵa arnaıy kelgen Qyrǵyz Respýblıkasy Prezıdentiniń keńesshisi Arslan Qoıshıev Qyrǵyz Respýblıkasynyń Prezıdenti Sadyr Japarovtyń quttyqtaýyn jetkizdi.

 ***

Ulttyq ádebıetti qoldaý máselesi udaıy Memleket basshysynyń basty nazarynda. 

2023 jyly Qasym-Jomart Toqaevtyń qoldaýymen  «Qazaqstannyń Halyq jazýshysy» ataǵy qaıtaryldy.

Qazaqstan Jazýshylar odaǵynyń 90 jyldyǵyna oraı joldaǵan quttyqtaý hatynda Qasym-Jomart Kemeluly «Ádebıet – oıymyzdyń tereńdigi men rýhymyzdyń asqaqtyǵyn aıǵaqtaıtyn uly qazyna. Ony zaman talabyna saı damytý – qalamger qaýymnyń ǵana emes, memleketimizdiń aldynda turǵan mańyzdy mindettiń biri» dep atap ótti.

Memleket basshysy óziniń qalamgerlerge joldaǵan quttyqtaý hatynda aqyn-jazýshylardyń ultty uıystyrý jolynda qaltqysyz qyzmet etip júrgenin atap kórsetken. «Aǵa býyn negizin qalaǵan osy ulaǵatty dástúr úzdiksiz jalǵasyp keledi» delingen hatta.

 ***

Ǵasyrǵa jýyq tarıhy bar Qazaqstan Jazýshylar odaǵy – ultymyzdyń rýhanı kemeldenýine zor úles qosqan, san ǵasyrlyq mádenı muramyzdy jańǵyrtyp, óleń men jyrdyń kıeli besigin terbep kele jatqan shyǵarmashylyq ortalyq.

Qazirgi tańda Jazýshylar odaǵy –  1015 múshesi bar elimizdegi eń iri shyǵarmashylyq birlestikterdiń biri.

Memleket basshysy Qasym-Jomart Toqaev buǵan deıin  «Jazýshylar odaǵy – ulttyq ıntellıgensıanyń basyn qosyp otyrǵan qara shańyraq» dep osynaý tarıhy tereń uıymǵa joǵary baǵa bergen.

Odaqtyń 90 jyldyǵyna mereıtoıǵa alys-jaqyn sheteldik qonaqtar – TÚRKSOI halyqaralyq uıymynyń bas hatshysy, Eýrazıa Jazýshylar odaǵynyń tóraǵasy, TMD jáne Eýropa elderiniń Jazýshylar odaqtarynyń tóraǵalary, Shvesıa, Reseı, Túrkıa, Qytaı, Ázirbaıjan, Ózbekstan, Qyrǵyzstan, Mońǵolıa, Tatarstan, Bashqurtstan elderinen kelgen mádenıet pen ádebıet ókilderi, sondaı-aq elimizdiń túkpir-túkpirinen kelgen aqyn-jazýshylar, zıaly qaýym men otandyq bıznes ókilderi qatysyp, olardyń barlyǵy derlik sóz sóılep, quttyqtady.

Jazýshylar odaǵynyń 90 jyldyǵyna arnalǵan saltanatty jıynda «Ádebıet – rýhanı damýdyń qozǵaýshy kúshi, qoǵam turaqtylyǵynyń kepili» taqyrybynda baıandama jasaǵan Odaqtyń qazirgi tóraǵasy Mereke Qulkenov «Búginde biz Ádiletti Qazaqstanǵa qadam bastyq. Qazirgi qazaq ádebıeti de jańarý ústinde dep nyq senimmen aıta alamyz. Tyń da tosyn taqyryptar, jańa janrlar,  sony stılder, ambısıasy zor avtorlar ádebı proseske jańasha serpin berýde» dep atap ótti.

 ***

Alys-jaqyn shetelden kelgen qonaqtar Jazýshylar odaǵynyń 90 jyldyq mereıtoıymen quttyqtap, sóz sóıledi.

 Halyqaralyq TÚRKSOI túrkitildes mádenıeti uıymynyń bas hatshysy Sultan Raev:

«...Jazýshylar Odaǵynyń tarıhy tereń jáne onyń shyǵarmashylyq joly qazaq ádebıetiniń altyn qoryna aınaldy. Osy 90 jyl ishinde sizderdiń qalamdaryńyzdan týǵan shyǵarmalar kóptegen urpaq úshin rýhanı azyqqa aınaldy. Ulttyń mádenıeti men tarıhyn, salt-dástúrin, tutastyǵyn qalammen órnektep, tek qazaq jurtyna ǵana emes, álemge de tanyttyńyzdar.

TÚRKSOI uıymy Qazaqstan Jazýshylar odaǵynyń shyǵarmashylyǵyna úlken qurmetpen qaraıdy. Sizderdiń týyndylaryńyzdyń túrki halyqtarynyń ádebıeti men mádenıetine qosqan úlesi zor. Ádebıet – halyqtar arasyndaǵy kópir, al sizder sol kópirdi myqtap baılanystyryp, túrki áleminiń rýhanı birligin qalyptastyrýǵa óz úlesterińizdi qosyp kele jatyrsyzdar. Bul 90 jyldyq mereıtoı – tek Qazaqstannyń ádebıeti úshin emes, búkil túrki álemi úshin úlken jetistik».

 Qyrǵyz Respýblıkasy Ulttyq Jazýshylar odaǵynyń Tóraǵasy Qanybek Imanalıev:

«...Álem ádebıetiniń qazynasyn baıytqan rýhanı álemde qazaq ádebıetiniń alar orny erekshe. San ǵasyrlyq qazaq epostarynan keıin  qazaq jazba ádebıetiniń de juldyzy jarqyrap, álemge tanylǵan uly qalamgerlerdi týdyrdy!

Qazaq jazba ádebıetiniń basynda turǵan Abaı Qunanbaevtyń esimin bul kúnde kim bilmeıdi!

Kemeńger jazýshy Muhtar Áýezov «Abaı joly» romanynda uly dalanyń uly perzentiniń dańqty ómir jolyn ǵana emes, ótken dáýirdegi búkil qazaq halqynyń ómir saltyn kórkem sýrettep, keler urpaqqa jetetin ólmes shyǵarmaǵa aınaldyryp, máńgilik mura etip qaldyrǵanyn maqtanyshpen aıtamyz».

 Tatarstan Jazýshylar odaǵynyń tóraǵasy Rkaıl Zaıdýllın:

«...Qazaqstan men Tatarstan arasyndaǵy dostyq pen kásibı qarym-qatynas ta ejelden berik ornaǵan. Biz Qazaqstandaǵy ádebı keshterge belsene qatysamyz, qazaq elindegi rýhanı jıyndardy jaqsy kóremiz jáne qazaq qalamgerlerin óz elimizde qýana qarsy alamyz. Biz – qanymyzben de, janymyzben de bir týǵan aǵaıyndy ultpyz, júregimizdiń qyly árdaıym birge jyrlaıdy. Bul birligimiz – bizdiń ortaq tarıhymyz ben búgingi baýyrlas ádebıetimizdiń zańdy nyshany».

***

Uıymnyń 90 jyldyǵyna arnalǵan saltanatty sharanyń aıasynda ádebı jáne qoǵamdyq mańyzy zor syılyqtar tabystaldy. Atap aıtqanda, Halyqaralyq «Alash» ádebı syılyǵymen TÚRKSOI halyqaralyq uıymynyń Bas hatshysy Sultan Raev, Ázirbaıjan Jazýshylar odaǵynyń Tóraǵasy Anar Rzaev, Túrkıa Jazýshylar odaǵynyń Tóraǵasy Mýsa Kazym Aryjan, Qyrǵyzstannyń El jazýshysy Arslan Qoıshıev, Ózbekstannyń Halyq jazýshysy Ýsmankýl Azımov marapattaldy.

Memlekettik keńesshiniń úsh tóraǵany bóle-jarmaı birdeı qurmet kórsetip, shapan jabýy - qalamgerler arasyndaǵy birliktiń sımvoly.

«Qazaqstannyń Qurmetti jazýshysy» ataǵy Eýrazıa Jazýshylar odaǵynyń prezıdenti Ýfýk Týzmanǵa, Ázerbaıjan Jazýshylar Odaǵynyń hatshysy, aqyn Rashad Majıtovke, Shved jazýshysy, ádebıet zertteýshisi Paýel Frııeske, Qyrǵyz Respýblıkasy Ulttyq Jazýshylar odaǵynyń Tóraǵasy Qanybek Imanalıevke, Tatarstan Jazýshylar odaǵynyń Tóraǵasy Rkaıl Zaıdýllınge, aqyn Nurlanbek Qalybaevqa, Ózbekstan Jazýshylar odaǵy Tóraǵasynyń orynbasary Majıd Gaıratqa, Bashqurtstan  Jazýshylar odaǵynyń Tóraǵasy Aıgız Baımýhametovke, Reseı  jazýshysy Andreı Reızvyhke, Iakýtıa Jazýshylar odaǵynyń   Tóraǵasy, «Cholbon» jýrnalynyń bas redaktory Gavrıl Androsovqa, Chývash Respýblıkasy Jazýshylar odaǵy basqarma tóraǵasynyń orynbasary Vasılıı Zaharovqa tabystaldy.

Qazaqstan Jazýshylar odaǵynyń «Asyl sóz» ádebı syılyǵy poezıa nomınasıasy boıynsha Baıbota Qoshym-Noǵaıǵa, al proza nomınasıasy boıynsha Tursynjan Shapaıǵa buıyrdy.

Sonymen qatar, ádebıet pen rýhanıattyń damýyna qoldaý kórsetip júrgen mesenattarǵa beretin «Atymtaı Jomart» medalimen bir top kásipkerler marapattaldy.

 

RELATED NEWS
«Úzdik bolý úshin kóp jumys isteý kerek» - Dımash Euronews-ke suhbat berdi
18 qyrkúıek 2024
«Úzdik bolý úshin kóp jumys isteý kerek» - Dımash Euronews-ke suhbat berdi

 Euronews-ke eksklúzıvti suhbat bergen Dımash Qudaıbergen klasıkalyq mýzyka, qazaqtyń halyq kúıi men zamanaýı áýen astasyp jatqan biregeı shyǵarmashylyǵy jaıly aıtyp berdi. Kazinform atalǵan suhbattyń beıresmı aýdarmasyn jarıalady.

Qazaq mýzykanty Dımash Qudaıbergen jaı ǵana ánshi, án avtory ári mýltıınstrýmentalıst qana emes, ol mısıasy bar adam. Ol janrda balamasy joq vırtýoz vokalymen jáne mýzykasymen álemdik aýdıtorıaǵa Qazaqstannyń baı mádenıeti men salt-dástúrin jetkizýge nıetti. Álemdik týrneden keıin Otanyna oralǵan Dımash Astanada V Dúnıejúzilik kóshpendiler oıynyń jabylýyn eki kúndik konsertimen aıshyqtaı tústi.

Dımash Euronews-ke bergen eksklúzıvti suhbatynda mansap jolyna, mýzyka stıliniń damýyna jáne oıynnyń (Dúnıejúzilik kóshpendiler oıyny) Qazaqstan murasyn pash etýde biregeı alań bolǵanyna qatysty oıymen bólisti.

– Siz klasıkalyq bilim aldyńyz ári «Astana-Operadan» oryn da usynyldy. Biraq klasıkalyq elementterdi dástúrli qazaq jáne pop-mýzykamen úılestire otyryp, zamanaýı mýzykant mansabyn tańdadyńyz. Osynaý biregeı qospany qalaı jasaı aldyńyz?

– Astanadaǵy opera dırektory meni ózderimen birge jumys isteýge shaqyrǵany esimde. Biraq barynsha ártúrli mýzykalyq janrda óner kórsetkendi qalaıtynymdy biletinmin. Endi men opera aıtqym kelse, ony konsertterimde de aıta alamyn. Mende sondaı erkindik bar. Men «Astana-Operaǵa» úlken qurmetpen qaraımyn. Birneshe aı buryn ǵana ustazym Plasıdo Domıngo meni Eýropada ózimen birge óner kórsetýge shaqyrǵan kezde armanym oryndaldy. Ol maǵan: «bul arıaǵa daıyndalý úshin eki kúniń ǵana bar», - dedi. Men bas tarta almadym.

5 jasymda, úıimizde Plasıdo Domıngo men Pavarottı óneri taspalanǵan vıdeokasseta bolatyn. Sol konsertter meniń ánshi bolýǵa degen qushtarlyǵymdy oıatty. Domıngoǵa onyń arqasynda ánshi bolǵanymdy aıttym. Oǵan uqsaǵym keldi. Vokaldyq turǵyda olar myqty.

– Ata-anańyz 5 jasyńyzda keremet daýysyńyz bar ekenin túsindi. Al ózińiz kásibı ánshi bolǵyńyz keletindigin qaı ýaqytta túsindińiz?

– Bes jasymda ájem aıaǵynyń aýyratyna qaramastan meni kún saıyn mýzyka mektebine aparatyn. Jetistikke jetip, tanymal bolyp, aqsha taba bastasam da munyń bári otbasymnyń – ata-anamnyń, ata-ájemniń jáne dostarymnyń arqasynda ekenin esimnen shyǵarmaımyn. Olardyń qoldaýynan asqan dúnıe joq. Meniń jetistigime ózimnen góri ájem laıyq.

– Qazaqstan ómirinde mádenıet pen mýzyka nelikten sonshalyqty mańyzdy?

– Dástúrli mýzykamyzǵa jete úńilgen, zer salǵan adamdar bizdiń búkil tarıhymyzdy tanyp-bile alady. Atam tórt-bes jasymda ulttyq aspabymyz – dombyrany shertýdi úıretti. Eger siz ózińizdi naǵyz qazaqpen dep esepteseńiz, onda aldymen dombyra shertýdi úırenýińiz kerek. Qazir álemdi bizdiń mádenıetimizben tanystyratyn ýaqyt keldi. Qazaqstan – jas el, egemendigine nebári – 33 jyl. Bul – muramyzdy álemdik aýdıtorıamen bólisýdiń biregeı ýaqyty.

– Ánderińizdi qalaı sıpattar edińiz?

– Burynyraq ony neoklassıkalyq dep ataıtynmyn, biraq qazir men barlyq janrdy biriktirýge tyrysamyn. Áli de bolsa neoklassıkalyq ánshimin. Alaıda, basqa stılderdi zerttegendi unatamyn — pop, rok, keıde tipti rep. Bul men úshin asa mańyzdy emes. Men bárin synap kórgim keledi.

– Siz qazaq murasyn árdaıym maqtan tutasyz ári elińizdi mýzykalyq beınebaıandaryńyzda dekorasıa retinde jıi qoldanasyz. Bul siz úshin nelikten mańyzdy?

– Qazaq bolyp týǵanyma maqtanamyn. Meniń mısıam – álemdi elimizdiń mádenıetimen, ánimen, dástúrli mýzykasymen tanystyrý. Búkil álemde, Nú-Iorkte, Eýropa men Azıada 20-30 myń adam aýdıtorıanyń aldynda óner kórsettim jáne bul meniń naǵyz tyńdarmandarymnyń arqasynda ǵana múmkin boldy.

– Siz Dúnıejúzilik kóshpendiler oıyndarynda jeke shyǵarmashylyq keshińizdi ótkizdińiz. Bul oqıǵa nelikten sonshalyqty mańyzdy?

– Osydan 6 aı buryn Úkimet Dúnıejúzilik kóshpendiler oıyndarynyń ashylý saltanatynda óner kórsetýge shaqyrdy. Birden kelistim. Óıtkeni bul oıynnyń elimiz ben mádenıetimiz úshin qanshalyqty mańyzdy ekenin jaqsy bilemin. Bul – bizdiń salt-dástúrimizdi ǵana emes, sonymen qatar sporttaǵy, at sporty oıyndaryndaǵy talanttarymyzdy kórsetýdiń tamasha múmkindigi. Azdap qobaljý bolsa da jeke konsertimniń ótkenine óte qýanyshtymyn. Basqa elde óner kórsetý ońaıyraq, biraq Qazaqstanda kesh ótkizgen bir bólek. Emtıhan tapsyrǵanmen teń.  Óıtkeni elimizde ótken konsertte meniń vokaldan sabaq bergen ustazdarym men bilikti mýzyka maıtalmandary qatysady. 

– Eger siz ótken shaqqa oralar bolsańyz, 5 jastaǵy Dımashqa qandaı aqyl-keńes berer edińiz? 

– Kóbirek jattyǵý kerek. Men 25 jyl bilim aldym, qazir 30 jasymda da PhD dárejesin alý úshin oqýymdy jalǵastyryp jatyrmyn. Eger sportta chempıon bolǵyńyz kelse, onda tynbaı jattyǵýyńyz qajet. Mýzykada da solaı – úzdik bolý úshin kóp jumys isteý, eńbektený, jattyǵý kerek. 

NURǴISA TİLENDIEV: ULT RÝHYNYŃ MUZBALAǴY
01 sáýir 2025
NURǴISA TİLENDIEV: ULT RÝHYNYŃ MUZBALAǴY

Bıyl qazaq mýzykasynyń jaryq juldyzy, uly kompozıtor, dırıjer, dombyrashy Nurǵısa Tilendıevtiń týǵanyna 100 jyl toldy. Bul mereıtoı – qazaq mádenıeti úshin aıryqsha mańyzǵa ıe oqıǵa. Qazaq mýzykasynyń abyzy, kompozıtor, dırıjer, dombyrashy Nurǵısa Tilendıevtiń qazaq rýhanıatyna qosqan súbeli úlesi zor.

Ómir joly men shyǵarmashylyq bastaýy
Nurǵısa Atabaıuly Tilendıev 1925 jyly 1 sáýirde Almaty oblysy, İle aýdany, Shılikemer aýylynda dúnıege kelgen. Dombyra tartýdy ákesinen úırengen ol, keıinnen Ahmet Jubanovtyń nazaryna iligip, mýzyka álemine qadam basty. Ahmet Jubanov jas Nurǵısany mýzyka mektebinde, keıinnen konservatorıada bilim alýǵa baǵyttady.

Soǵys jyldary
Jas Nurǵısa 1943 jyly óz erkimen maıdanǵa attanyp, Kýrsk shaıqasynan Berlınge deıingi urystarǵa qatysqan. Soǵystaǵy erligi úshin "Erligi úshin", "Berlındi alǵany úshin" jáne "Uly Otan soǵysyndaǵy jeńisi úshin" medaldarymen marapattalǵan.

Mýzykalyq mura

Nurǵısa Tilendıevtiń shyǵarmashylyǵy qazaq mýzykasynyń altyn qoryna engen. Ol 500-den astam mýzykalyq týyndynyń avtory, olardyń ishinde:

«Aqqý» kúıi – náziktik pen tazalyqtyń sımvoly;
«Kósh kerýeni» – halyqtyń kóshpeli ómirin beıneleıtin shyǵarma;
«Sarjaılaý» – týǵan jerge degen saǵynyshty jetkizetin án.
Sonymen qatar, kompozıtor «Qyz Jibek», «Meniń atym Qoja» fılmderine mýzyka jazyp, qazaq kınosynyń damýyna úles qosty.

«Otyrar sazy» orkestri 

1981 jyly Nurǵısa Tilendıevtiń bastamasymen qurylǵan "Otyrar sazy" fólklorlyq-etnografıalyq orkestri qazaqtyń ulttyq aspaptaryn nasıhattaýda úlken ról atqardy. Orkestrdiń repertýarynda halyq kúılerimen qatar, kompozıtordyń óz shyǵarmalary da oryndaldy.

Jeke ómiri 

Nurǵısa Tilendıevtiń jary Darıǵa Tilendikelinimen birge ómir súrip, otbasylyq ómirinde de ónegeli tulǵa bolǵan. Olardyń mahabbaty men syılastyǵy kóptegen shyǵarmalaryna shabyt bergen.

Murasy jáne eske alý

Nurǵısa Tilendıevtiń esimi qazaq mýzykasynyń sımvolyna aınaldy. Onyń qurmetine Almaty qalasynda memorıaldy mýzeı ashylyp, shyǵarmashylyq murasy urpaqtan-urpaqqa jalǵasýda.

Djennıfer Lopes Astanaǵa konsert berýge keledi
08 sáýir 2025
Djennıfer Lopes Astanaǵa konsert berýge keledi

Amerıkalyq sýperjuldyz Djennıfer Lopes óziniń Up All Night álemdik týrnesi aıasynda osy jazda Qazaqstannyń astanasynda óner kórsetedi. Bul týraly týrdyń resmı paraqshasynda jarıalandy, dep habarlaıdy Ulys.

Álemdik juldyz Qazaqstanda alǵash ret konsert beredi, ol 1 tamyzda elordalyq «Astana Arena» sport kesheniniń sahnasynda ótedi.

"Osy jazda birneshe tańdaýly shoýda óner kórsetemin. Sahnaǵa qaıta oralyp, bárińizben júzdesýdi asyǵa kútemin. Tym kóp ýaqyt ótti. Bul keremet jaz bolady", - dep jazdy ánshi 7 sáýirde.

Biz týraly
ulys.kz — aqparattyq, saraptamalyq jáne tanymdyq baǵyttaǵy materıaldardy beredi.
 
Mýltımedıalyq joba zaman talabyna saı jasalǵan. Qazaqstannyń aqparattyq naryǵyn sapaly
kontentpen qamtamasyz etýge úles qosýǵa baǵyttalǵan. Mundaǵy saraptamalyq, tanymdyq
maqalalar san salany qamtıdy. Geostrategıa, geoekonomıka, geosaıasat, halyqaralyq
qatynastar men eldiń ishki-syrtqy saıasaty, ekonomıka, jahanda bolyp jatqan tektonıkalyq
ózgerister men trend taqyryptar ulttyq múdde turǵysynan tereń taldanyp qazaq
oqyrmandaryna jetkiziledi. Ortalyq Azıa men Túrki álemine erekshe kóńil bólinedi.