Qazaqstannyń Túrkıadaǵy Elshisi Abzal Saparbekuly Túrkıa Uly Ulttyq Májilisiniń tóraǵasy Bınalı Iyldyrymmen kezdesti. Jyly atmosferada ótken kezdesý barysynda Qazaqstan men Túrkıanyń ekijaqty jáne kópjaqty yntymaqtastyǵyna qatysty birqatar máseleler talqylandy. Bul týraly aqparat Túrkıadaǵy elshiliktiń áleýmettik jelidegi paraqshasynda jazyldy.
Qazaqstannyń halyqaralyq arenadaǵy bedeliniń udaıy ósip kele jatqanyn tilge tıek etken Bınalı Iyldyrym Qazaqstan Prezıdenti Nursúltan Nazarbaevtyń Ortalyq Azıa men Túrki álemindegi yntymaqtastyqty damytýdaǵy rólin aıryqsha atap ótti. Túrik spıkeriniń paıymdaýynsha, Reseı, Qytaı, AQSH sıaqty alpaýyt memleketter Qazaqstannyń basshysyn erekshe qurmetteıdi jáne keńesterine qulaq asady. Ol, sondaı-aq, Túrkıa basshylyǵynyń da Elbasyǵa degen erekshe iltıpatyna toqtalyp, Qazaqstanda júrgizilip jatqan syndarly syrtqy saıasat, sonyń ishinde Astana prosesi úshin alǵysyn bildirdi.
Óz kezeginde, elshi Abzal Saparbekuly Qazaqstan men Túrkıanyń strategıalyq áriptester ekendigine nazar aýdaryp, ótken 2018 jyldyń eijaqty qarym-qatynas turǵysynan óte jemisti bolǵanyn atap ótti. Osynyń dáleli retinde bir jyldyń ishinde Túrkıaǵa Qazaqstan Prezıdenti, Premer-Mınıstri, Senat jáne Májilis Tóraǵalary, Memlekettik hatshy, Syrtqy ister mınıstri jáne basqa da mınıstrler men joǵary laýazymdy tulǵalar deńgeıindegi saparlardyń ótkenin keltirdi.
Elshi sondaı-aq Ortalyq Azıada bolyp jatqan jaqyndasý úderisterge keńirek toqtalyp, ótken jyly Astanada atalǵan aımaqtyń memleket basshylarynyń alǵashqy samıti ótkenine nazar aýdardy. Bul rette ol Túrkıanyń da Ortalyq Azıa úshin saıası jáne ekonomıkalyq turǵydan mańyzdy seriktes ekenin de atap ótti.
Taraptar bunyń syrtynda eki el arasyndaǵy saıası, saýda-ekonomıkalyq, zańshyǵarýshylyq salalaryndaǵy yntymaqtastyq máselelerine toqtaldy. Atap aıtqanda, túrki spıkeri Astanada ornalasqan Azyq-túlik qaýipsizdigi jónindegi Islam Uıymyna qatysty tıisti zańnyń Túrkıa Parlamentinde jedel túrde qabyldanýyn qamtamasyz etýge ýáde berdi.
