Ulttyq mýzyka taqyrybyndaǵy Qazaq radıosynyń redaktor-júrgizýshisi Jadyra Jumakúlbaı
Anglıanyń BBC Radio 3 arnasynyń usynysymen qazaqtyń mýzykasy týraly aǵylshyn tilinde
habar daıyndady.
BBC Radio 3 – mýzykalyq baǵyttaǵy radıo. Ol ártúrli janrdaǵy mýzyka týraly habarlar
usynady. «Music Planet: Road Trip» habary – álem halyqtarynyń tól mýzykalyq ónerine
arnalady. Osy baǵytta telearna, gazet, radıoǵa habar jasap júrgen Jadyra BBC-likterge
kóktemde «QAZAQ RADIOLARY» seriktestigi shyǵarǵan «Dala fólklorynyń antologıasy»
negizinde baǵdarlama jasaý jóninde usynyspen habarlasqan. Ózderi qalamasa, ózgeniń
aıtqanymen júrmeıtin syrbaz aǵylshyndar antologıaǵa qandaı materıaldar engeni týrasynda
Jadyradan hat-habar alysyp otyryp, Londondaǵy BBC-diń bas shtabynda arnaıy kommısıa
quryp, bul máseleni qaramaqqa bel býǵan. Sheshim áli kelgen joq. Áıtkenmen, osy ýaqyt
aralyǵynda BBC Radio 3 ujymy Londondaǵy Qazaqstan Elshiligi arqyly Jadyraǵa tikeleı shyǵyp,
qazaq halqynyń tól mýzykasy týraly bir habar jasap berýdi ótingen.
Jadyra JUMAKÚLBAI, Astana radıosynyń shef-redaktory, Qazaq radıosynyń júrgizýshi-
redaktory:
«Alǵashynda olardyń Music Planet: Road Trip» baǵdarlamasyn saıttarynan qarap, tyńdap
kórdim. Ár memlekettiń mýzykalyq murasyna arnalǵan eken. Olar maǵan qazaqtyń ulttyq
mýzykasynyń ertedegi saf jáne búgingi zamanaýı óńdeýdegi birneshe nusqasyn jiberýdi surady.
Án, kúı, jyrdyń oryndaýshylyq mektepteri boıynsha eń úzdik ókilderinen 15 taspa jiberdim.
Olardyń tańdaýy tek tórt týyndyǵa tústi. Olar Bekbolat Tileýhannyń oryndaýyndaǵy
Halyq termesi «Shalqyma», Berik Júsipov «Sáýlem-aı», Talǵat Muqyshev «Arbıan qońyr»,
Erlan Rysqalı «Dýlat Babataıulynyń tolǵaýy». Men senarı jazyp jiberdim, ózderi oqıdy
eken desem, maǵan «sizdiń daýysyńyzben jasaǵanymyz jón» degen soń, alǵash ret aǵylshynsha
habar jasadym».
Habar https://www.bbc.co.uk/programmes/m0007yrw silteme boıynsha BBC Radio 3 efırine 30
tamyz kúni shyǵady. Senbiden bastap
https://www.bbc.co.uk/programmes/p02nrw3w/episodes/downloads siltemesi arqyly
baǵdarlamanyń arnaıy podkastynan kez kelgen ýaqytta tyńdap, júkteýge bolady.
Esterińizge salaıyq, Jadyra Jumakúlbaı buǵan deıin «Qazaqstan» UTA-da kórsetilgen «Alaman
aıtys», «Án aıtys», «Kúı tartys», «Dala dýman», «Aýyl sazy» baǵdarlamalarynyń redaktor-
senarısi, «1001 mamandyq» habarynyń júrgizýshi-redaktory, «Alash aınasy» gazetiniń tilshisi,
Qazaq, Shalqar radıolarynda «Aty joq kókek», «Talǵamǵa talas bar», «Bilim keńistigi», «Meniń
Qazaqstanym», «Ult tarıhy» baǵdarlamalarynyń redaktor-júrgizýshisi qyzmetterin atqarǵan.
«Bolashaq» stıpendıasynyń ıegeri, Anglıanyń Lester ýnıversıtetiniń túlegi.
