Almatyda «Alatau-Aqparat» medıaholdıngi men Qyrǵyz ulttyq «Kabar» aqparattyq agenttigiarasynda ózara yntymaqtastyq týralymemorandýmǵa qol qoıyldy. Bul mańyzdy qujat qos eldiń medıa keńistigin jaqyndastyryp, aqparattyq seriktestikti jańa deńgeıge kóteredi.

Saltanatty is-sharada Qyrǵyz Respýblıkasynyń Bas konsýly Jenıshbek Asankýlov «Memleket basshylary Qasym-Jomart Toqaev pen Sadyr Japarovtyń jetekshiligimen ekijaqty baılanys barlyq salada qarqyn alyp keledi. Bul memorandým – baýyrlastyqtyń kezekti bir jarqyn kórinisi. Almaty óńiri – Qyrǵyz eli úshin strategıalyq ári rýhanı mańyzy bar aımaq. Biz aqparat salasyndaǵy baılanystardyń artatynyna qýanamyz», – dedi.

«Kabar» agenttiginiń dırektory Mederbek Shermetalıev te bul áriptestikti joǵary baǵalap, bolashaq birlesken jobalar týraly pikir bildirdi.

- Qazaqstan Respýblıkasynyń «Alatau Aqparat» medıaholdıngi men Qyrǵyz ulttyq «Kabar» agenttigi ózara yntymaqtastyq týraly kelisim jasady. Menińshe, bul kelisim eki jaqqa da jemisti bolady. Sebebi biz Ortalyq Azıa óńirdegi týysqan halyqtarmyz jáne aqparat taratýda tyǵyz yntymaqtastyqta jumys isteýimiz kerek. Qazir ózara baılanys ornattyq, endi jumysymyz nátıjeli bolady dep úmittenemiz, – dedi Mederbek Shermetalıev.

«Alatau Aqparat» medıaholdınginiń Bas dırektory Erjan Qalymbaıuly «Ejelden enshisi bólinbegen eki eldiń BAQ salasyndaǵy baılanysy óte mańyzdy. Jahandanǵan dáýirde eń jaqyn baýyr ári kórshi elmen ásirese, aqparat salasyndaǵy birlik, túsinistik pen qoldaýdy arttyrý zaman talaby.    Bir-birimizden úırenetin ári bir-birimizge úıretetin dúnıeler kóp», – dedi.  

Memorandýmda birlesken medıa jobalardy júzege asyrý, tájirıbe almasý, jýrnalıserge arnalǵan dóńgelek ústelder, konferensıalar men oqytý baǵdarlamalaryn uıymdastyrý syndy baǵyttar qamtylǵan.

Qonaqtar medıaholdıngtiń podkast stýdıasy men mýzeıin aralap, ujymnyń jumys prosesimen tanysty.  

​1937 jyly qurylǵan «Kabar» –Qyrǵyzstandaǵy alǵashqy ári basty memlekettik aqparat agenttigi. Búginde ol qyrǵyz, orys, aǵylshyn, arab, túrik jáne qytaı tilderinde aqparat taratady. Ol álemniń jetekshi aqparat agenttikterimen seriktestik ornatyp, halyqaralyq aqparattyq keńistikte belsendi jumys júrgizip keledi. 

Al 2020 jyly qurylǵan «Alatau Aqparat» medıaholdıngi – Almaty qalasyndaǵy jetekshi medıa qurylym. Onyń quramyna 1936 jyldan shyǵyp kele jatqan «Vechernıı Almaty», 1988 jyldan shyǵyp kele jatqan «Almaty Aqshamy» gazetteri men aqshamnews.kz, vecher.kz jáne alnews.kz aqparatyq resýrstary kiredi.