Qarqaralyda Alash arystary – Álıhan Bókeıhan, Álimhan Ermekov jáne Ahmet Baıtursynǵa arnalǵan kompozısıalyq eskertkish boı kóterdi, dep habarlaıdy https://ortalyq.kz/548875-2/ saıty.
Eskertkish Tuńǵysh Prezıdent – Elbasy Nursultan Nazarbaevtyń«Bolashaqqa baǵdar: rýhanı jańǵyrý» baǵdarlamasy aıasynda aýdanda atqarylatyn 19 jobanyń biri retinde júzege asyrylyp otyr. Ótkenimiz eskerilip, ortamyzǵa oralǵan tusta, elimizdiń egemendigi jolynda aıaýsyz ter tókken tulǵalarymyz osylaısha ardaqtaldy.
Qazaq halqy – tekti halyq, rýhy myqty, dúnıetanymy keń, paıym-parasaty mol ulylaryn ulyqtaýdan tanǵan emes. Al, Qarqaraly jerindegi Alash qaıratkerleriniń kesek tulǵalary somdalǵan eskertkish – rýhanı qundylyq, tarıhtan syr shertetin jádiger. Taǵdyr toǵystyryp, qazaq halqynyń bolashaǵy synǵa túsken shaqta «Alashym» dep alasurǵan, azattyqtyń aq tańyn ańsap ótken arystardyń qurmetine qoıylǵan eskertkishtiń ashylý saltanatynda aýdan ákimi Halel Maqsutov jıylǵan qaýymdy aqjaryla quttyqtady.
– Dóńgelek stol basynda halqynyń jarqyn bolashaǵyn týraly sóz órbitip otyrǵan Álimhandy ustamdy da sabyrly Álıhan jaǵyn taıanyp, únsiz oıǵa shomyp tyńdasa, Ahań Álimhannyń kózinen ushqyndaǵan otty kórgendeı muqıat den qoıyp otyr, – degen aýdan basshysy uly tulǵalardyń bar bolmysyn ashyp turǵan tutas kompozısıanyń tarıhı jáne tárbıelik máni turǵysynan óte qundy týyndy ekenin aıtyp ótti.
Eskertkishtiń jobasyn qaǵaz betine alǵash túsirgen jergilikti talantty sýretshi Sáken Dáýletbaev, músinshiler – Talǵat Baıorazov pen Kenjebek Qoshantaev. Eskertkish qoladan quıylǵan, bıiktigi – 3,15 m, salmaǵy – 2 tonna.
Saltanatty sharada alys-jaqynnan kelgen qurmetti qonaqtar – birneshe aýdanda basshylyq qyzmet jasaǵan Amantaı Rahımov, tarıh ǵylymdarynyń doktory, profesor Sataı Syzdyqov, fılologıa ǵylymdarynyń doktorlary, profesorlar, aıtysker aqyndar – Amanjol Áltaev, Qoılybaı Asanov, Aqtoǵaı aýdany ákiminiń orynbasary Abylaı Amanjolov, eńbek ardageri Serik Jekeev, sondaı-aq tarıhshy ustaz Qaırat Omarbekov ózderiniń jyly lebizderin bildirdi. Isi qazaqtyń azattyǵy úshin kúresken arystardyń rýhyna arnalyp as berildi.
