Prezıdent memlekettik nagradalar, joǵary áskerı jáne arnaýly ataqtar, synyptyq shender tapsyrý rásimine qatysty, dep habarlaıdy Aqorda.
Memleket basshysy – Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaev jıynǵa qatysýshylardy Otan qorǵaýshy kúnimen jáne alda kele jatqan Jeńis kúni merekesimen quttyqtap, osy eki meıram jaýyngerlik dástúrdiń sabaqtastyǵyn pash etetinin, batyr babalarymyzdyń dańqty jolyn qazir óskeleń urpaq jalǵastyryp kele jatqanyn atap ótti.
– Búginde aıbyndy armıamyz – eldegi tutastyq pen tynyshtyqtyń myqty qalqany. Qýatty áskerimiz beıbitshilik pen berekeli ómirdi qas qaqpaı kúzetip tur. Olar qaı kezde de qasterli Otanymyzdy qorǵaýǵa daıyn. Erlik maıdanda ǵana jasalmaıdy. Erlikke beıbit zamanda da oryn bar. Bıyl biz sońǵy 80 jyldaǵy eń joıqyn tasqynǵa tap boldyq. Elge qater tóngen sátte sarbazdarymyz aldyńǵy shepten tabyldy. Ulttyq ulan, İshki ister mınıstrligi, Ulttyq qaýipsizdik komıteti, Tótenshe jaǵdaılar mınıstrligi jáne Memlekettik kúzet qyzmetiniń jeke quramy antqa adal bolýdyń úlgisin kórsetti. Alapat tasqynǵa tótep berý úshin 9 myńnan astam áskerı qyzmetshi jumyla eńbek etti. Myńnan astam tehnıka jetkizildi. Syn saǵatta halqymyzdyń asyl qundylyqtary anyq baıqalady. Osy oraıda Soltústik Qazaqstan oblysynda apatqa qarsy kúresken 300 sarbazdyń eńbegin erekshe atap ótkim keledi. Olar kúni-túni bógen salyp, qalany qarǵyn sýdan qutqarýǵa atsalysty. Jergilikti turǵyndar bul sarbazdarǵa aıryqsha rıza boldy, olardy zor qurmetpen shyǵaryp saldy. Mine, halyq pen armıanyń myzǵymas tutastyǵy degenimiz – osy. Mundaı mysaldar az emes, – dedi Prezıdent.
Qasym-Jomart Toqaev Jeńis kúnin jaqyndatýǵa atsalysqan maıdangerler men tyl eńbekkerlerine árqashan qurmet kórsetiletinin aıtty. Osy rette ardagerlerge merekege oraı jyl saıyn qosymsha tólemaqy beriletinin, al bıyl onyń kólemi úsh mıllıon teńgege deıin óskenin jetkizdi. Sonymen qatar óziniń bastamasymen bıyldan bastap «Aıbyn» ordeniniń úsh dárejesi dańqty batyrlarymyz – Saǵadat Nurmaǵambetovtiń, Baýyrjan Momyshulynyń jáne Raqymjan Qoshqarbaevtyń atymen atalatynyn eske salyp, ult perzentteriniń batyldyǵy men batyrlyǵy búgingi jáne bolashaq urpaq úshin úlgi-ónege bolatynyna nazar aýdardy.
Memleket basshysynyń aıtýynsha, geoosaıası turaqsyzdyq beleń alǵan qazirgi jaǵdaıda myqty ári daıyndyǵy saqadaı saı áskerdiń mańyzy aıtarlyqtaı arta tústi.
– Bizdiń áskerı qyzmetshilerimiz BUU aıasyndaǵy túrli bitimgerlik operasıalarǵa qatysyp, ózderiniń kásibıligi men joǵary deńgeıdegi jaýyngerlik mashyǵyn kórsetip keledi. Jýyrda Qazaqstan Golan jotalaryndaǵy mısıasyn derbes oryndaý jónindegi Birikken Ulttar Uıymynyń mandatyna alǵash ret ıe boldy. Sońǵy jyldary álem elderiniń áskerı qýaty týraly reıtıńtegi ornymyz edáýir jaqsardy. Bul áskerimizdiń daıyndyǵy joǵary ekenin ári úılesimdi áreket etetinin bildiredi. Qazaqstan jer-jahanǵa ózin beıbit el retinde tanytty. Biz barlyq memleketpen dostyq qatynas ornattyq. Kez kelgen shıelenisti syndarly dıalog arqyly sheshý kerek dep esepteımiz. Biraq arqany keńge salyp, qamsyz otyrýǵa bolmaıdy. Qýatty áskerimiz túrli qaterge saqadaı saı turýǵa tıis. Myqty ásker – eldiktiń tiregi, – dedi Prezıdent.
Qasym-Jomart Toqaev Qazaqstannyń aıbyndy armıasy kásibı turǵydan bilikti ári zamanǵa saı ozyq bolýy úshin Qarýly Kúshterimizdi odan ári nyǵaıtý jumystary jalǵasatynyn jetkizdi.
– Kúni keshe ǵana elimizde jańa avıasıa bazasy ashyldy. Bul – ulttyq qorǵanys júıesiniń áleýeti arta tústi degen sóz. Biz armıanyń bedelin kóterýge aıryqsha mán beremiz. Otan qorǵaý – barshamyzǵa ortaq paryz. Muny, ásirese, óskeleń urpaq tereń túsingeni abzal. Memleket jas sarbazdarǵa jan-jaqty qoldaý kórsetip jatyr. Olarǵa arnaıy bilim granttary bóline bastady. Nesıeni óteý merzimi keıinge shegerildi. Endi armıada júrip, naqty mamandyq alýǵa bolady. «Er jigitke jarasar, qolyndaǵy naızasy» dep áıgili Buqar jyraý batyrlyq pen erlikti erekshe dáriptegen. Shyn máninde, ásker – memlekettiń asa mańyzdy sımvoly. Men sarbazdarymyzdyń jaýyngerlik rýhy joǵary bolǵanyn maqtan etemin, – dedi Memleket basshysy.
Saltanatty jıynda Qasym-Jomart Toqaev Otan qorǵaýshylardyń elimizdegi yntymaq pen tynyshtyqty saqtaýǵa zor úles qosyp kele jatqanyn atap ótip, ofıserlerge áskerı jáne arnaýly ataqtar, synyptyq shender tapsyrdy.
Memleket basshysynyń Jarlyǵymen áskerı jáne arnaýly ataq, synyptyq shen alǵan ofıserlerdiń tizimin myna silteme arqyly kórýge bolady.
Budan bólek, Prezıdent áskerı jáne qyzmettik boryshyn atqarýda kórsetken erligi men janqıarlyǵy, eldiń ulttyq qaýipsizdigi men qorǵanys qabiletin qamtamasyz etýge, zańdylyq pen quqyqtyq tártipti nyǵaıtýǵa qosqan úlesi úshin bir top azamatty memlekettik nagradalarmen marapattady.
Otan qorǵaýshy kúnine oraı Prezıdenttiń qolynan memlekettik nagradalar alǵan azamattar tizimi:
İ dárejeli «Dańq» ordenimen
Qamaletdınov Sultan Búrkitbaıuly – Qorǵanys mınıstriniń birinshi orynbasary – Qarýly Kúshter Bas shtabynyń bastyǵy;
Dáýeshov Halıdýlla Zınollauly – Aqtóbe oblysynyń prokýrory.
İİ dárejeli «Dańq» ordenimen
Raısov Ulan Ermuhanuly – Qarjylyq monıtorıń agenttigi tóraǵasynyń birinshi orynbasary;
Dalmatov Qanataı Jorabekuly – Qorǵanys mınıstrligi áskerı bóliminiń komandıri;
Ábdirov Nurǵalym Májıtuly – Jambyl oblysynyń prokýrory.
Baýyrjan Momyshuly atyndaǵy İİ dárejeli «Aıbyn» ordenimen
Golovın Oleg Pavlovıch – Petropavl qalasynyń polısıa basqarmasynyń ınspektory;
Tańatarov Baýyrjan Omaruly – Memlekettik kúzet qyzmetiniń Aıryqsha maqsattaǵy kúshteri Shtab bastyǵynyń orynbasary;
Doskenov Amangeldi Serikuly – Aqmola oblysynyń Ereımentaý aýdany tótenshe jaǵdaılar bóliminiń bastyǵy;
Saq Ulyqbek Muratuly – Qorǵanys mınıstrliginiń áskerı bólimi komandıriniń birinshi orynbasary;
Ǵalymov Jandos Janatuly – Ulttyq qaýipsizdik komıtetiniń aǵa jedel ýákili;
Nasıhan Roman Serikuly – Atyraý oblysynyń Qurmanǵazy aýdany polısıa bóliminiń ınspektory;
Orazov Dinmuhamed Ǵabıtuly – Ulttyq qaýipsizdik komıteti Túrkistan oblysy boıynsha departamentiniń aǵa jedel ýákili;
Omarov Dıas Kákimuly – Jetisý oblysynyń Taldyqorǵan qalasy polısıa basqarmasynyń ınspektory.
Raqymjan Qoshqarbaev atyndaǵy İİİ dárejeli «Aıbyn» ordenimen
Tájiǵulov Nurbolat Tastemiruly – Aqtóbe oblysynyń Tótenshe jaǵdaılar departamenti órt sóndirý bóliminiń bólimshe komandıri.
«Qurmet» ordenimen
Kýbekova Aına Jadyraqyzy – Sybaılas jemqorlyqqa qarsy qyzmetiniń departament basshysy.
«Erligi úshin» medalimen
Topalov Ámirjan Merekeuly – Qostanaı oblysynyń Qarabalyq aýdany polısıa bóliminiń jedel ýákili;
Qusman Ádil Dýmanuly – Abaı oblysynyń polısıa departamenti Jyldam qımyldaıtyn arnaıy jasaǵynyń ınspektory.
«Jaýyngerlik erligi úshin» medalimen
Óteýov Erlan Óteýuly – Bas prokýratýra Qyzmet bastyǵynyń orynbasary;
Strelkov Fedor Nıkolaevıch – Áýe qorǵanysy kúshteriniń áskerı ınstıtýty bastyǵynyń orynbasary;
İlıas Serik Amankeldiuly – Memlekettik kúzet qyzmetiniń basqarma bastyǵynyń orynbasary;
Aqarbekov Meıirhan Saparhanuly – Qorǵanys mınıstrligi áskerı bóliminiń rota komandıri;
Ótenov Sáken Seksembaıuly – Ulttyq qaýipsizdik komıteti Aqtóbe oblysy boıynsha departamentiniń aǵa jedel ýákili;
Irýbaev Renat Maratuly – Memlekettik kúzet qyzmetiniń aǵa ofıseri;
Muratbekov Dýlat Tilemisuly – Qarjylyq monıtorıń agenttigi Qostanaı oblysy boıynsha Ekonomıkalyq tergep-tekserý departamentiniń jedel ýákili;
Serikov Ádilet Almasbekuly – Ulttyq qaýipsizdik komıteti Shekara qyzmetiniń Mańǵystaý oblysy boıynsha departamentiniń aǵa jedel ýákili;
Ábdikárimov Tilek Dýmanuly – Sybaılas jemqorlyqqa qarsy qyzmettiń asa mańyzdy ister jónindegi tergeýshisi.
