Tashkent qalasynda Ortalyq Azıa memleketteri Syrtqy ister mınıstrleri orynbasarlarynyń jyl saıynǵy kezdesýi bolyp ótti. Elimizdiń osy saladaǵy vedomstvasynyń baspasóz qyzmeti taratqan málimeti boıynsha, BUU-nyń Ortalyq Azıa úshin aldyn-alý dıplomatıasy boıynsha óńirlik ortalyǵynyń (BUU OAADÓO) uıymdastyrýymen ótken Ortalyq Azıa elderi syrtqy ister mınıstrleriniń orynbasarlarynyń jyl saıynǵy kezdesýine Qazaqstan tarapynan Syrtqy ister mınıstriniń orynbasary Erjan Ashyqbaev qatysqan.
Otyrysqa Ortalyq Azıadaǵy bes eldiń syrtqy ister mınıstrleriniń orynbasarlarymen qatar, BUU OAADÓO basshysy - BUU Bas hatshysynyń arnaıy ýákili Natalá German, BUU-nyń birqatar joǵary laýazymdy ókilderi jáne AIR boıynsha arnaıy sesıasyna Aýǵanstan Syrtqy ister mınıstriniń orynbasary Nahıd Esar bastaǵan aýǵan delegasıasy qatysty.
İs-shara barysynda Ortalyq Azıadaǵy turaqtylyq pen qaýipsizdikke aımaqtyq jáne ultaralyq syn-qaterler, aımaq elderi jáne BUU OAADÓO-nyń osy syn-qaterlerdi sheshý jónindegi birlesken jumysynyń nátıjeleri, sondaı-aq aımaqtyq yntymaqtastyqty odan ári damytý perspektıvalary talqylandy.
E.Ashyqbaev óz sózinde Qazaqstan Ortalyq Azıa memleketteriniń aımaqtyq jaqyndasýynyń keńeıýin árdaıym qoldaıtynyn jáne ózara senim men ortaq múddelerdi qurmetteýge negizdelgen aımaqtyń saıası jáne ekonomıkalyq turaqty jáne qaýipsiz damýyna elimizdiń erekshe qyzyǵýshylyǵyn atap ótti. Ol Ortalyq Azıa kezigip otyrǵan birqatar qaýip-qaterlerge jáne olarǵa tótep berý sharalaryna toqtaldy.
Aımaqtaǵy negizgi syn-qaterlerdiń qatarynda terorızm men ekstremızm, esirtkiniń zańsyz aınalymy jáne transulttyq qylmys, adam saýdasy, sý-energetıka jáne ekologıalyq máseleler, tranzıt jáne álemdik naryqqa shyǵý máseleleri atap aıtyldy.
Jalpy, spıkerler aımaqtyq yntymaqtastyqtyń damý dınamıkasyn oń baǵalap, oǵan mańyzdy serpin Nur-Sultan men Tashkenttegi samıtter bolǵanyn atap aıtty. Sonymen qatar, kórshi Aýǵanstanmen yntymaqtastyqty nyǵaıtýdyń jáne ony qaýip-qater kózi retinde emes, seriktes retinde qabyldaýdyń mańyzdylyǵyna nazar aýdarady.
Úkimetter men jastar arasyndaǵy aımaqtyq únqatysý jónindegi BUU OAADÓO bastamasynyń aıasynda jastar ókilderimen aımaqtyń damýynyń bolashaǵyn talqylaýǵa arnalǵan jeke sesıa bolyp ótti.
Osy formatta ótken kezdesý ózin aımaqtyq sıpattaǵy máselelerdi talqylaý jáne olar boıynsha sheshim qabyldaý úshin tıimdi tuǵyrnama retinde kórsetti.
Sondaı-aq, is-shara aıasynda E. Ashyqbaev óziniń Ortalyq Azıalyq áriptesterimen birqatar kezdesýler ótkizip, ekijaqty qatynastardyń qazirgi jaǵdaıy men túrli formattaǵy yntymaqtastyqty nyǵaıtý perspektıvalaryn talqylandy. Syrtqy ister mınıstriniń orynbasary sonymen birge BUU Arnaıy ókili N.Germanmen kezdesip, Qazaqstan Respýblıkasy men Ortalyq arasyndaǵy yntymaqtastyqty odan ári keńeıtý men tereńdetýdi máseleleri boıynsha pikir almasty.
Sýret mfa.gov.kz saıtynan alyndy.
