Joǵary aýdıtorlyq palatanyń burynǵy tóraǵasy Natalá Godýnova «Qazaqstan temir joly» UK» AQ táýelsiz dırektory bolyp saılandy. Bul týraly Ulys kompanıanyń baspasóz qyzmetine silteme jasap habarlaıdy.
«QTJ» UK» AQ jalǵyz aksıoneriniń 2024 jylǵy 4 sáýirdegi sheshimimen «QTJ» UK» AQ Dırektorlar keńesiniń múshesi, táýelsiz dırektory bolyp Natalá Nıkolaevna Godýnova saılandy», - delingen habarlamada.
Natalá Nıkolaevna Godýnova 1972 jyly 24 mamyrda Oral qalasynda týǵan.
Batys Qazaqstan aýyl sharýashylyǵy ınstıtýtyn (ekonomıs mamandyǵy boıynsha), Reseı Federasıasy Úkimetiniń janyndaǵy Qarjy akademıasyn bitirgen. Ekonomıka ǵylymdarynyń kandıdaty.
Eńbek jolyn 1993 jyly «Oral» agroónerkásipbankte» ekonomıs bolyp bastaǵan. 1997-2005 jyldary Batys Qazaqstan aýmaqtyq memlekettik múlikti jáne aktıvterdi basqarý komıtetiniń jetekshi mamany, bólim bastyǵy, Batys Qazaqstan oblysy ákimi apparatynyń bólim meńgerýshisi, Batys Qazaqstan oblysy Ekonomıka jáne búdjettik josparlaý departamentiniń dırektory bolyp jumys istegen.
2005-2006 jyldary – Qazaqstan Respýblıkasynyń Reseı Federasıasyndaǵy Saýda ókildiginde keńesshi-ekonomıst. 2006-2009 jyldary Mańǵystaý oblysy ákiminiń keńesshisi qyzmetin atqarǵan.
2009-2011 jyldary – Qazaqstan Respýblıkasynyń Reseı Federasıasyndaǵy Saýda ókildiginiń konsýltanty, orynbasary, mindetin atqarýshy. 2012-2013 jyldary – Qazaqstan Respýblıkasynyń Premer-Mınıstri orynbasarynyń keńesshisi. 2013-2015 jyldary Qyzylorda oblysy ákiminiń orynbasary qyzmetin atqardy, ekonomıka, qarjy jáne jumyspen qamtý máselelerine jetekshilik etti.
2015-2017 jyldary – «Nur Otan» partıasynyń hatshysy, «Nur Otan» partıasynyń Saıası keńesi búrosynyń múshesi. 2017 jylǵy jeltoqsannan bastap – Qazaqstan Respýblıkasy Ortalyq saılaý komısıasynyń múshesi. 2018 jylǵy aqpannan bastap – Respýblıkalyq búdjettiń atqarylýyn baqylaý jónindegi esep komıtetiniń Tóraıymy.
Qazaqstan Respýblıkasy Prezıdentiniń 2022 jylǵy 28 qarashadaǵy № 9 Jarlyǵymen Qazaqstan Respýblıkasy Joǵary aýdıtorlyq palatasynyń tóraǵasy bolyp taǵaıyndaldy. Bul qyzmetti 2024 jyldyń 1 sáýirine deıin atqardy.
