Álemdik Reuters agenttiginde Qazaqstan Ázerbaıjan aýmaǵymen ótetin munaı qubyrlary arqyly jylyna 1,5 mıllıon tonna munaı eksporttaýdy josparlap otyr degen syńaıda maqala jarıalandy.
Aqparatqa qaraǵanda, Qazaqstan jylyna 1,5 mıllıon tonna munaıdy Reseıdi aınalyp ótetin Baký – Tbılısı – Jeıhan munaı qubyry arqyly eksporttamaq. "Qazmunaıgaz" ulttyq kompanıasy Ázerbaıjan memlekettik SOCAR kompanıasymen bul másele boıynsha kelissóz júrgizip jatyr.
Bul aqparatty Atyraýda saparmen júrgen Energetıka mınıstri Bolat Aqsholaqov Qazaqstan Baký – Tbılısı – Jeıhan munaı qubyry arqyly 1,5 mln tonna munaı eksporttaýdy josparlap otyr degen aqparatty joqqa shyǵardy.
«Aqparattyq resýrsta aıtylyp jatqan kólemmen bizdiń eksporttyq baǵyttaǵy problemany sheshý aqylǵa syımaıdy. Nege? Óıtkeni, birinshiden, atalǵan baǵytpen 1,5 mln tonna munaıdy eksporttaý qazirgi ahýaldy aıtarlyqtaı jeńildetpeıdi. Ekinshiden, bizdiń mınıstrlikte dál mundaı kelisimge qol qoıý jospary joq», -dedi mınıstr Atyraýda ótken baspasóz máslıhatynda.
«QazMunaıGaz» ulttyq kompanıasy munaı tasymaldaýdyń balama baǵyttary pysyqtalyp jatqanyn aıtty. Biraq Reuters-te jarıalanǵan aqparatty rastamady.
«QazMunaıGaz qazirgi ýaqytta munaıdy Kaspıı qubyr konsorsıýmy júıesinen basqa baǵyttar arqyly da eksporttaýda. Atap aıtqanda, Atyraý-Samara, sondaı-aq Qytaı baǵytyndaǵy Qazaqstan-Qytaı qubyry, Aqtaý porty (Mahachkala/Baký) baǵyttary qoljetimdi. Sonymen qatar kompanıa munaıdy tasymaldaý baǵyttaryn ártaraptandyrý boıynsha qosymsha jumystar júrgizýde. Munaı tasymaldaýdyń basqa da tıimdi balama baǵyttary qazirgi ýaqytta pysyqtalyp jatyr»- dedi Ulttyq kompanıa.
Aıta ketsek, Qazaqstan munaı eksportynyń 80 paıyzdan astamyn Reseı aýmaǵy arqyly ótetin Kaspıı qubyr jelisi arqyly júrgizedi. Ýkraınadaǵy jaǵdaı ýshyqqan kezde Kaspıı qubyr jelisi túrli sebeptermen jumysyn toqtatyp qalyp turdy.
Jylpy sarapshylar Qazaqstanda Kaspıı qubyr jelisine balama baǵyt joq ekenin aıtqan bolatyn.
«Kaspıı qubyr konsorsıýmy sıaqty munaı tasymaldaýdyń balama baǵyty joq jáne bul turaqty joldardyń biri bolyp keldi. Bul qubyr arqyly Teńiz, Qashaǵan, Qarashyǵanaqtaǵy munaıdy óndirip otyrǵan sheteldik kompanıalarǵa tıesili ónimder jóneltiledi. Jáne osy kompanıalar Kaspıı qubyr konsorsıýmynyń negizgi aksıonerleri bolyp tabylady. Ortaq múddeler máseleni jyldam sheshýge tyrysady», - deıdi munaı-gaz salasynyń sarapshysy Oljas Baıdıldınov Ulys-qa bergen málimetinde.
