Birde-bir adam 42 500 teńge alǵany úshin, tipti jibergen qateligi úshin qylmystyq jazaǵa tartylmaıdy. Bul týraly Ortalyq komýnıkasıalar qyzmetindegi brıfıńide QR Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat.
«Búgingi tańda tótenshe jaǵdaılardyń saldaryna baılanysty tabysynan aıyrylǵan 3 mln 960 myń adamǵa áleýmettik tólem taǵaıyndaldy. Olarǵa 157 mlrd teńge tólendi. Ókinishke oraı, sońǵy 4-5 kún boıy áleýmettik jelilerde, qoǵamda «42 500 teńge alǵany úshin qylmystyq turǵyda jazalaıdy eken» degen áńgime kóp taralyp jatyr. Biz bárin qarap shyqtyq. 5 sáýirden bastap zańgerlerimiz osy máselege qatysty pikirlerin aıta bastaǵan. Onyń ishinde erekshe taralǵany sol kúni Zakon.kz portalynda orys tilinde Danıar Nurlanuly men Rýslan Qojahmet esimdi zańger-advokattardyń Qylmystyq kodekstiń alaıaqtyqqa qatysty baptaryn taldap, sony 42 500 teńge tólemine qatystyryp jazǵan maqalasy boldy», - dedi ol.
Onyń atap ótýinshe, atalǵan maqalada ol azamattar «mınıstr Nurymbetovtiń eshkimdi jappaı teksermeımiz degen sózin jumys berýshiler paıdalanyp, jalǵan málimetter berýi múmkin» degenge keltirgen.
«Birde-bir adam 42 500 teńge alǵany úshin, tipti jibergen qateligi úshin qylmystyq jazaǵa tartylmaıdy. Oǵan negiz joq. Osyǵan núkte qoıaıyq. Eshkim jaýapkershilikke tartylmaıdy. Ony ana talqylap jatqan zańgerler de biledi. Biz eshkimdi teksermeımiz. Sebebi bul - áleýmettik tólem. Bul - áleýmetke baǵyttalǵan tólem»,- dedi mınıstr.
Birjan Nurymbetov halyqtyń basym bóliginiń tabysy az, jalaqy mólsheri tómen, zeınetaqy, járdemaqy kóp emes ekendigin basa aıtty.
«Sondyqtan kópshilik osy tólemdi alǵysy keledi. Ótken brıfıńide de aıtqanmyn, biz eshkimdi jappaı tekserip jatpaımyz. Jeke tulǵalardy, resmı ne beıresmı bolsyn jumys istep júrgenderdi úılerdi aralap, teksermeımiz. Eshteńege ýaıymdamańyzdar. Sizerge tólendi me? Alyńyzdar, jaratyńyzdar. Tekserý bolsa da bizdi tekseredi»,- dedi Eńbek mınıstr.
