Memleket basshysy Qyzylorda oblysynda jumys saparymen júr. Sapary aıasynda Óńirdiń zıalylary, ardagerleri men jastar qaýymy ókilderimen, jergilikti atqarýshy organdardyń basshylary men BAQ ókilderinyń qatysýymen jıyn ótkizdi.
Prezıdenttiń baspasóz qyzmetiniń habarlaýynsha, memleket basshysy aımaqtardan túsip jatqan usynystardy eskere otyryp, óńirlerdi damytýǵa baǵyttalǵan arnaıy keshendi memlekettik baǵdarlamanyń iske qosylatynyn aıtty. Sondaı-aq, Qazaqstan Prezıdenti osy maqsat-mindetterdi júzege asyrý úshin oblys basshylyǵy sheshýi tıis birqatar máselelerge toqtaldy.
– Aımaqtaǵy azamattardyń jalaqysyn ósirý – Úkimet pen oblysy ákiminiń basty mindeti! Laıyqty jalaqy tóleıtin jańa jumys oryndaryn ashýǵa basa mán berý qajet. Bul baǵytta iri kásiporyndardyń qýatyn tıimdi paıdalanýdy nazarǵa alý kerek, – dedi Qasym-Jomart Toqaev.
Memleket basshysy shetel kompanıalarynda jumys isteıtin otandastarymyzdyń múddelerin qorǵaýdyń mańyzdylyǵyna nazar aýdardy. Sonymen qatar, oblystyń áleýmettik saladaǵy jetistikterine toqtaldy.
– Kóp balaly jáne turmysy tómen otbasylarǵa qoldaý kórsetý úshin oblysta Áleýmettik jol kartasy iske qosylǵan. Bıyl «Aýyl – el besigi» baǵdarlamasynyń aıasynda bilim, densaýlyq saqtaý, mádenıet, jol qurylysy salalarynda quny 1,7 mıllıard teńge bolatyn 60 joba josparlanǵan. Oblys ákimine solardy ýaqtyly ári tıimdi júzege asyrýdy tapsyramyn, – dedi Qazaqstan Prezıdenti.
Qasym-Jomart Toqaev damýdyń jańa draıverlerin qalyptastyrý qajet ekenin aıtyp, qýatty ekonomıkaǵa qol jetkizýdiń mańyzdylyǵyn atap ótti.
– Indýstrıalandyrý saıasaty óziniń jemisin berdi. Bul baǵyt odan ári jalǵasady. 2013 jyldan beri Qyzylorda oblysynda óńdeýshi ónerkásip salasy eki ese ósti. İri sement zaýyty iske qosyldy. «Shalqıa» ken ornynda qýatty kombınattyń qurylysy bastaldy. Budan bólek, oblystaǵy shyny zaýytynyń qurylysyn aıaqtaý qajet. «Báıterek» holdıńi men oblys ákimdigine zaýytty iske qosyp, Qazaqstannyń alǵashqy shynysyn shyǵarýdy tapsyramyn, – dedi Qazaqstan Prezıdenti.
Memleket basshysy aýyldardyń ósip-órkendeýi agrosektordyń ilgerileýine septigin tıgizetinin aıtyp, Qyzylorda oblysynyń aýyl sharýashylyǵyndaǵy áleýeti áli tolyq paıdalanylmaı otyrǵanyna nazar aýdardy.
– Sýarmaly jerlerde sý tapshylyǵy bar. Sondyqtan, jańa sý qoımalaryn salý qajet. Úkimet oblys ákimdigimen birge atalǵan máseleni sheshý úshin maǵan naqty jumys josparyn usynsyn. Búkil el boıynsha aýyl ınfraqurylymyn jańǵyrtatyn kez keldi. Jergilikti joldardyń, sý qubyrlarynyń, elektr jelileriniń, mádenı-sport keshenderiniń bári jańarýy qajet, – dedi Qasym-Jomart Toqaev.
Qazaqstan Prezıdenti óńirdegi ekologıalyq problemalarǵa, sonyń ishinde, Aral problemasyna, aınalasyna zıanyn tıgizip otyrǵan munaı-gaz jáne ýran qaldyqtaryna nazar aýdardy.
– Ekologıa – qyzylordalyqtardy tolǵandyratyn máseleniń biri. Halyq Aral taǵdyryna alańdaıdy. Elbasynyń bastamasy boıynsha «Syrdarıa arnasyn retteý jáne Aral teńiziniń soltústik bóligin saqtap qalý» jobasy iske asyrylýda. Osy jobanyń jáne Kókaral bógetiniń arqasynda Kishi Araldaǵy sý qalpyna keldi. Bul balyq sharýashylyǵyn jandandyrýǵa septigin tıgizdi. Taǵy bir mańyzdy másele – búginde turǵyndardy munaı-gaz ben ýrannyń zıandy qaldyqtary alańdatyp otyr. Óńirdegi kásiporyndarǵa jańa tehnologıalar engizip, ekologıalyq qaýipsizdikti halyqaralyq standarttarǵa saı etý qajet, – dedi Memleket basshysy.
Qasym-Jomart Toqaev Baıqońyrdy Qazaqstannyń ǵarysh salasynyń negizi retinde atap ótip, bul keshen oblysqa joǵary tehnologıalardy damytýǵa múmkindik beretinin aıtty.
– Bizdiń maqsat – ǵarysh tehnologıalaryn Otanymyzdyń, halqymyzdyń múddesi úshin qoldaný. Baıqońyr qalasynyń ınfraqurylymyn jańǵyrtý jumysy jalǵasýda. Munda 30 jyl ishinde alǵash ret kópqabatty úıler jáne medısınalyq ortalyq salyndy. Bes mektep Qazaqstannyń bilim standartyna kóshti. Qazir álemde ınvestorlar ǵarysh startaptaryna keń qoldaý kórsetýde. Biz de Baıqońyrdyń áleýetin tıimdi paıdalanyp, bul úrdisten shet qalmaýymyz kerek, – dedi Qazaqstan Prezıdenti.
Sondaı-aq, Qyzylorda óńiriniń jurtshylyǵy atynan ardagerler, kásipkerler, muǵalimder, sportshylar sóz sóılep, ózderiniń usynys-tilekterin jetkizdi.
Sońynda Memleket basshysy xalyqtyń ál-aýqatyna qatysty máselelerdiń barlyǵy jeke óziniń baqylaýynda bolatynyn aıtyp, jıynǵa qatysýshylardy Qyzylorda ólkesin damýdyń jańa deńgeıine shyǵarý úshin atsalysýǵa shaqyrdy.
Qazaqstan Prezıdenti elimizdiń áleýmettik-ekonomıkalyq jáne mádenı damýyna qosqan úlesi úshin «Syr marjany» JSHS dırektory M.Óteevti, kópsalaly balalar aýrýhanasynyń dárigeri A.Shúlenbaevty, Qyzylorda qalalyq máslıhatynyń depýtaty, Qyzylorda oblysynyń qurylysshylar qaýymdastyǵynyń jetekshisi Q.Ernazarovty, dańqty sportshy, mánerlep syrǵanaýdan halyqaralyq dárejedegi sport sheberi E.Tursynbaevany jáne «Nartaı óner mektebi» komýnaldyq memlekettik qazynalyq kásipornynyń dırektory M.Bekpeıisovti alǵys hattarmen marapattady.
