Qasym-Jomart Toqaev Ulybrıtanıanyń syrtqy saıasat vedomstvosynyń basshysyna iltıpat bildire otyryp, onyń Qazaqstanǵa sapary ekijaqty qatynastardy damytýǵa tyń serpin berý turǵysynan máni zor ekenin aıtty, dep habarlaıdy Aqorda.
– Bizdiń mańyzdy strategıalyq seriktesimiz – Ulybrıtanıamen aradaǵy ózara tıimdi yntymaqtastyqtyń qarqyndy damyp kele jatqanyna kóńilimiz tolady. Búgin Strategıalyq seriktestik jáne yntymaqtastyq týraly kelisimge qol qoıylǵanyn aıryqsha atap ótkim keledi. Bul jan-jaqty qujat bizdiń san qyrly baılanystarymyzdy keńeıtý úshin berik negiz qalaıtynyna senimdimin, – dedi Prezıdent.
Memleket basshysy saýda-ekonomıkalyq jáne ınvestısıalyq yqpaldastyqty, sonyń ishinde energetıka, «jasyl» ekonomıka, qarjy, ınovasıa salalaryndaǵy yntymaqtastyqty nyǵaıtýǵa mol áleýet bar ekenine nazar aýdardy.
Óz kezeginde Devıd Kemeron qonaqjaılyq tanytqany úshin Qasym-Jomart Toqaevqa alǵys aıtty. Sondaı-aq Ulybrıtanıa Premer-mınıstri retinde Qazaqstanǵa jasaǵan alǵashqy saparyn yqylaspen eske aldy.
– Men munda 11 jyl buryn eki el arasyndaǵy strategıalyq dıalogty bastaý úshin kelgen edim. Búgin Qazaqstannyń Syrtqy ister mınıstrimen Strategıalyq seriktestik jáne yntymaqtastyq týraly kelisimge qol qoıdyq. Energetıka, bilim, bıznes jáne mádenıet salalaryndaǵy yntymaqtastyqty nyǵaıtýǵa jáne halyqtar arasyndaǵy baılanystardy órkendetýge nıettimiz, – dedi Ulybrıtanıa Syrtqy ister mınıstri.
Áńgimelesý barysynda mádenı-gýmanıtarlyq baılanystardy tereńdetý, ásirese, bilim berý salasy men jastardy qoldaý isine erekshe nazar aýdaryldy.
Sonymen qatar Qasym-Jomart Toqaev pen Devıd Kemeron óńirlik jáne halyqaralyq kún tártibindegi ózekti máseleler jóninde pikir almasty.