Premer-mınıstr Oljas Bektenov ákimdikterge jınalǵan astyqty der kezinde keptirip, elevatorlarǵa jetkizýdi tapsyrdy, dep habarlaıdy Ulys.
Bektenov bıyl kóktemgi egis jáne kúzgi egin oraǵy jumystaryn ýaqtyly jáne sapaly júrgizý úshin qajetti sharalardyń barlyǵy qabyldanǵanyn atap ótti. Dálirek aıtqanda, salany jeńildikpen qarjylandyrý kólemi alǵash ret rekordtyq 580 mlrd teńgege deıin jetken.
«Bul qarajat eginshilerdi tikeleı nesıelendirýge, paıyzdyq mólsherlemeni arzandatýǵa jáne forvardtyq satyp alýǵa baǵyttaldy. Kelesi jyly qarjylandyrý kólemin 700 mlrd teńgege deıin jetkizýdi josparlap otyrmyz. Bıyl aýyl sharýashylyǵy tehnıkasyn lızıńpen satyp alýǵa 120 mlrd teńge tartyldy. Aldaǵy jyly bul kórsetkishti 200 mlrd teńgege deıin jetkizý josparda bar. Sondaı-aq, dıqandar tuqymmen, arzan otyn jáne tyńaıtqyshtardyń jetkilikti kólemimen qamtamasyz etildi», - dedi premer úkimet otyrysynda.
Budan bólek úkimet basshysy aýyl sharýashylyǵy mınıstrligine oblys ákimdikterimen birlesip, jınalǵan astyqty shashpaı-tókpeı der kezinde tasymaldaýdy, ony keptirip, elevatorlarǵa jetkizýdi qamtamasyz etýdi tapsyrdy.
«Barlyq astyq qabyldaý kásiporny úzdiksiz jumys rejımine kóshýge tıis. Dándi-daqyldardy saqtaý máselesin erekshe nazarǵa alý qajet. Sondaı-aq fıtosanıtarıalyq qyzmet astyq sapasyna qatań baqylaý jasaýǵa tıis. Bolashaq eginge arnalǵan tuqym qoryn 100% qamtamasyz etý qajet. Kólik mınıstrligi «Qazaqstan temir joly» kompanıasymen birge úzdiksiz tasymaldy uıymdastyryp, vagondarmen qamtamasyz etýdiń naqty kestesin bekitsin», - dedi ol.
