Eki el delegasıalarynyń qatysýymen ótken kelissóz barysynda Memleket basshysy Qasym-Jomart Toqaev Prezıdent Iýn Sok Óldiń Qazaqstanǵa jasaǵan alǵashqy memlekettik saparyn tarıhı oqıǵa dep baǵalady. Sondaı-aq búgingi kelissózder qazaq-koreı yqpaldastyǵynyń aıasyn keńeıtip, ekijaqty baılanysty jańa beleske kóteretinin aıtty.
Qazaqstan Prezıdentiniń pikirinshe, Ońtústik Koreıa jahandyq aýqymdaǵy naǵyz ekonomıkalyq jáne tehnologıalyq lokomotıvke aınaldy. Al álemge áıgili koreı korporasıalary halyqaralyq arenada eldiń «negizgi jahandyq memleket» retindegi pozısıasyn ilgeriletýge eleýli úles qosyp keledi.
Sonymen qatar Qasym-Jomart Toqaev ekijaqty qatynastardy damytý máselelerine toqtaldy. Onyń aıtýynsha, Seýl – Qazaqstannyń Azıa-Tynyq muhıty aımaǵyndaǵy mańyzdy strategıalyq seriktesteriniń biri. Koreıa syrtqy saýda aınalymy boıynsha tórtinshi orynda jáne elimizdegi eń iri sheteldik ınvestorlardyń ondyǵyna kiredi.
Memleket basshysy Qazaqstan men Koreıanyń otyz jyldan astam ýaqyt ishinde joǵary deńgeıdegi saıası dıalogqa qol jetkizgenin, tabysty ekonomıkalyq yntymaqtastyqty jáne berik gýmanıtarlyq baılanystardy jolǵa qoıǵanyn atap ótti. Eki el parlamentaralyq, úkimetaralyq, vedomstvoaralyq deńgeıde jáne basqa da túrli salalarda yqpaldastyq ornatqan. İskerlik keńes pen Saýda-ekonomıkalyq jáne ǵylymı-tehnıkalyq yntymaqtastyq jónindegi úkimetaralyq komısıa tabysty jumys istep jatyr.
Qasym-Jomart Toqaev eki el kásipkerleri arasyndaǵy tyǵyz qarym-qatynasty jolǵa qoıý isinde turaqty baılanystar asa mańyzdy ról atqaratynyna toqtaldy. Sondaı-aq Qazaqstanda Ońtústik Koreıanyń kapıtaly bar 700-den astam kompanıa jemisti jumys istep jatqanyn erekshe atap ótti.
Budan bólek, taraptar mádenı-gýmanıtarlyq baılanystardy damytý máselesine nazar aýdardy.
– Qazaqstanda turatyn 120 myń etnıkalyq koreı ultynyń ókilderi eki el arasyndaǵy qatynastardy nyǵaıtýda mańyzdy ról atqarady jáne oǵan ólsheýsiz úles qosady. Óz kezeginde Koreıada bilim alyp jatqan myńnan astam qazaqstandyq jastar memleketter arasyndaǵy «dostyqtyń altyn kópiri» sanalady, – dedi Qasym-Jomart Toqaev.
Prezıdent Iýn Sok Ól qazaq jerinde qurmet kórsetkeni úshin Memleket basshysyna alǵys aıtyp, bıyl Koreıa Respýblıkasy men Qazaqstan arasynda strategıalyq seriktestik ornaǵanyna 15 jyl tolǵanyn atap ótti.
– Koreıa Respýblıkasy óziniń basty strategıalyq seriktesi – Qazaqstanmen birge jarqyn jáne kemel keleshekke qatar qadam basýǵa nıetti, – dedi Koreıa Prezıdenti.
Kelissóz barysynda energetıka, ınfraqurylym, ónerkásip, mashına jasaý, saýda, kólik-logıstıka, sıfrlandyrý, aeroǵarysh ónerkásibi, qarjy sektory, bilim berý, densaýlyq saqtaý, farmasevtıka, týrızm, mádenıet, ekologıa jáne basqa da salalardaǵy ekijaqty yqpaldastyqtyń perspektıvalary talqylandy.
Kezdesý sońynda Prezıdent Qasym-Jomart Toqaev mazmundy jáne konstrýktıvti kelissóz júrgizgeni úshin koreı tarapyna rızashylyq bildirdi.
