Ál-Farabı atyndaǵy Qazaq ulttyq ýnıversıteti men Jýrnalısıka fakúltetiniń qurylǵanyna 85 jyl tolýyna oraı «Jumabek Kenjalın–Jýrnalıs. Ǵalym. Ustaz. Qaıratker» atty basqosý bolyp ótti.
«Túlekterimiz–bizdiń maqtanyshymyz» atty stýdentterdiń oqý-demalys alańynda «Ult ustazdaryn urpaǵy umytpaıdy» atty portter kórmesi tanystyrylyp, is-shara Jumabek Kenjalın atyndaǵy «Baspasóz jáne jańa medıa» oqý-shyǵarmashylyq zerthanasynyń saltanatty ashylýymen jalǵasty. Zerthana – zamanaýı tehnıkamen jabdyqtalǵan tanymdyq aýdıtorıalardyń biri, Jumabek Kenjalınniń dúnıege kelgen shaǵy men ómiriniń sońyna deıingi izgi jolynan, qundy kitaptarynan, asyl murasynan, «Qazaq ádebıeti», «Aqıqat», «Ana tili» jýrnal-gazetterinde atqarǵan qyzmetinen habar berip qana qoımaı, keleshek jýrnalıserdiń tájirıbe jınaqtap, aqparat almasýyna zor múmkindik beredi. Alqasóz jumysyna Jumabek Kenjalınmen ár jyldary qyzmettes bolǵan qoǵam jáne memleket qaıratkerleri, ustazdary – Látıpa Muratbekqyzy, Turymtaı Turlybaıqyzy, Qojabergen Kerimbekuly, Sarbas Aqtaev, Dámegúl Serdáliqyzy, qarymdy qalamgerler – Sábıt Dosanov, Raýshanbek Ábsattarov, Saýytbek Abdrahmanov, zaıyby – Álıma Ábdirahmanqyzy men uldary – Dastan men Jandos, kýrstastary, syılas dostary, shákirtteri, belgili jýrnalıser, Ál-Farabı atyndaǵy Qazaq ulttyq ýnıversıtetiniń rektory Ǵalymqaıyr Mutanov, jýrnalısıka fakúltetiniń dekany Saǵatbek Medeýbekuly qatysty. Zerthananyń ashylý saltanatynda Sarbas Aqtaev lenta qıyp, jýrnalısıka salasynyń maıtalmandary men qyzmettes dostary Jumabek Kenjalınniń ómirinen syr shertip, ıgi isteri men adamgershilik bolmysyn eske aldy.
Jumabek Kenjalın jýrnalısıka salasyndaǵy alǵashqy jolyn «Egemen Qazaqstan» gazetinde qarapaıym tilshi bolyp bastap, redaktorlyqqa deıingi joldy júrip ótti. 1986-1988 jyldary «Zerde» («Bilim jáne eńbek») jýrnalynda jaýapty hatshy, bas redaktordyń mindetin atqarýshy, 1994-1996 jyldary «Halyq keńesi» gazetiniń bas redaktory, 1996 jyly «Aqıqat» jýrnalynyń bas redaktory, 1997-1999 jyldary «Qazaq ádebıeti» gazetiniń bas redaktory bolyp qyzmet atqardy. Ómiriniń sońyna deıin aqparat salasynda eńbek etip, 2009-2017 jyldary «Qazaq gazetteri» seriktestigin basqardy, seriktestik quramyndaǵy 6 basylymnyń úzbeı shyǵyp turýy men damýyna zor kúsh-jigerin saldy. Gazet nemese jýrnal redaksıasynyń shtattyq qurylymyn saqtaý, «Qazposhta» aksıonerlik qoǵamyna qarasty ujymdardyń tarap ketýin boldyrmaý, polıgrafıalyq kásiporyndardyń júıesin ulǵaıtý syndy maqsattardy ustanyp, gazet-jýrnaldyń taralymyn arttyrdy. «Jelkildep ósken quraqtaı», «Shyndyqty shyraq etip ustańyz», «Ult rýhyn ulyqtaǵan urpaqpyz», «Saıası menedjment jáne baspasózdiń jurtshylyqpen baılanys máseleleri», «Er Jáýke minbegenmen altyn taqqa», «Qalam qanaty», «Eljandylyq muraty jáne baspasóz bedeli» atty kitaptardyń avtory.
J.Kenjalın atyndaǵy zerthana bilikti jýrnalıser daıarlap shyǵarýda úlken ról atqaratyny sózsiz. J.Kenjalın – jas jýrnalıserge úlgi bolarlyq ultjandy dara tulǵa. J.Kenjalınniń qaldyrǵan izgi jolyn jalǵastyratyn jýrnalıser men urpaqtary barda «búginginiń Sákeni» eshqashan da ólmeıtinine kóz jetkizgendeı kúı keshtik.
Aısulý Sezhan,
Abaı atyndaǵy orta mektep-gımnazıasynyń
11-synyp oqýshysy
