MEN JUMYSTY QALAI İSTEIMİN – “EMPASOFT” KOMPANIASYNYŃ NEGİZİN QALAÝSHY KÁDİRBEK SAILAÝULY.
Sońǵy jyldary sandyq júıege kóshý týraly kóp aıtylyp, kóptegen áreketter jasalyp jatyr. Jańa tehnologıany tıimdi paıdalana almaǵan kásip ýaqyt kóshinen qalyp jatqandyqtan otandyq kompanıalar jedel aqparattyq tehnologıanyń sońǵy jetistikterin paıdalanyp, isin ilgeri bastyrýda.
Sol kompanıalardyń basty seriktesteriniń biri óz salasynan oıyp oryn alǵan – «Empasoft». Biz osy kompanıanyń negizin qalaýshy Kádirbek Saılaýulymen suhbattasyp, qandaı tásil jáne fılosofıamen kompanıasyn basqaratynyn qyzyqtadyq. Ol Túrkıada aqparattyq tehnologıa mamandyǵyn ıgerip kelgen soń jeke kompanıa quryp, “Empasoft Academy” arqyly búginge deıin osy salanyń 5000-daı ınjenerin daıyndady. Bul akademıany bitirgen ınjenerler álemdik joǵary tehnologıalyq kompanıalarda jumystap, elimiz iskerlik salasynyń árbir tarmaǵynda biliktililigin jumsap, bıik nátıjelerge qol jetkizip júr.
Mekenjaıy: Mońǵolıa, Ulanbatyr qalasy
Qyzmeti: “Empasoft” kompanıasynyń negizin qalaýshy
Qoldanatyn uıaly telefony: Samsung 10
Paıdalanatyn kompúteri: Surface Pro
Áleýmettik paraqshalary: Kadirbek Sailau (LinkedIn), Kadirbek Sailau (Facebook)
AQPARATTYQ TEHNOLOGIA KOMPANIASYN QALAI QURDYŃYZ?
Aqparattyq tehnologıa (IT) kún saın ózgerip, damyp otyratyndyqtan bizdiń jumysymyz soǵan sáıkes dınamıkalyq qozǵalysta bolady dep aıtýǵa bolady. Shaǵyn adammen ónimdi eńbek etýdi maqsat tutyp, 13 jyl ishinde osy salaǵa aıtarlyqtaı úles qostym dep aıta alamyn.
Men Túrkıanyń Ankara qalasynda aqparattyq tehnologıalar baǵytyndaǵy joǵary oqý ornyn bitirip kelgen soń osy baǵytta bilim beretin ınstıtýttar men ýnıversıtetterdiń oqý sapasy nashar bolýmen qatar arnaıy bilim beretin oqytýlar az ekenin baıqadym. Sol kezderi jastar kóbinese Úndistanǵa oqýǵa baryp, biliktiligin jetildirip keletin. Sondyqtan Túrkıada birge oqyǵan dosymmen birlesip, 2006 jyly aqparattyq tehnologıalar oqytý ortalyǵyn ashyp, kompanıany “Empasoft” dep atadym. Sonyń nátıjesinde búginge deıin memlekettik sertıfıkatpen 5000-daı ınjener ázirlep, “Empasoft Academy” deńgeıine jetkizdik.
Biz oqytýlardy uıymdastyrýmen qatar memlekettik mekemelerge IT keńes berý qyzmetin usynamyz, dıjıtal transformasıalaý, aqparattyq tehnologıa jáne aqparattyq qaýipsizdik máselelerin sheship berip, bulttyq esepteý (Cloud computing) tehnologıasyn engizýdemiz. Sondaı-aq álemge tanymal baǵdarlamalarmen qamtamasyz etýshi 20 kompanıamen birlesip, ónimderin taratyp jumystaýdamyz.
SİZDİŃ JUMYS TÁSİLİŃİZ QANDAI? ORTASHA TÁÝLİKTİK JUMYS KÚNİŃİZ QALAI ÓTEDİ?
Adamdy basqarý degenimiz ony qalaı baǵalaıtynyńyzǵa tikeleı qatysty uǵym. Durys baǵalaı bilseńiz, adam jumysynan kúsh qýat, lázzat alatyndyqtan qurmetteý men syılata bilýdi mańyzdy sanaımyn. Adamdarmen jyly, durys qatynas jasaýǵa tyrysamyn. Olardy tyńdap, túsinip, ornyna ózińdi qoıyp, kemshiliginen góri artyqshylyǵyna nazar aýdaryp jumystaǵan jón dep kóremin. Tájirbıege qaraǵanda osyndaı tásilmen jumys júrgize berse, birazdan keıin adamnyń osal tusy da baıqalmaı qalady.
Kompanıa talaptaryna saı kelip, bizdiń quramǵa engen bolsa, ol adam jumystaı almaıdy degen bolmaıdy. Kerisinshe, ony paıdalana almaýymyz múmkin. Ol másele men jáne meniń jumysshylarymmen tez til tabysyp ketýine baılanysty.
Qandaı bir jaǵdaıda kez kelgen máseleni kóp jaǵynan qarastyryp, kóp adamdy qamtı otyryp, sheshimin tapqan durys. Men kóptegen jyl kásipkerlikpen aınalysyp, jumysymdy bir jolǵa qoıdym degenmen kópshilikpen sanasyp, «Sen onyń ornynda bolsa, qalaı shesher ediń?» dep ózime saýal qoıyp, aqyldasyp sheshim qabyldaýǵa umtylamyn.
EŃ KÓP QOLDANATYN, PAIDALANÝǴA QUSHTAR JUMYS QURALYŃYZ, QOLDANBALY BAǴDARLAMALARYŃYZ QANDAI?
Biz “Microsoft”-tyń bulttyq tehnologıalarynyń keshendi baǵdarlamalaryn paıdalanamyz. Úlken data (Big data) óndirilip jatqan qazirgi zamanda kez kelgen kompanıa aqparattaryn joǵaltyp alý qaýipi bar bolǵandyqtan “Microsoft Office 365” baǵdarlamasyn qoldanamyz. Sondaı-aq Microsoft Teams, Power BI, Outlook– terdi de qajetke jaratamyz. Odan basqa What3words, Shazam, Telegram, Skyscanner qatarly applıkeıshnder turaqty qoldanysymda bar.
“Men keńsege taqta ornatyp, oǵan jazyp, syzǵandy unatamyn. Jazǵanyńa qarasań, bári de óz-óz ornynda turady.”
ÝAQYT ÚNEMDEÝDİŃ UTYMDY TÁSİLİ NE?
Ýaqyt únemdeý jáne bosqa ýaqyt ótkizý degen bar. Men otbasyma arnalǵan saǵatymdy qysqartqandy qalamaımyn. Kerisinshe jumysta az ýaqytta ónimdi eńbek etý ýaqyt únemdeýdiń jaqsy bir tásili dep oılaımyn. Keıbir adamdar kóp ýaqyt rásýa etetin jumysty basqa bir adam qysqa merzimde atqara alatyndyqtan ár qyrly adamdardan quralǵan komanda nátıjeli eńbek istep, árqaısysynyń ýaqytyn únemdeýge kómektesedi.
ATQARYLATYN İSTER TİZİMİN QAIDA BELGİLEP, QALAI JÚRGİZESİZ?
Belgileý dápterin qozǵaltyp kórmeppin. Bizge jańa kelgen adamdar alǵashynda belgileýin paıdalanǵanmen keıin dıjıtal amalǵa kóshedi. Men jumys tizimin jasaýda “Microsoft”-tyń “To Do” baǵdarlamalaryn kóp qoldanamyn. One Note ta jaqsy qajetińe jaraıdy.
JUMYSYŃYZDYŃ EREKSHELİGİ NEDE? OŃ JÁNE KERİ ÁSERLERİ?
Aqparattyq tehnologıa kompanıasyna adamdarǵa jańa tehnologıany túsindirip, únemi qoldanýǵa daǵdylandyrý úlken qıyndyq týǵyzady. Avtokólik satýshyǵa ónimi jaıly jalpylama málimeti jetkilikti bolsa, bizge jańa baǵdarlamany engizý úshin tutynýshy kompanıada jumystaıtyn barlyq adamnyń maǵlumatyn bir deńgeıge jetkizip, kúndelikti kedergisiz paıdalana alatyndaı etip, jaqsy uǵyndyrý qajet. Bul jaǵynan ýaqyt kóp qajet etetin bıznes dep te ataýǵa bolady. Kóp ýaqyt jumsalǵan kezeń nemese dıjıtal kóshirýden keıin mekemeniń jumys ónimdiligi kúrt artady. Árıne, sońǵy nátıje jaqsy kóńil-kúı syılaıdy. Qatynas jasaýshylar men tutynýshylardyń alǵysyn alý erekshe yntalandyrady.
SİZ NENİ İSTEÝGE SHEBERSİZ?
Ózimdi basqalardy jaqsy tyńdaı bilemin dep oılaımyn. Adamdardy tyńdaý, olarmen sanasý kóptegen aqparatty qabyldap, odan jaqsy qorytyndy shyǵarý degen sóz. Bul dúnıede basqalardan alýǵa bolatyn ıdeıa men tájirıbe jeterlik.
Biz IT qyzmetterimizdi klasıkalyq deńgeıge jetkizý úshin jumystaýdamyz.
QAZİR QANDAI JUMYSQA NAZAR AÝDARYP JATYRSYZ?
Biz IT qyzmetterimizdi klasıkalyq deńgeıge jetkizý úshin jumystaýdamyz. Osy maqsatta kabınettik oqytýmen qatar onlaın júıege kóship, jańa platformany damytyp, kontent daıyndaý ústindemiz. Bul platformany osy aıdyń aıaǵynda áleýmetke tanystyrýdy josparlap otyrmyz. Uıym mekemeler úshin sandyq transformasıalaý degenimiz tek tehnologıalyq emes, 100 paıyz adamdardyń tutynýy men bilim dárejesine baılanysty bolǵandyqtan ońaıǵa túspeıdi. Tehnologıa jyldam damysa da, adamdardyń ony ıgerýi baıaý. Sondyqtan tehnologıalyq keshendi kontentti onlaın júıesinde taratý azamattardyń tehnologıalyq bilimin jetildirýdiń eń tıimdi tásili dep oılap, bul jobany qolǵa alyp otyrmyz.
Keleshekte bulttyq tehnologıaǵa basa nazar aýdarmaqpyz. Qazirgi kezde kim aqparattyq tehnologıalyq artyqshylyqtardy qoldanysqa engizedi, sol tabysqa jetip otyr. Basqasha aıtsaq, XXI ǵasyrdaǵy kez kelgen kásiptiń keleshegi tehnologıany qalaı utymdy paıdalanyp, sandyq transformasıalanýyna qatysty bolady. Mysaly, sońǵy ýaqytta elimizdiń taý-ken salasy kompanıalary bizge suranys jasap, servıs alatyn boldy.
KİTAP KÓP OQISYZ BA? DÁL QAZİR QANDAI KİTAP NEMESE MAQALA OQÝDASYZ?
Buryn bir ret oqyǵan Robert Kıosakıdiń «Baı áke, kedeı áke» atty kitabyn qaıta oqydym. Balǵyn jas kezimde oqyǵandyqtan sol kezde otbasy men urpaq aldyndaǵy jaýapkershilikti sonshalyqty túsinip oqymaǵanymdy baıqadym. Kóp nárseni oı eleginen ótkizdim. Tehnologıalar dáýirinde tek kitaptan ǵana emes, podkast, vebsaıttardan da kóp málimet alýǵa bolady. Mysaly, Medium-nan qalaǵan maqalany jyldam taýyp alasyz.
Teńizdeı tolaǵaı aqparat aǵyny ortasyndaǵy bizderge aqparatty orta mıda saralap, súzip alǵanymyz mańyzdy. Qolǵa túsken kitapty bas salyp oqyǵannan góri qajetti málimetti qysqa ýaqytta taýyp, qajetińizge jaratqanyńyz abzal.
SİZDİŃ MİNEZİŃİZ TUIYQ PA ÁLDE ASHYQ PA?
IT-men mamandanǵan adamdardyń kóbisi tuıyq keledi. Kópti basqaryp, basqalarmen qarym-qatynasqa túsken kezde olarda qarym-qatynas kemshindigi baıqalady. Men sońǵy bes jylda osy qabiletti damytý úshin kóp eńbek etip, kedergilerdi bastan keshirdim.
SİZ QANSHA ÝAQYT UIYQTAISYZ?
Men tańǵy 5.30-da turyp, eki saǵatty ózime arnaımyn. Sońǵy kezderi Udemy.com saıtynan aqparattyq tehnologıa salasyna qatysty qyzyqty sabaqtardy kórip, tapsyrmalar oryndap júrmin. Jumysqa kele salysymen ishki jumystardy rettep, qajetti qujattardy bekitip, tústen keıin iskerlik kezdesýler ótkizip, syrttaǵy jumystardy sheshýge ýaqytymdy jumsaımyn.
JUMYS KEZİNDE MÝZYKA TYŃDAISYZ BA? QANDAI ÁÝENDERGE ÁÝESSİZ?
Mýzykaǵa kóp qyzyǵýshylyǵym joq. Ómirimde birneshe ret qana karaokege baryppyn. Mýzyka tyńdaǵym kelse, kóbinese jaqsy áýender oınatyp qoıamyn.
SİZDİ JUMYSTAN TYS ÝAQYTTA QAIDAN TABÝǴA BOLADY?
Árıne, jumystan tys otbasyma ýaqyt arnaımyn. Juma kúngi keshte dostarymmen birge ter shyǵaryp, fýtbol oınaımyn.
KİMNEN, NEDEN KÚSH QÝAT ALASYZ?
Jumysshylarymyz dúısenbi saıyn tańerteń kompanıa keńsesi qabyrǵasyna adamdy yntalandyratyn sózder jazyp ilip qoıady. Solardyń ishinde “Do your best, forget the rest” degen sóz óte unady. Adam tańerteń ózin qýattandyryp, keshke deıin sol qýatyn azaıtpaý kerek dep oılaımyn. Osy ýaqytta jumys nátıjesine basa nazar aýdarǵannan góri dál sol mezetke kúshin shoǵyrlandyryp, jumysyn tıanaqty atqarý qajet. Nátıjesi qalaı bolýy da múmkin. Eń bastysy óz múmkindigińdi tolyq paıdalanǵanyńa senimdi bolsań bolǵany.
“Adam attan jyǵylýǵa bolady. Bul barlyq adamǵa kezdesetin jaǵdaı. Biraq sen qaıta atqa otyra alatyndaı júrekti bol!”
ÓMİRDEN ALǴAN EŃ JAQSY ǴIBRATYŃYZ…
Alty jasymda at minip úırendim. Bir kúni qoıdy eńkeıtip tastap, kele jatyr edim, atym úrkip, aıaǵym úzeńgige ilinip qalyp, súıretilip baryp, áreń qaldym. Sol kezde ata-anam qatty abyrjyp, ary-beri júgirisip, ózim de qatty qoryqtym. Sonda atam: “Adam attan jyǵylýǵa bolady. Bul barlyq adamǵa kezdesetin jaǵdaı. Biraq sen qaıta atqa otyra alatyndaı júrekti bol!” – dep, qaıta atqa mingizip qoıa bergeni bar. Osylaısha, men 7 jasymnan bastap, atqa minetin bolyp, jaqsy sáıgúlikterdi báıgeden ozdyryp júrdim. Bul meniń ómirden alǵan eń úlken sabaǵym edi. Búginge deıin jumysym men ustanymymda osydan tanbadym. Sondaı-aq atam ata-anama «balalaryń keleshegin oılasańdar, oǵan aıaýshylyq bildirmeńder» deıtini óte durys dep oılaımyn.
JAS MAMANDARǴA QANDAI KEŃES BERESİZ?
Ár adamnyń armany men aldyna qoıǵan maqsaty bolý kerek. Eger tańerteń uıqydan oıanǵanda ne isteıtinińiz anyq bolmasa, daǵdarys degenimiz sol. Adam qanshalyqty jaıly ortada ómir súrse de, daǵdaryp qalatyn sátteri bolady. Sol mezette maqsatyń aıqyn, ne isteıtiniń túsinikti bolýy qajet. Jastar basqalar men týraly ne oılaıdy degen oıdan ada «kózsiz batyr» bolý kerek. Ne qalaǵanyńdy isteýge de bolady. Alaıda qandaı bir máselege jan-jaqty qarap, múmkindiginshe bolatyndaı amaldar jasaýǵa tyrysqan jón. Jańasha oılaýǵa talpynyp, qalyptasqan kózqarastan qashyq bolǵan durys.
KELESİ QONAQQA KİMDİ USYNYP, JUMYS İSTEÝ TÁSİLİMEN TANYSQYŃYZ KELEDİ?
“Nest akademıasy”, “Info Solution” kompanıasy negizin qalaýshy B.Ǵabıtti usynamyn. Ony basqalarǵa úlgi bolyp, aqparattyq tehnologıa salasynda myqty mamandar daıyndap, qoǵam damýyna óz úlesin qosyp júrgen jas maman dep oılaımyn.
www.kaznews.mn
