Zańsyz aktıvterdi qaıtarý jónindegi komısıa «Zańsyz ıemdenilgen aktıvterdi memleketke qaıtarý týraly» zań sheńberinde jumysyn jalǵastyrýda. Barlyq qarajat áleýmettik paıdaly maqsattarǵa odan ári qaıta bólý úshin Arnaýly memlekettik qorǵa jiberiledi. Bul týraly Úkimettiń baspasóz qyzmeti habarlady.

Úkimet Memleket basshysynyń tapsyrmasy boıynsha Aqmola oblysynyń Zerendi aýylynda quny 2,1 mlrd teńge bolatyn sport keshenin jáne Túrkistan oblysynyń Temirlan aýlynda 890 mln teńge somaǵa mýzyka mektebin salý jónindegi alǵashqy eki áleýmettik jobany iske asyrýǵa Arnaýly memlekettik qordan qarajat bólý týraly sheshim qabyldady.

Bul bastamalar turǵyndardy bilim berý jáne sporttyq qyzmettermen qamtýdy arttyrý úshin aýyldyq jerlerde áleýmettik ınfraqurylymdy damytýǵa baǵyttalǵan.

Máselen, Aqmola oblysynyń Zerendi aýylynda aýdany 6 myń m2 asatyn, bir aýysymda 80 adamdy qabyldaıtyn sport keshenin salý josparlanyp otyr. Nysan belsendi turǵyndarǵa bos ýaqytytyn tıimdi ótkizýge múmkindik beredi – aýdanda 14,5 myńnan astam adam júıeli túrde sportpen shuǵyldanady. Jobaǵa sáıkes, ortalyqta kúres, boks, shańǵy tebý syndy sport túrlerimen aınalysý úshin jabdyqtalady, 2 jattyǵý zaly qajetti qural-jabdyqtarmen qamtylady. Sondaı-aq keshende sportshylardy jattyqtyrý men saýyqtyrý jumystaryn sapaly ári tıimdi júzege asyrý úshin qajetti qural-jabdyq jáne basqa da qosalqy úı-jaılar qarastyrylǵan.

Túrkistan oblysyndaǵy Temirlan aýlynda 300 oryndyq jańa óner mektebin salý josparlanyp otyr. 1974 jyly qabyrǵasy karkastan salynǵan qazirgi ǵımarat zamanaýı sanıtarlyq jáne órt qaýipsizdigi talaptaryna saı emes, kúrdeli jóndeýge jaramaıdy. Soǵan qaramastan búgingi tańda keshen jumys istep tur – ortalyqta 420-ǵa deıin bala oqıdy, bul onyń qazirgi qabyldaý múmkindiginen 2 esege artyq, 45 muǵalim sabaq beredi. Jańa joba aýylda óner salasynda qosymsha sapaly bilim alýǵa jaǵdaı jasaıdyi. Balalar jaıly ortada mýzykamen, horeografıamen aınalysýǵa múmkindik alady.    

Búgingi tańda Arnaýly memlekettik qorda 177 mlrd teńge jınaqtalǵan. Bul qarajattyń barlyǵy áleýmettik jáne ınfraqurylymdyq nysandar salýǵa, basqa da áleýmettik mańyzdy maqsattarǵa, sonyń ishinde densaýlyq saqtaý, bilim berý, buqaralyq sport jáne ózge salalardaǵy jobalardy iske asyrýǵa baǵyttalady. 

Zańsyz ıemdenilgen aktıvterdi memleketke qaıtarý máseleleri jónindegi komısıany QR Premer-mınıstri basqarady, jumys organy – QR Bas prokýratýranyń Aktıvterdi qaıtarý jónindegi komıteti.

Úkimet sý tasqynynyń aldyn alý úshin ózen-sýlardaǵy sý deńgeıin anyqtaıtyn batımetrıalyq zertteýlerge 576 mln teńge bóldi, dep habarlaıdy Ulys.

Qaýlyǵa Premer-Mınıstr Oljas Bektenov qol qoıǵan. Aqshany sý resýrstary jáne ırrıgasıa mınıstrligi alady.

«Qarjylandyrýdyń negizgi bóligi jabdyqtar men tehnıkalyq jaraqtardy satyp alýǵa, sondaı-aq zertteýlerge baǵyttalady. Atap aıtqanda, osy aqshany «Qazsýshar» kompanıasynyń «Sý metrologıa» fılıalyna berip, elimizdiń soltústik, batys jáne ortalyq óńirlerdegi sý tasqyny qaýpi bar ýchaskelerine batımetrıalyq zertteý júrgizý kózdelip otyr», - dep habarlaıdy úkimet. 

Ózen-sýlar bıyl da, 2025 jyly da zerttelýi kerek. Zertteýdiń derekteri sıfrlyq damý, ınovasıalar jáne aeroǵarysh ónerkásibi mınıstrligi men «Qazaqstan Ǵarysh Sapary» kompanıasyna beriledi.

Úkimet bıyl aýyl sharýashylyǵyn qarjylandyrý úshin rekordty kólemde 580 mlrd teńge bóldi. Bul qarajat eginshilerge tikeleı nesıe berýge, paıyzdyq mólsherlemeni tómendetýge, forvardtyq satyp alýǵa baǵyttaldy. Bul týraly Úkimettiń baspasóz qyzmeti habarlaıdy.

Nátıjesinde, eginshiler dándi daqyldar boıynsha rekordtyq kólemde ónim jınady: ortasha ónimdilik gektaryna 16,1 sentner bolyp, 26,7 mln tonna astyq bastyryldy. 2023 jyly ortasha ónimdilik 10 s/ga quraǵan bolatyn. Sonymen qatar, 3,2 mln tonna maıly daqyl bastyryldy, 2,9 mln tonna kartop, 3,9 mln tonna kókónis jáne 2,6 mln tonna baqsha daqyldary jınaldy.

«Agrotehnologıalardy durys qoldaný, sapaly tuqymdar, mıneraldy tyńaıtqyshtar jáne ósimdikterdi tıimdi qorǵaýdyń arqasynda joǵary ónimdilikke qol jetkizildi.

Aldaǵy ýaqytta aýyl sharýashylyǵy daqyldaryn ártaraptandyrý jumystary jalǵasyn tabady. Prezıdent tapsyrmalary boıynsha ázirlengen jol kartasy aıasynda 2024-2028 jyldar aralyǵynda aýyl sharýashylyǵynyń jalpy ónim kólemin eki esege arttyrý mindeti qoıyldy. Jalpy, Qazaqstan Respýblıkasynyń agroónerkásip keshenin damytýdyń 2021-2030 jyldarǵa arnalǵan tujyrymdamasy sheńberinde 2030 jylǵa qaraı bıdaı ónimdiligin gektaryna 20 sentnerge deıin arttyrý josparlanyp otyr. Aıta ketý kerek, memleket basshysynyń tapsyrmasy boıynsha 2025 jylǵa arnalǵan kóktemgi egis jáne kúzgi jıyn-terim jumystaryn qarjylandyrý bıyldyń ózinde bastalyp ketti», - delingen habarlamada.