Jetisý oblysynda dintanýshylar men dinı birlestikter jetekshileriniń "Rýhanı kelisim joly: sıez ıdeıasyn júzege asyrý" atty respýblıkalyq forýmy ótti. Forým memlekettik organdardyń, dinı birlestikterdiń, ǵylymı qaýymdastyq pen azamattyq sektor ókilderiniń basyn qosty, - dep habarlaıdy Jetisý oblysy ákiminiń baspasóz qyzmeti.
Taldyqorǵanda oblystyq din isteri basqarmasy men Din salasyndaǵy máselelerdi zertteý jáne ońaltý ortalyǵynyń birlesip uıymdastyrýymen ótken sharaǵa oblys ákiminiń orynbasary Dıas Esdáýletov qatysty.
Quttyqtaý sóz sóılegen D. Esdáýletov oblys ákimi atynan forým qatysýshylaryna beıbitshilik pen kelisimdi nyǵaıtýǵa, barshaǵa ortaq adamgershilik qundylyqtardy saqtaý men nasıhattaýǵa qosqan úlesteri úshin alǵys bildirdi.
– Prezıdent aıtqandaı, elimizde etnosaralyq jáne konfesıaaralyq kelisimdi nyǵaıtý boıynsha tolymdy tájirıbe jınaqtalǵan. «San alýandyqtaǵy birlik» degen ámbebap qaǵıda qazaqstandyq etnıkalyq jáne dinı tózimdilik modeliniń negizi bolyp otyr. Qazirgi ýaqytta Qazaqstanda 100-den astam etnos ókilderi tatý-tátti ómir súrip, 18 konfesıany biriktiretin shamamen 4000-ǵa jýyq dinı birlestik erkin qyzmet atqaryp keledi. Mundaı etnıkalyq jáne dinı áralýandyq bizdiń oblys aýmaǵynda da kórinis tapqan. Bul – bizdiń baǵa jetpes baılyǵymyz ári artyqshylyǵymyz. Forýmnyń jumysy tabysty ótedi dep senemin, al talqylanatyn ıdeıalar men usynystar qoǵamdaǵy beıbitshilik pen turaqtylyqty nyǵaıtý isinde mańyzdy ról atqarady dep oılaımyn, – dedi ol.
Óz kezeginde forýmǵa qatysýshylar da oı-pikirlerin bildirdi.
– Barlyq dinder men konfesıalar ókilderiniń basyn qosqan bul forýmdy asa mańyzdy shara dep esepteımin. Kez kelgen ózen birneshe saladan quralady, olardyń bári túptep kelgende bir úlken muhıtqa quıady. Sol sıaqty bizdiń forým shaǵyn bolsa da, álemdegi beıbitshilikti nyǵaıtý isine óz úlesin qosýǵa baǵyttalǵan, – dedi «Úshtóbelik presvıterıan shirkeýi» jergilikti dinı birlestiginiń pastory Nadejda Kım Gvan Djýn.
Oǵan Taldyqorǵan qalasy 3-bólimshedegi «Táýbe» meshitiniń rýhanı jetekshisi Radıon Iý da qosyldy:
– Eń aldymen biz ortaq eńbegimizdiń birlesken nátıjesine jetýdi maqsat etemiz. Rýhanı qundylyqtardy umytpaı, adamı qasıetterdi damýǵa umtylǵan jón. Barshańyzǵa baqyt, beıbit ómir, mol ıgilik tileımin! – dedi ol.
Sondaı-aq Taldyqorǵan RPS vıkarıattyńynyń basqarýshysy, Taldyqorǵan epıskopy Klavdıan da osy pikirdi qýattaıdy:
– Bizdiń forým dástúrli sharaǵa aınalyp úlgerdi, ol jyl saıyn Rýhanı kelisim kúnine arnalyp ótkiziledi. Ártúrli konfesıalar men ult ókilderi arasyndaǵy rýhanı kelisim – búgingi kúni óte ózekti, sebebi biz kópultty memlekette ómir súrip jatyrmyz. Biz bir-birimizben aralasyp, kezdesip, mańyzdy máselelerdi birlesip sheship, zamanaýı syn-qaterlerdi eńserýimiz kerek. Barshalaryńyzǵa rýhanı úılesim, tynyshtyq pen birlik tileımin! – dedi ol.
Forým aıasynda qoǵamdaǵy beıbitshilik pen kelisimdi saqtaý, rýhanı qundylyqtardy nasıhattaý isine eleýli úles qosqan birqatar azamattarǵa oblys ákiminiń Alǵys haty tabys etildi. Sondaı-aq jyl boıy belsendi qyzmetimen kózge túsken dinı birlestik ókilderi de nazardan tys qalǵan joq.
Kezdesý sońynda qatysýshylar rýhanı kelisim men beıbitshilikti saqtaý barshanyń ortaq boryshy ekenin atap ótip, osy baǵyttaǵy birlesken jumysty jalǵastyrýǵa daıyn ekendikterin bildirdi.
