Jetisý oblysynda «Aýyldyq densaýlyq saqtaýdy jańǵyrtý» ulttyq jobasy aıasynda Aqsý, Alakól, Sarqan, Eskeldi, Kóksý, Qaratal, Kerbulaq aýdandardaǵy jáne Panfılov shekara mańyndaǵy 15 dárigerlik ambýlatorıany, 39 feldsherlik-akýsherlik jáne 5 medısınalyq pýnktti qosa alǵanda 59 nysannyń qurylysy bastaldy. Jalpy óńirde qabyldanǵan sharalardyń arqasynda sońǵy 2 jylda densaýlyq saqtaý nysandaryn jańartý deńgeıi 50% -dan asty, - dep habarlaıdy Jetisý oblysy ákiminiń baspasóz qyzmeti.
Oblystyq densaýlyq saqtaý basqarmasynyń málimetinshe, bir ǵana shalǵaı Alakól aýdanynda ulttyq joba aıasynda 9 zamanaýı densaýlyq saqtaý nysanynyń qurylysy bastaldy. Bul Ekpindi, Jaıpaq, Beskól aýyldaryndaǵy 3 dárigerlik ambýlatorıa jáne Janama, Sapaq, Úshbulaq, Qyzylqaıyń, Qaınar jáne Aqjar aýyldaryndaǵy 6 feldsherlik-akýsherlik pýnkt.
Osylaısha, Aqjar aýylyndaǵy FAP-tyń daıyndyq dárejesi shamamen 40% -dy quraıdy.
Merdiger uıym ókili Qurbanáli Omarovtyń aıtýynsha, qurylys jumystary tamyz aıynyń basynda bastalǵan.
- Bizdiń mindetimiz - nysan salý, irgeles aýmaqty abattandyrý, qorshaý ornatý. Sondaı-aq, biz 35 mln. teńgege jýyq somaǵa zamanaýı medısınalyq jabdyqtar satyp alýǵa ótinim berdik. Iaǵnı biz nysandy daıyn kúıde tapsyramyz. Shetten kelgen mamandardan basqa 10 jergilikti turǵyn tartylǵan, barlyq qajetti tehnıka bar. Iaǵnı, bizde merziminde oryndaýǵa barlyq múmkindik bar, - dep atap ótti Q.Omarov.
Aqjar aýylynda 1500 adam turady. Salynyp jatqan feldsherlik-akýsherlik pýnkt 60 jyldary salynǵan beıimdelgen ǵımaratta ornalasqan eskirgen medısınalyq pýnkttiń ornyna salynady.
- Aýyldaǵy medpýnkt eskirgen jáne normalar men talaptarǵa sáıkes kelmeıdi, qysta medpýnkt salqyn bolady. Sondyqtan da aýyl turǵyndary ózderinde zamanaýı densaýlyq saqtaý mekemesiniń paıda bolýyna, ıaǵnı medısınalyq qyzmet kórsetý sapasynyń artýyna óte qýanyshty. Shilde aıynda bizdiń aýyldyq okrýgtiń Qońyr aýylynda blokty-modýldi medısınalyq pýnkt iske qosylǵandyǵyn atap ótkim keledi. Ótken jyly munda mektep jóndelip, 150 oryndyq jańa mádenıet úıi salyndy, Munyń bári qýantady, sebebi aýyl turǵyndarynyń ómir súrý sapasyn arttyrýǵa tikeleı áser etedi, - dep qorytyndylady Aqjar aýyldyq okrýginiń ákimi Eles Japarǵalıev.
Oblystyq densaýlyq saqtaý basqarmasynyń basshysy Arman Janseńgirov atap ótkendeı, jergilikti búdjet esebinen jáne aýyl turǵyndaryna kórsetiletin medısınalyq qyzmetterdiń sapasyn arttyrý maqsatynda óńirde blokty-modýldi medısınalyq pýnktter salynýda.
- Alakól aýdanyna keletin bolsaq, ótken jyly Qarlyǵash, Baızerek, Yntaly aýyldarynda blokty-modýldi medısınalyq pýnktter ornatyldy. Bıylǵy jyly osyndaı nysandar Bıbaqan, Arqarly jáne Qońyr aýyldarynda paıdalanýǵa berildi. Sondaı-aq, Dostyq, Qabanbaı jáne Aqtúbek aýyldaryna 3 sanıtarlyq avtokólik satyp alyndy. Jyl sońyna deıin aýdandyq aýrýhana zamanaýı medısınalyq jabdyqtarmen qamtamasyz etiledi. Budan basqa, 200 tósektik stasıonary bar ortalyq emhana qurylysy úshin jobalyq-smetalyq qujattama ázirlenýde.
Jalpy sońǵy 2 jylda Alakól aýdanyna ınfraqurylymdyq jáne áleýmettik nysandardyń qurylysyna, sondaı-aq jobalaý jumystaryna oblystyq búdjetten 32,2 mlrd teńge bólindi.
